Сэндарьенгири Лылвари́ 1 - Библия - Пэ Балтитко Романи чиб (Романэс) 2019

О Юда и о Симеоно (Семёно) Заухтылэна Ханаано

¹ Сыр Ису́со (Ёхошуа́) мыя́, то Израилёскирэ чхавэ́ пхучэнас Ра́стыр-Дэвлэ́стыр, ракири́: “Кон амэ́ндыр англэды́р джа́ла пэ Хананеендэ – тэ марэ́лпэ лэ́нца?”

² И пхэндя́ Рай Дэвэ́л: “О Юда джа́ла, ґа́да, Мэ пиридава пхув дрэ лэ́скирэ васта́.”

³ О Юда пхэндя́ Симеоноскэ (Симёноскэ), пэ́скирэ пшалэ́скэ: “Заджа́ ма́нца дро миро жре́биё, и амэ ява́са тэ мараспэ Хананеенца; и мэ заджава дро тыро́ жре́биё ту́са.” И гия́ лэ́са Симеоно.

⁴ И гия́ Юда, и отдыя́ Рай Дэвэ́л Хананеен и Ферезеен дрэ лэ́нгирэ васта́, и замардэ́ ёнэ лэ́ндыр дэш бара́ (тысёнцы) манушэ́н дрэ Везека.

⁵ Дрэ Везека ёнэ стрэниндлэпэ Адони-Везекоса, мардэ́пэ лэ́са и домардэ́ Хананеен и Ферезеен.

⁶ Адони-Везеко настя́; нэ ёнэ традынэпэ пал лэ́стэ, и ухтылдэ́ лэс, и отчингирдэ барэ́ ангушта (пальцы) пэ лэ́скирэ васта́ и пэ лэ́скирэ ґэра́.

⁷ Тэды пхэндя́ о Адони-Везеко: “Эфтадэша́ кра́лья отчингирдэ барэ́ ангуштэнца пэ лэ́нгирэ васта́ и ґэра́ скэдынэ́ крошки тэл миро сками́нд, сыр кэрдём мэ, адя́кэ и ма́нгэ дыя́ Дэвэ́л.” И яндлэ́ лэс дро Ерусалимо, и ёв мыя́ одо́й.

⁸ И гинэ́ марибна́са Юда́скирэ чхавэ́ проти Ерусалимо, и лынэ́ лэс, и домардэ́ лэс куртала́са, и фо́ро отдынэ́ ягакэ.

⁹ Пало́ (после) дава́ гинэ́ Юда́скирэ чхавэ́ тэ марэ́нпэ Хананеенца, савэ́ дживдэ́ пэ бэ́рги и пэ паш-дывэсы́тко (полуденно) пхув и пэ тэлатунэ́ штэ́ты.

¹⁰ И гия́ Юда пэ Хананеендэ, савэ́ дживдэ́ кэ Хевро́но (лав Хевроноскэ сыс англэды́р Кири́аф-Арба), и домардэ́ Шэшаёс, Ахиманос и Фалмаёс.

¹¹ Одотхы́р гия́ ёв пэ Давироскирэ манушэ́ндэ; лав Давироскэ сыс англэды́р Кири́аф-Сеферо.

¹² И пхэндя́ о Халево: “Кон домарла Кири́аф-Сеферо и лэ́ла лэс, одолэ́скэ отда́ва мэ Ахса, мирья чха, палоро́м.”

¹³ И лыя́ лэс Гофониило, Кеназаскиро чхаво́, тыкнэдыршонэ-Халевоскирэ пшалэ́с, и Халево отдыя́ дрэ ромня́ (ромня́тэ) лэ́скэ Ахсака, пэскирья́ чха.

¹⁴ Ке́ли явдя́ часо тэ джал, то Гофониило высыклякирдя ла тэ мангэ́л ла́кирэ дадэ́стыр фэ́лда, и ёй згия ослостыр. Халево пхэндя́ ла́кэ: “Со ту́кэ трэй?”

¹⁵ Э Ахса пхэндя́ лэ́скэ: “Дэ ма́нгэ бахтякирибэ́н; ту дыя́н ма́нгэ паш-дывэсы́тко (полудённо) пхув, дэ ма́нгэ и тхадыпэн панескиро.” И дыя́ ла́кэ Халево упратунэ панескирэ ґанынга́ (колодцы) и тэлатунэ́ панескирэ ґанынга́.

¹⁶ И Иофороскирэ-Кенеяниноскирэ чхавэ́, Мойза́скирэ састрэскирэ, гинэ́ форо́стыр Пальм Юда́скирэ чхавэ́нца пэ Юдаскири чхучи́ пхув, сави́ исын пэ паш-дывэ́с (пэ юго) Арадостыр, и явнэ́ и лынэ́ тэ дживэ́н машки́р манушэ́ндэ.

¹⁷ И гия́ Юда Симёноса, пэ́скирэ пшалэса, и домардэ́ Хананеен, савэ́ дживдэ́ кэ Цэфафо, и отдынэ́ лэ прокошыбнаскэ, и долэ́стыр кхарэ́лапэ дава́ фо́ро Хорма.

