Сэндарьенгири Лылвари́ 16 - Библия - Пэ Балтитко Романи чиб (Романэс) 2019

Самсо́но и Далида

¹ Явдя́ е́кхвар Самсо́но дрэ Газа и, дыкхця́ одо́й биладжакуня джувля́, и загия́ кэ ёй.

² Манушэ́нгэ Газакирэнгэ пхэндлэ́: “Самсо́но явдя́ адари́к.” И псирдэ́ ёинэ трусця́л (кругом), и ракхнэ лэс сари́ рат дрэ форо́скирэ вудара́, и гарадынэ сари́ рат, ракири́: кэ дывэсы́тко ра́нко ужакираса и замараса лэс.”

³ А Самсо́но сыс суто́ кэ паш рат; дрэ паш рат уштыя́, сухтылдя вудара́ форо́скирэ портэндыр дуе косякэнца, ґаздыя́ лэн кхэтанэ́ шыбэроса (запороса), чхудя́ пэ пэ́скирэ псикэ́ и отлыджия лэн пэ бэрга́киро вучипэ́н, сави́ исын пэ дром кэ Хевро́но.

⁴ Коригэды́р (позжэ) дава́ лэ́скэ яця́ пир ило́ екх джувлы́, сави́ дживдя́ пэ Сорекоскиро до́ло; лав ла́киро сыс Далида.

⁵ Кэ ёй явнэ́ Филистимия́кирэ хулая́ и ракирэ́на ла́кэ: “Уракир лэс, и уджин, дрэ со исын бари лэ́скири зор, и сыр амэ́нгэ тэ пиризорьякирас (тэ збердынас) лэс, соб (кай) тэ спхандас лэс тэ штылякирас лэс; а амэ даса ту́кэ пал дава́ кажно тысёнцо шэ́кели дро руп.”

⁶ И пхэндя́ Далида Самсоноскэ: “‘Пхэн ма́нгэ, дро со’ исын бари зор тыри́, и со́са тэ пхандэс тут, соб (кай) тэ штылякирэс тут?”

⁷ Самсо́но пхэндя́ ла́кэ: “Ко́ли спхандэна ман эфта́ киндэ тетивэнца, савэ́ исын на зашутькирдэ, тэды мэ скэравапэ бизорья́киро и ява́ва, сыр и яви́р мануша́.”

⁸ И яндлэ́ ла́кэ Филистимнякирэ хулая́ эфта́ киндэ тетивы, савэ́ сыс на зашутинэ, и ёй пхандя лэс лэ́нца.

⁹ Машкир дова́ сыс екх гарадо́ ману́ш бэшто́ дрэ шту́ба, кай сыс сутэ́. И пхэндя́ лэ́скэ: “Самсо́но! Филистимля́ни джа́на пэ ту́тэ.” Ёв роскустя тетивы, сыр роскушэна тхав паклятыр, ке́ли пирихачкирэла ла яг. И на уджиндлэ́ лэ́скири зор.

¹⁰ И пхэндя́ Далида Самсоноскэ: “Ѓа́да, ту хохадян ман и ракирдян ма́нгэ хохаибэ́н; пхэн какана́ ма́нгэ, со́са тэ спхандав тут?”

¹¹ Ёв пхэндя́ ла́кэ: “Ко́ли пхандэна ман нэвонэ́ шэлэнца, савэ́ на сыс дро рэ́ндо, тэды мэ кэравапэ бизорья́киро и ява́ва, сыр сарэ́ мануша́.”

¹² Э Далида лыя́ нэвэ шэлэ, и пхандя лэс, и пхэндя́ лэ́скэ: “Самсо́но! Филистимля́ни джа́на пэ ту́тэ.” (Машкир дава́ сыс екх гарадо́ ману́ш, бэшто́ дрэ шту́ба, кай сыс сутэ́). И скустя ёв лэн пэ́скирэ вастэ́ндыр, сыр тхава.

¹³ И пхэндя́ Далида Самсоноскэ: “Уса ту хохавэса ман и ракирэ́са ма́нгэ хохаибэ́н; пхэн ма́нгэ, со́са бы тэ пхандэн тут.” Ёв пхэндя́ ла́кэ: “Ко́ли ту мирэ́ шэрэскирэ балэндыр скхувэса эфта́ чхурья (косы) дрэ тхан (ткань), и примарэса ла цвикоса кэ ткально калода.

¹⁴ И прикэрдя ёй лэн кэ калода, и пхэндя́ лэ́скэ: “Филистимля́ни джа́на пэ ту́тэ, Самсо́но!” Ёв джангадыя пэ́скирэ соибнастыр и вытырдыя ткально калода кхэтанэ́ тханэса (тканяса).

¹⁵ И пхэндя́ лэ́скэ Далида: “Сыр ту ракирэ́са: Ту сан дро́го ма́нгэ, а ило́ тыро́ нанэ ма́нца? Ѓа́да, ту трин мо́лы хохадян ман и на пхэндя́н ма́нгэ, дрэ со исын бари зор тыри́.”

¹⁶ И адя́кэ ёй пэ́скирэ лавэ́нца тасавэлас лэс кажно дывэ́с, и мэнчындя лэс, тэды лэ́скирэ дескэ яця́ пхаро́ кэ мэрибэ́н.

¹⁷ И ёв отчхакирдя́ ла́кэ саро́ ило́ пэ́скиро, и пхэндя́ ла́кэ: “Бритва (мурадлуны) на касындяпэ миро шэро́; пал-дова́ со мэ сом Дэвлэ́скиро назореё мирэ́-да́кирэ лочовя́тыр (утробатыр); ко́ли тэ обчхинэс ман, то отджала мири́ зор ма́ндыр; мэ кэравапэ бизорья́киро и ява́ва, сыр сарэ́ мануша́.”

