Сэндарьенгири Лылвари́ 11 - Библия - Пэ Балтитко Романи чиб (Романэс) 2019

Пал Иефаёстэ

¹ Иефаё (Ефаё), Галаадитянино сыс ману́ш муршкано́. Ёв сыс биладжакунэ́-джувля́киро чхаво́; Галаадостыр бия́ндыя Ефаё.

² И Галаадоскири ромны́ бияндя́ лэ́скэ чхавэ́н. Ке́ли выбаринэ ромнякирэ чхавэ́, вытрадынэ́ ёнэ Ефаёс, пхэни́ лэ́скэ: “Ту на сан миштыпэ́н-прилыибнаскиро (наследнико) дро амарэ́-дадэ́скиро кхэр, пал-дова́ со ту сан явирэ-джувля́киро чхаво́.”

³ И настя́ Ефаё пэ́скирэ пшалэ́ндыр, и дживдя́ пэ Товоскири пхув; и скэдынэ́пэ кэ Ефаё балвалитка мануша́ и выджа́нас лэ́са тэ чорэн.

⁴ Пирда́л вари-кицы́ часо Амонитяни гинэ́ марибна́са пэ Израилё.

⁵ Дро часо марибнаскиро ваш Амонитянэнгэ Израилитянэнца, явнэ́ Галаадо́скирэ пхурыдыра́ тэ лэн Ефаёс пхувья́тыр Тов,

⁶ и пхэндлэ́ Ефаёскэ: “Яв, яв амэ́ндэ шэралэса, и пиримарасапэ Амонитянэнца.”

⁷ Ефаё пхэндя́ Галаадо́скирэ пхурыдырэнгэ: “Ци дава́ на тумэ́ на камлэ́ ман и вытрадынэ́ мирэ́-дадэ́скирэ кхэрэ́стыр? Со́скэ явнэ́ кэ мэ какана́, ке́ли тумэ́ сан дрэ би́да?”

⁸ Пхурыдыра́ Галаадо́скирэ пхэндэ Ефаёскэ: “Ваш дова́ амэ акана́ явдя́м кэ ту, соб (кай) ту тэ джас амэ́нца и тэ марэспэ Амонитянэнца, и тэ явэс амэ́ндэ барыдырэ́са ваш сарэ́ Галаадо́скирэ манушэ́нгэ.”

⁹ И пхэндя́ Ефаё Галаадо́скирэ пхурыдырэнгэ: “Ко́ли тумэ́ рискирэна ман, соб (кай) мэ тэ маравпэ Амонитянэнца, и Рай Дэвэ́л отдэ́ла ма́нгэ лэн, то тэды ци ячавапэ мэ тумэ́ндэ барыдырэ́са?”

¹⁰ Пхурыдыра́ Галаадо́скирэ пхэндлэ́ Ефаёскэ: “Мэк тэ явэ́л Рай Дэвэ́л якхитконэса машки́р тумэ́ндэ, со амэ кэра́са пир тыро́ лав!”

¹¹ И гия́ Ефаё пир Галаадо́скирэ пхурыдырэндэ, и чхудэ́ лэс мануша́ пэ пэ́стэ барыдырэ́са и шэралэса, и Ефаё пхэндя́ сарэ́ лава́ пэ́скирэ анги́л Ра́скирэ-Дэвлэ́скиро муй дрэ Маси́фа.

¹² И бичхадя́ Ефаё манушэ́н кэ Амонитянэнгиро кра́ли тэ пхэнэ́л: “Со ту́кэ кэ мэ, со ту явдя́н кэ мэ тэ марэспэ пэ мири́ пхув?”

¹³ Амонитянэнгиро кра́ли пхэндя́ Ефаёскирэ манушэ́нгэ: “Израилё, ке́ли гия́ Египто́стыр, лыя́ мири́ пхув Арноностыр кэ Иавоко и Иорда́но; и адя́кэ ри́скир ла ма́нгэ раманёса (миро́са).”

