Сэндарьенгири Лылвари́ 12 - Библия - Пэ Балтитко Романи чиб (Романэс) 2019

Ефаёскири Чинга́рд Ефрямлянэнца

¹ Ефремляни скэдынэ́пэ и пиригинэ́ Иорда́но дрэ Севино и пхэндлэ́ Ефаёскэ: “Ваш со ту псирдян тэ марэспэ Амонитянэнца, а амэн на кхардян пэ́са? Амэ схачкираса тыро́ кхэр яга́са и ту́са кхэтанэ́.”

² Ефаё пхэндя́ лэ́нгэ: “Мэ и мирэ́ мануша́ лыджиям Амонитянэнца баро́ кошыбэ́н; мэ кхардём тумэн, нэ тумэ́ на зракхнэ́ ман лэ́нгирэ вастэ́стыр;

³ дыкхи́, со тумэ́ на зракхэна ман, мэ отдыём хасибнаскэ миро джиибэ́н, и гиём пэ Амонитянэндэ, и отдыя́ лэн Рай Дэвэ́л дрэ мирэ́ васта́; со́скэ тумэ́ явнэ́ какана́ тэ марэ́нпэ ма́нца?”

⁴ И скэдыя́ Ефаё сарэ́н Галаадо́скирэ манушэ́н, и мардя́пэ Ефремлянэнца, и домардэ́ Галаадо́скирэ мануша́ Ефремлянэн, ракири́: “Тумэ́, Ефремо́скирэ знашыбнарья, Галаадо́скирэ исын машки́р Ефремостэ и машки́р Манасиястэ.

⁵ И пириухтылдэ Галаадитяни пириправа пирда́л Иорда́но Ефремлянэндыр, и, ке́ли-кон Ефремлянэндыр, савэ́ ячнэ́пэ джидэ́, ракирдя́: ‘Дэн во́ля (дозволинэн) ма́нгэ тэ пириджав,’ тэды Галаадо́скирэ мануша́ ракирдэ́ лэ́скэ: “Ци на Ефремлянино сан ту?” Ёв ракирдя́: “Над.”

⁶ Ёнэ ракирдэ́ лэ́скэ: “Пхэн: ‘Шыбболет,’” а ёв ракирдя́: “Сибболет”, и на могиндя́ явирчанэс (пэ яви́р) тэ выракирэл. Тэды ёнэ лэнас лэс, и мулякирэнас пашы́л пириправа (форто) пир Иорда́но. И пынэ́ дро до часо Ефремлянэндыр штардэша́ дуй тысёнцы.

⁷ Ефаё сыс Израилёскиро сэнда́ри шов бэрш, и мыя́ Ефаё Галаадитянэнгиро, и гарадо́ сыс дро екх Галаадоскиро фо́ро.

Есево́но, Елоно и Авдоно

⁸ Коригэды́р (позжэды́р) лэ́стэ сыс Израилёскирэ сэндариса Есево́но Вифлеемостыр.

⁹ Лэ́стэ сыс трия́нда (триндэша) чхавэ́н, и триндэша чхае́н ёв отдыя́ кхэрэ́стыр палоро́м, а триндэша чхае́н лыя́ рига́тыр пал пэ́скирэ чхавэ́ндэ, и сыс ёв сэнда́ри Израилёскиро эфта́ бэрш.

¹⁰ И мыя́ Есево́но и гарадо́ сыс дро Вифлее́мо.

¹¹ Коригэды́р (позжэды́р) лэ́стэ Израилёскирэ сэндариса сыс Елоно, Завулонянино, и сэндякирдя Израилё дэш бэрш.

¹² И мыя́ Елоно Завулонянино, и гарадо́ сыс дрэ Аиалоно, пэ Завулоноскири пхув.

¹³ Коригэды́р лэ́стэ сыс Израилёскирэ сэндариса Авдоно, Гилелоскиро чхаво́, Пирафонянино.

¹⁴ Лэ́стэ сыс штардэша́ чхавэ́н и трия́нда ўнукэн, савэ́ традэнас пэ эфтадэшэ тэрнэ́ ослэндэ. Ёв сэндякирдя Израилё охто́ (бидуе́нгиро дэш) бэрш.

¹⁵ И мыя́ Авдоно Гилелоскиро чхаво́, Пирафонянино, и гарадо́ сыс дро Пирафоно пэ Ефремо́скири пхув, пэ Амаликоскири бэ́рга.