Сэндарьенгири Лылвари́ 17 - Библия - Пэ Балтитко Романи чиб (Романэс) 2019

Миха Кэрэ́ла Идолы

¹ И сыс вари-кон пэ Ефремо́скири бэ́рга, лавэ́са Миха.

² Ёв пхэндя́ пэ́скирэ да́кэ: “Тысёнцо шэл шэ́кели руп, савэ́ ту́тэ лынэ́ и, пал савэ́ ту пашы́л ма́ндэ пхэндя́н прокошыбэна, дава́ руп ма́ндэ, мэ лыём лэс.” Дай лэ́скири пхэндя́: “Бахтякирдо́ тэ явэ́л миро чхаво́ Растэ-Дэвлэ́стэ!”

³ И рискирдя́ ёв пэ́скирэ да́кэ тысёнцо шэл шэ́кели руп. И пхэндя́ лэ́скири дай: “Дава́ руп мэ ту́тыр отдыём Ра́скэ-Дэвлэ́скэ ваш мирэ́ чхавэ́скэ, соб (кай) тэ кэрэ́с лэ́стыр и вычхиндло муй и вычхудо о́бразо; и адя́кэ мэ отда́ва лэс ту́кэ.”

⁴ Нэ ёв рискирдя́ руп пэ́скирэ да́кэ. Лэ́скири дай лыя́ дуйшэла́ шэ́кели руп и отдыя́ лэн вычхуибнарискэ. Ёв кэрдя́ лэ́ндыр вычхиндло муй и вычхудо о́бразо (кумиро), саво́ и сыс дрэ Михаскиро кхэр.

⁵ И сыс Михастэ Дэвлэ́скиро Кхэр. И кэрдя́ ёв эфо́до и терафимо, и ёв высвэнцындя пэ́скирэ чхавэ́ндыр екхэ́с, соб (кай) ёв тэ явэ́л лэ́стэ раша́са.

⁶ Дрэ долэ́ дывэса́ на сыс крали́с пэ Израилё; кажно (сва́ко) кэрдя́ дова́, со лэ́скэ здыяпэ чачипна́са.

⁷ Екх тэрно́ ману́ш Юдэя́кирэ Вифлеемостыр, Юда́скирэ родыцо́стыр, о Левито, тэды дживдя́ одо́й;

⁸ адава́ ману́ш гия́ Юдэя́кирэ Вифлемоскирэ форо́стыр, соб (кай) тэ дживэ́л, кай приджалапэ, и, гии дромэ́са, явдя́ пэ Ефремо́скири бэ́рга кэ Михаскиро кхэр.

⁹ И пхэндя́ лэ́скэ Миха: “Каты́р ту джа́са?” Ёв пхэндя́ лэ́скэ: “Мэ сом Левито Юдэя́кирэ Вифлемостыр и мэ джа́ва тэ джива́в, кай приджалапэ.”

¹⁰ И пхэндя́ лэ́скэ Миха: “Ячпэ ма́ндэ, и яв ма́ндэ дадэ́са и раша́са; мэ ява́ва тэ дав ту́кэ пир дэш шэ́кели руп пэ бэрш, и со трэй пэ и́дя и хабэ́н.”

¹¹ Левито гия́ кэ ёв и дыя́ лав Левито тэ ячэ́лпэ далэ́ манушэ́стэ, и сыс адава́ тэрно́ ману́ш лэ́стэ, сыр екх лэ́скирэ чхавэ́ндыр.

¹² Миха высвэнцындя Левитос, и адава́ тэрно́ ману́ш сыс лэ́стэ раша́са, и дживдя́ дро Михаскиро кхэр.

¹³ И пхэндя́ Миха: “Какана́ мэ джино́м, со Рай Дэвэ́л явэ́ла ма́нгэ тэ кэрэ́л лачхипэ́н, пал-дова́ со Левито ма́ндэ яця́ раша́са.”