¹⁸ Юда лыя́ адя́кэ-паць Газа, ла́кирэ ригэнца, Аскалоно, лэ́скирэ ригэнца, и Екроно, лэ́скирэ ригэнца.

¹⁹ О Рай Дэвэ́л сыс Юдаса, и ёв заухтылдя бэ́рга; нэ манушэ́н долостыр на могиндя́ тэ протрадэл, пал-дова́ со лэ́ндэ сыс саструнэ́ марибны́тка вурдэна́.

²⁰ И отдынэ́ ёнэ Халевоскэ Хевро́но, сыр ракирдя́ о Мо́йза, и вытрадыя́ ёв одотхы́р тринэн Енакоскирэ чхавэ́н.

²¹ Нэ Евусеен, савэ́ дживдэ́ кэ Ерусалимо, Вениамино́скирэ чхавэ́ на вытрадынэ́, и дживэ́на Евусеи Вениамино́скирэ чхавэ́нца кэ Ерусалимо кэ дава́ дывэ́с.

²² И Иосифо́скирэ чхавэ́ гинэ́ адя́кэ-паць пэ Вефи́лё, и Рай Дэвэ́л сыс лэ́нца.

²³ И выдыкхэнас Иосифо́скирэ чхавэ́ Вефи́лё (лав англэды́р сыс фороскэ Лузо).

²⁴ И дыкхнэ́ ракхибна́рья манушэ́с, саво́ гия́ форо́стыр, и пхэндлэ́ лэ́скэ: “Сыка́в амэ́нгэ тэ заджас дро фо́ро, и амэ сыкаваса ту́кэ тангипэ́н.”

²⁵ Ёв сыкадя́ лэ́нгэ дрэ фо́ро загиибэ́н, и домардэ́ ёнэ фо́ро куртала́са, адалэ́ манушэ́с и саро́ лэ́скиро ро́до отмэкнэ.

²⁶ Дава́ ману́ш гия́ пэ Хетеенгири пхув, и чхудя́ фо́ро, и дыя́ лэ́скэ лав Лузо. Дава́ лэ́скиро лав исын кэ дава́ дывэ́с.

²⁷ И Мана́сия на вытрадыя́ манушэ́н, савэ́ дживдэ́ кэ Бефсано и дрэ фо́рья, савэ́ запасёна лэ́стыр, кэ Фаанаха и дрэ фо́рья савэ́ запасёна лэ́стыр, манушэ́н, савэ́ дживэ́на кэ Дора и дрэ фо́рья, савэ́ запасёна лэ́стыр, манушэ́н Ивлеамостыр и, савэ́ запасёна лэ́стыр фо́рья, манушэ́н, савэ́ дживэ́на кэ Мегидоно и, савэ́ запасёна лэ́стыр фо́рья, и ячнэ́пэ Хананеи тэ дживэ́н пэ доя́ пхув.

²⁸ Ке́ли Израилё явдя́ дрэ зор, то тэды кэрдя́ ёв Хананеен андынаршчыкэнца (даникэнца), нэ тэ вытрадэл лэн, на вытрадыя́.

²⁹ И Ефре́мо на вытрадыя́ Хананеен, савэ́ дживдэ́ кэ Газеро, и дживдэ́ Хананеи машки́р лэ́ндэ кэ Газеро.

³⁰ И Завулоно на вытрадыя́ манушэ́н, савэ́ дживдэ́ кэ Китроно и манушэ́н, савэ́ дживдэ́ кэ Наглоло, и дживдэ́ Хананеи машки́р лэ́ндэ и плэскирдэ лэ́нгэ дань.

³¹ И Асиро на вытрадыя́ манушэ́н, савэ́ дживдэ́ кэ Акко и манушэ́н, савэ́ дживдэ́ кэ Сидоно, и кэ Ахлаво, кэ Ахзиво, кэ Хелва, кэ Афеко, и кэ Рехово.

³² И дживдя́ Асиро машки́р Хананеендэ, манушэ́ндэ, савэ́ дживдэ́ пэ доя́ пхув, пал-дова́ со ёв на вытрадыя́ лэн.

³³ И Нефалимо на вытрадыя́ манушэ́н, савэ́ дживдэ́ кэ Вефсамисо и манушэ́н, савэ́ дживдэ́ кэ Бефанафо, и дживдя́ машки́р Хананеендэ, манушэ́ндэ, савэ́ дживдэ́ пэ доя́ пхув; мануша́, савэ́ дживдэ́ кэ Вефсамиса и кэ Бефанафа сыс лэ́скирэ андынаршчыки (данники).

³⁴ И стасадэ Амореи Дано́скирэ чхавэ́н дрэ бэ́рги, пал-дова́ со на дынэ́ лэ́нгэ тэ зджан пэ до́ло.

³⁵ И ячнэ́пэ Амореи тэ дживэ́н пэ бэ́рга Хересо, дрэ Аиалоно и Шаалвима; нэ васт Иосифо́скирэ-чхавэ́нгиро пиризорьякирдя Амореен, и кэрдэ́ ёнэ лэн андынаршчыкэнца (даникэнца).

³⁶ Аморее́нгирэ-межакирэ рига́ бэргицатыр Акравимо и Селатыр тырдэласпэ и дурыдыр.