¹⁴ Ефаё дрэ яви́р мо́ло бичхадя́ манушэ́н кэ Амонитянэнгиро кра́ли,

¹⁵ тэ пхэнэ́н лэ́скэ: “Адя́кэ ракирэ́ла Ефаё: Израилё на лыя́ Моавитянэнгири пхув и Амонитянэнгири пхув;

¹⁶ пал-дова́ со ке́ли амэ гиям Египто́стыр, то Израилё гия́ пэ чхучи́ пхув кэ Лоло́ мо́рё (дэрья́в) и гия́ дрэ Кадесо;

¹⁷ одотхы́р бичхадя́ Израилё манушэ́н кэ Эдомоскиро кра́ли тэ пхэнэ́л: “Дэ во́ля (дозволин) ма́нгэ тэ проджав тыри́ пхув”; нэ Эдомоскиро кра́ли на кандыя́; и кэ Моавититянэнгиро кра́ли ёв бичхадя́, нэ и одова́ на дыя́ лав; палдава́ Израилё яця́пэ дро Кадесо.

¹⁸ И гия́ Израилё чхучэ́ пхувья́са, и прогия́ Эдомоскири пхув и Моавитянэнгири пхув, и, яви пэ Моавитянэнгири пхув пэ васточно риг, тэрдия́ стано́са пал Арноно; нэ на загия́ дрэ Моавитянэнгири рига́, пал-дова́ со Арноно исыс Моавоскири ме́жа.

¹⁹ И бичхадя́ Израилё манушэ́н кэ Сигоно, Амореенгиро кра́ли, Есевоноскиро кра́ли, и пхэндя́ лэ́скэ Израилё: “Дэ во́ля (дозволин) амэ́нгэ тэ проджас тыри́ пхув пэ пэ́скиро штэ́то.”

²⁰ Нэ Сигоно на дыя́ во́ля тэ промэкэл Израилё пир пэ́скирэ рига́, и скэдыя́ Сигоно сарэ́н пэ́скирэ манушэ́н, и тэрдия́ стано́са дрэ Иацо, и мардя́пэ Израилёса.

²¹ И отдыя́ Рай Дэвэ́л, Дэвэ́л Израилёскиро, Сигонос и сарэ́н лэ́скирэ манушэ́н дрэ васта́ Израилёскэ, и ёв домардя́ лэн; и дорэсця́ (долыя) Израилё дро мэкно́ миштыпэ́н (наследиё) сари́ Амореенгири пхув, саво́ дживдя́ пэ доя́ пхув;

²² и дорэснэ́ ёнэ дро мэкно́ миштыпэ́н (наследиё) сарэ́ Аморее́нгирэ рига́ Арноностыр кэ Иавоко и чхучэ́ пхувья́тыр кэ Иорда́но.

²³ И адя́кэ Рай Дэвэ́л, Дэвэ́л Израилёскиро вытрадыя́ Амореёс Пэ́скирэ Израилёскирэ манушэ́нгирэ мо́стыр, а ту камэ́са тэ лэс лэ́скиро мэкно́ миштыпэ́н (наследиё)?

²⁴ Ци нанэ ту́тэ дова́, со дыя́ ту́кэ Хамосо, тыро́ дэвлоро? И амэ́ндэ исын саро́ дова́, со дыя́ амэ́нгэ дро мэкно́ миштыпэ́н Рай Дэвэ́л, амаро́ Дэвэ́л.

²⁵ Нау́што ту фэды́р Валакостыр, Сепфороскирэ чхавэстыр, Моавитянэнгирэ крали́стыр? Ци костяпэ ёв Израилёса, ци мардя́пэ лэ́нца?

²⁶ Израилё дживэ́ла триншэла́ бэрш кэ Есево́но и дрэ фо́рья, савэ́ запасёна лэ́стыр, дро Ароеро и дрэ фо́рья, савэ́ запасёна лэ́стыр, и дрэ сарэ́ фо́рья, савэ́ исын пашы́л Арноно; ваш со тумэ́ дрэ дова́ часо на отлынэ лэн?

