Сэндарьенгири Лылвари́ 10 - Библия - Пэ Балтитко Романи чиб (Романэс) 2019

Пал Фоластэ

¹ Коригэды́р (позжэ) Авимелехостэ ґаздыя́пэ ваш Израилёс-киро зракхибэ́н о Фола (Тола), Фуискиро чхаво́, Додовоскиро-чхавэ́скиро, Исахароскирэ родыцо́стыр. Ёв дживдя́ кэ Шамиро пэ Ефремо́скири бэ́рга.

² Ёв сыс Израилёскирэ сэндариса биш тэ трин бэрш, и мыя́, и гарадо́ сыс дрэ Шамиро.

³ Коригэды́р (позжэ) лэ́стэ ґаздыя́пэ Иаиро Галаадостыр и сыс Израилёскирэ сэндариса биш тэ дуй бэрш.

⁴ Лэ́стэ сыс трия́нда (триндэша) чхавэ́, савэ́ традэнас пэ триндэшэ тэрнэн ослэндэ, и триндэша фо́рья сыс лэ́ндэ; лэн кэ дава́ дывэ́с кхарэ́на Иаироскирэ гавэнца, со исын пэ Галаадоскири пхув.

⁵ И мыя́ Иаиро, и гарадо́ сыс дро Камоно.

Израилё исын Нэвэ́с Притасадо

⁶ Израилёскирэ чхавэ́ дурэды́р кэрдэ́ фуипэ́н анги́л Ра́скирэ-Дэвлэ́скирэ якха́ и дынариндлэ́ Ваалэнгэ и Астартэнгэ, и Арамейсконэ дэвлорэ́нгэ, и Сидонсконэ дэвлорэ́нгэ, и Моавитсконэ дэвлорэ́нгэ, и Амонитсконэ дэвлорэ́нгэ, и Филистимсконэ дэвлорэ́нгэ; и ячкирдэ́ Рас-Дэвлэ́с и на дынариндлэ́ Лэ́скэ.

⁷ И захачи́я Ра́скирэ-Дэвлэ́скири холы́ пэ Израилё, и Ёв отдыя́ лэн дрэ Филистимлянэнгирэ васта́ и Амонитянэнгирэ васта́.

⁸ Ёнэ тасадэ и мэнчындлэ Израилёскирэ чхавэ́н долэ́ бэршэстыр дэшуохто (бидуе́нгиро биш) бэрш, сарэ́н Израилёскирэ чхавэ́н пир доя́ Иорданоскири риг пэ Амореенгири пхув, сави́ сыс дрэ Галаа́до.

⁹ Пэ ко́нцо (яго́ро) Амонитяни пиригинэ́ Иорда́но, соб (кай) тэ лыджа́н марибэ́н Юдаса и Вениаминоса и Ефремо́скирэ кхэрэса, и древа́н (збит) тясно сыс Израилёскирэ чхавэ́нгэ.

¹⁰ И задынэ го́дла Израилёскирэ чхавэ́ кэ Рай Дэвэ́л, и ракирдэ́: “Кэрдя́м амэ грэ́хо анги́л Ту́тэ, пал-дова́ со ячкирдям амарэс Дэвлэ́с и дынариндям Ваалэнгэ.”

¹¹ И пхэндя́ Рай Дэвэ́л Израилёскирэ чхавэ́нгэ: ци на притасавэнас тумэн Египтя́ни, и Амореи, и Амонитяни, и Филистимля́ни,

¹² И Сидоняни, и Амаликитяни, и Моавитяни, и, ке́ли тумэ́ годлынэ кэ Мэ, ци на зракхцём Мэ тумэн лэ́нгирэ вастэ́ндыр?

¹³ А тумэ́ ячкирдэ́ Ман и лынэ́ тэ дынаринэ́н явирэ дэвлорэ́нгэ; пал-дова́ Мэ на ява́ва буты́р тэ зракхав тумэн;

¹⁴ джа́н, годлэн кэ дэвлорэ́, савэ́н тумэ́ выкэдынэ́, мэк ёнэ тэ зракхэн тумэн дро пхаро́ ваш тумэ́нгэ часо.

¹⁵ И пхэндлэ́ Израилёскирэ чхавэ́ Ра́скэ-Дэвлэ́скэ: “Кэрдя́м грэ́хо амэ; кэр амэ́нца саро́, со Ту́кэ исын пир годы́, екх зра́кх амэн акана́.”

¹⁶ И отчхурдынэ пэ́стыр явирэ дэвлорэ́, и лынэ́ тэ дынаринэ́н Ра́скэ-Дэвлэ́скэ. И на вырикирдя Лэ́скиро ди Израилёскирэ мэ́ньки.

¹⁷ Амонитяни скэдынэ́пэ и тэрдинэ́ стано́са дро Галаа́до; скэдынэ́пэ адя́кэ-паць Израилёскирэ чхавэ́ и тэрдинэ́ стано́са дрэ Маси́фа.

¹⁸ Мануша́ и тхага́рья Галаадо́скирэ пхэндлэ́ екх екхэ́скэ: “Кон зачнинэла марибэ́н проти Амонитянэндэ, одова́ явэ́ла барыдырэ́са пэ сарэ́ Галаадсконэ манушэ́ндэ.”