¹⁸ Э Далида, со ёв отчхакирдя́ ла́кэ пэ́скиро саро́ ило́, бичхадя́ и кхардя́ Филистимлянэнгирэ хулан, пхэны лэ́нгэ: “Джа́н какана́; ёв отчхакирдя́ ма́нгэ саро́ пэ́скиро ило́.” И явнэ́ кэ ёй Филистимлянэнгирэ хулая́, и яндлэ́ руп дрэ пэ́скирэ васта́.

¹⁹ И засовлякирдя лэс Далида пэ ла́кирэ чанга́, и кхардя́ манушэ́с, и пхэндя́ лэ́скэ тэ обчхинэл эфта́ чхурья лэ́скирэ шэрэстыр. И лыя́ ёв тэ нашавэл зор и отгия́ лэ́стыр зор лэ́скири.

²⁰ Ёй пхэндя́: “Филистимля́ни джа́на пэ ту́тэ, Самсо́но!” Ёв джангадыя (прошниндяпэ) пэ́скирэ соибнастыр и пхэндя́: “Джа́ва, сыр и англыдыр, и мэ ява́ва во́льно.” А на джиндя́, со Рай Дэвэ́л отгия́ лэ́стыр.

²¹ Филистимля́ни лынэ́ лэс и выпхусадэ лэ́скэ якха́, яндлэ́ лэс дрэ Газа и закуиндлэ лэс дуе харкунэ́ зандирьенца (ланцугэнца), и ёв мелиндя дрэ узникэнгиро кхэр.

²² Нэ пало́ (после) дава́ бала́ пэ лэ́скиро шэро́ лынэ́ тэ барьён, кай ёнэ сыс обчхиндлэ́.

²³ Филистимлянэнгирэ хулая́ скэдынэ́пэ, соб (кай) тэ яндэн баро́ свэ́нто яныбэ́н Дагоноскэ, пэскирэскэ дэвлорэскэ, и тэ лошалён (тэ повеселинэнпэ), и пхэндлэ́: “Дэвэ́л амаро́ отдыя́ Самсонос, вэргос амарэс, дрэ амарэ́ васта́.”

²⁴ Адя́кэ-паць и мануша́, дыкхи́ лэс, славиндлэ пэ́скирэс дэвлорэс, ракири́: “Дэвэ́л амаро́ отдыя́ дрэ амарэ́ васта́ амарэ́ вэргос и амарэ́ пхувья́кирэ чхучиибнарис, саво́ домардя́ бутэн амэ́ндыр.”

²⁵ И ке́ли розвеселиндяпэ лэ́нгиро ило́, то ёнэ пхэндлэ́: “Кхарэ́н Самсонос, мэк ёв тэ сандякирэл амэн.” И кхардэ́ Самсонос узникэнгирэ кхэрэ́стыр, и ёв сандякирдя лэн, и чхудэ́ лэс машки́р сты́лбы.

²⁶ И пхэндя́ Самсо́но тэрнэ́-бэршэнгирэскэ (отрокоскэ), саво́ лыджия́ лэс пал васт: “Подлыджа ман, соб (кай) тэ чилавав ма́нгэ сты́лбы, пэ савэ́ исын тэрдо́ кхэр, и тэ прикасынавпэ кэ ёнэ.”

²⁷ Муршэ́н и джувле́н сыс пхэрдо́ кхэр; одо́й сыс сарэ́ Филистимлянэнгирэ хулая́, и пэ стрэ́ха (чхаки́н) сыс кэ трин тысёнцы муршэ́н и джувле́н, савэ́ дыкхнэ́ пэ Самсоностэ, саво́ лэн сандякирэлас.

²⁸ И задыя го́дла Самсо́но кэ Рай Дэвэ́л и пхэндя́: “Раё Дэ́вла! Пририпир ман и зорьякир ман е́кхвар какана́, о Дэ́вла! Соб (кай) ма́нгэ дрэ екх мо́ло тэ отхав палэ Филистимлянэнгэ пал дуй мирэ́ якха́.”

²⁹ И злыя́ Самсо́но штэто́стыр дуй машкиратунэ сты́лбы, пэ савэ́ рикирдяпэ кхэр, рикири пэс дрэ лэ́ндэ, дрэ екх пэскирэса чачэ́ (правонэ) вастэ́са, а дрэ яви́р зэрвонэ (левонэ) вастэ́са.

³⁰ И пхэндя́ Самсо́но: “Мэр, ди миро, Филистимлянэнца!” И тасадя сарэ́ зорья́тыр и пыя́ кхэр пэ хуландэ и пэ сарэ́ манушэ́ндэ, савэ́ сыс дрэ лэ́стэ. И сыс мулэн, савэ́н мулякирдя́ Самсо́но анги́л мэрибэ́н пэ́скиро, бутыдыр, сыр ци бут ёв мулякирдя́ дрэ пэ́скиро джиибэ́н.

³¹ И явнэ́ лэ́скирэ пша́ла и саро́ лэ́скирэ-дадэ́скиро кхэр, и лынэ́ лэс, и гинэ́, и гарадэ́ лэс машки́р Цора и Естаоло, дрэ Маноёскири копли́ца, лэ́скирэ дадэ́скири. Ёв сыс сэнда́ри пэ Израилё биш бэрш.