Ruta 4 - Библия - Пэ Балтитко Романи чиб (Романэс) 2019

¹ Воозо выгия́ кэ по́рта и бэстя́ одо́й. И ґа́да, джа́ла маму́й сэмэ́нца, пал савьятэ ракирдя́ Воозо. И пхэндя́ лэ́скэ Воозо: “Заджа́ адари́к и бэш ада́й.” Одова́ загия́ и бэстя́.

² Воозо лыя́ форо́скирэ пхурыдырэндыр дэш манушэ́н и пхэндя́: “Бэшэ́н ада́й.” Одолэ́ загинэ́ и бэшнэ́.

³ И пхэндя́ Воозо сэмэнцакэ: “Ноэминь, сави́ рисия́ Моавито́скирэ фэлдэндыр, бикнэла фэлдакири паш, сави́ сыс амарэ́ пшалэскири Елимелехоскири;

⁴ мэ скэдыёмпэ тэ долыджав кэ тырэ́ кана́ и тэ пхэна́в: кин анги́л манушэ́ндэ, савэ́ исын бэштэ́ ада́й и анги́л мирэ́ манушэ́нгирэ пхурыдырэндэ. Ко́ли ту камэс тэ выкинэс, выкин; а ко́ли на камэ́са тэ выкинэс, пхэн ма́нгэ, и мэ ява́ва тэ джина́в; пал-дова́ со апри́ч ту́тэ нанэ конэ́скэ тэ выкинэн, а пир ту́тэ мэ.” Одова́ пхэндя́: “Мэ выкинава.”

⁵ Воозо пхэндя́: “Ке́ли ту кинэса Ноэминьятыр фэ́лда, тэды трэй тэ кинэс и Рутатыр Моавитянкатыр, мулэскирэ ромнятыр, и трэй тэ лэс ла палоро́м, соб (кай) тэ рискирэс мулэскиро лав дрэ лэ́скирэ миштыпна́скири ме́ра.”

⁶ И пхэндя́ одоя сэмэ́нца: “На могина́ва мэ тэ лав ла пэ́скэ, соб (кай) тэ на роскэрав пэ́скири миштыпна́скири ме́ра; прилэ́ ла ту, пал-дова́ со мэ на могинав тэ прилав.”

⁷ Англэды́р сыс дасаво присыкляибэн (обычаё) дро Израилё, сыр выкинэна и сыр парувэна, ваш вари-саво́ рэндоскиро подрикирибэ́н: екх злэла пэ́скири тырах и дэ́лас явирэскэ, и дава́ сыс Израилёстэ якхитконэса.

⁸ И пхэндя́ доя́ сэмэ́нца Воозоскэ: “Кин пэ́скэ.” И злыя́ пэ́скири тырах.

⁹ И пхэндя́ Воозо пхурыдырэнгэ и сарэ́ манушэ́нгэ: “Тумэ́ сан какана́ якхи́тка долэ́скэ, со мэ кинава Ноэминьятыр саро́ Елимелехоскиро и саро́ Хилеоноскиро и Махлоноскиро;

¹⁰ адя́кэ-паць и Рута Моавитянка, Махлоноскирья ромня́, мэ ла́ва палоро́м, соб (кай) тэ ячкирав мулэскиро лав дрэ лэ́скирэ миштыпна́скири ме́ра, и соб (кай) тэ на хасёл мулэскиро лав машки́р лэ́скирэ пшалэ́ндэ и пашы́л лэ́скирэ штэтоскирэ вудара́: тумэ́ сан ададывэ́с якхи́тка далэскэ.”

¹¹ И пхэндлэ́ сарэ́ мануша́, савэ́ сыс пашы́л вудара́, и пхурыдыра́: “Амэ сам якхи́тка, мэк тэ создэл Рай Дэвэ́л ромня́, сави́ заджа́ла дро тыро́ кхэр, сыр Рахи́ль и сыр Лия, савэ́ дуйджинэ́ счхудэ Израилёскиро кхэр; скэ́дэ барвалыпэ́н дро Ефрафо, и мэк тэ славинэлпэ тыро́ лав дро Вифлее́мо;

¹² и мэк тэ явэ́л тыро́ кхэр, сыр Фаресо́скиро кхэр, савэ́с бияндя́ Фамарь Юда́скэ долэ́ родо́стыр, саво́ дэ́ла ту́кэ Рай Дэвэ́л адалэ́ тэрнэ́ джувлятыр.”

¹³ И лыя́ Воозо Рута, и ёй кэрдя́пэ лэ́скирэ ромня́са. И загия́ ёв кэ ёй, и Рай Дэвэ́л дыя́ ла́кэ тэ пхарьёл и ёй бияндя́ чхавэ́с.

¹⁴ И ракирдэ́ джувля́ Ноэминьякэ: “Тэ явэ́л бахтякирдо́ Рай Дэвэ́л, со Ёв на ячкирдя́ какана́ тут би прилыибнаскирэс пэ миштыпэ́н (наследникоскиро!) И мэк тэ явэ́л славу́тно лэ́скиро лав дро Израилё!

¹⁵ Ёв явэ́ла ту́кэ радыма́са и чараибнариса ваш тыро́ пхурипэн, пал-дова́ со лэс бияндя́ тыри́ бори, савьякэ исын дро́го ту, сави́ ваш ту́кэ фэды́р сыр эфта́ чхавэ́.”

¹⁶ И лыя́ Ноэминь адалэ́ тыкнэмасэс (биято́с), и лыджия́ лэс дро пэ́скиро облыибэн (ангаля), и сыс лэ́скэ нянькаса.

¹⁷ Пашатунэ́ (суседки) дынэ́ лэ́скэ лав и ракирдэ́: “Ноэминьятэ бия́ндыя чхаво́”, и дынэ́ лэ́скэ лав: Овидо. Ёв исын Есеёскиро дад, Давидо́скирэ дадэ́скиро.

¹⁸ И ґа́да, исын ро́до Фаресо́скиро: Фаресостыр бия́ндыя Есромо;

¹⁹ Есромостыр бия́ндыя Ара́мо; Арамостыр бия́ндыя Аминада́во;

²⁰ Аминадавостыр бия́ндыя Наасо́но; Наасоностыр бия́ндыя Салмо́но;

²¹ Салмоностыр бия́ндыя Воозо; Воозостыр бия́ндыя Овидо;

²² Овидостыр бия́ндыя Есеё; Есеёстыр бия́ндыя Дави́до.