²⁷ А мэ на сом банго́ анги́л ту́тэ, и ту кэрэ́са ма́нгэ фуипэ́н, выгии проти ма́ндэ марибна́са. Рай Дэвэ́л, Сэнда́ри, мэк тэ явэ́л какана́ сэндариса машки́р Израилёскирэ чхавэ́ндэ и машки́р Амонитянэндэ!”

²⁸ Нэ Амонитянэнгиро кра́ли на шундя́ Ефаёскирэ лава́, савэ́нца ёв бичхадя́ кэ ёв.

²⁹ И сыс пэ Ефаёстэ Дэвлэ́скиро Ду́хо (Фа́но), и прогия́ ёв Галаа́до и Мана́сия, и прогия́ ёв Галаадоскири Маси́фа, и Галаадо́скирэ Масифатыр гия́ кэ Амонитяни.

³⁰ И дыя́ Ефаё совэ́л Ра́скэ-Дэвлэ́скэ и пхэндя́: “Ко́ли Ту отдэса Амонитянэн дрэ мирэ́ васта́,

³¹ то тэды пир миро рисибэн раманёса (миро́са) Амонитянэндыр, со выджа́ла мирэ́ кхэрэ́скирэ вударэндыр пэ стреч ма́нгэ, явэ́ла Ра́скэ-Дэвлэ́скэ, и мэ яна́ва дава́ пэ цэ́ло схачкирибэ́н.”

³² И явдя́ Ефаё кэ Амонитяни – тэ марэ́лпэ лэ́нца, и отдыя́ лэн Рай Дэвэ́л дрэ лэ́скирэ васта́;

³³ и домардя́ ёв лэн древа́н барэ́ марибна́са, Ароеростыр кэ Минифа биш фо́рья, и кэ Авель-Керамима, и Амонитяни поддынэпэ анги́л Израилёскирэ чхавэ́ндэ.

³⁴ И явдя́ Ефаё дрэ Маси́фа дро пэ́скиро кхэр, и ґа́да, лэ́скири чхай выджа́ла гил лэ́скэ бубноса и кхэлыбнаса; ёй сыс лэ́стэ екх, и на сыс лэ́стэ буты́р ни чхавэ́с, ни чха.

³⁵ Ке́ли ёв дыкхця́ ла, роскустя пэ́скири и́дя и пхэндя́: “Ах, мири́ чхай! Ту домардян ман; и ту сан дрэ чысло одолэнца, савэ́ пхагирдэ́ рама́нё (миро) мирэ́ джиибна́скиро! Мэ отчхакирдём пал ту́тэ мирэ́ ушта́ анги́л Растэ-Дэвлэ́стэ, и мэ на могина́ва тэ отпхэнавпэ.”

³⁶ Ёй пхэндя́ лэ́скэ: “Миро да́до! Ту отчхакирдян тырэ́ ушта́ анги́л Растэ-Дэвлэ́стэ – и кэр ма́нца дова́, со пхэндлэ́ тырэ́ ушта́, ке́ли Рай Дэвэ́л кэрдя́ пир ту́тэ заводо (отомстиныбэн) тырэ́ вэргэ́нгэ Амонитянэнгэ.”

³⁷ И пхэндя́ ёй пэ́скирэ дадэ́скэ: “Кэр ма́нгэ, екх, ґа́да со: отмэк ман пэ дуй чхона́; мэ джа́ва, джа́ва упрэ́ пэ бэ́рги, и мэ обровава миро чхаитко мирэ́ малненца.”

³⁸ Ёв пхэндя́: “Джа́.” И отмэкхця ла пэ дуй чхона́. Ёй гия́ пэ́скирэ малненца, и оброндя пэ́скиро чхаитко дрэ бэ́рги.

³⁹ Пир дуенгирэ-чхонэнгиро прогиибэн, ёй рисия́ кэ пэ́скиро дад, и ёв кэрдя́ пэ ла́тэ совэ́л пэ́скири, сави́ дыя́, и ёй на уджиндя́ ромэс. И загия́ дава́ дро обычаё (присыкляибэн) Израилё.

⁴⁰ Со кажно бэрш Израилёскирэ чхая́ псирдэ́ тэ обровэн Ефаёскирэ-Галаадитяниноскирья чха штар дывэса́ дро бэрш.