Ruta 1 - Библия - Пэ Балтитко Романи чиб (Романэс) 2019

¹ Дрэ долэ́ дывэса́, ке́ли хулаиндлэ сэнда́рья, яця́ бокх пэ пхув. И гия́ екх ману́ш Юдэя́кирэ Вифлеимостыр, пэ́скирэ ромня́са и пэ́скирэ дуе чхавэ́нца тэ дживэ́л пэ Моавитоскирэ фэ́лды.

² Лав одолэ́-Манушэ́скиро сыс Елимелехо, лав лэ́скирэ ромнякиро сыс Ноэминь, а лав лэ́скирэ дуенгирэ чхавэ́нгиро сыс Махлоно и Хилеоно; ёнэ сыс Ефрафяни Юдэя́кирэ Вифлеемостыр. И явнэ́ ёнэ пэ Моавитоскирэ фэ́лды, и ячнэ́пэ одо́й.

³ И мыя́ Елимехо, Ноэминьякиро ром, и яця́пэ ёй дуе пэскирэнца чхавэ́нца.

⁴ Ёнэ лынэ́ пэ́скэ джувле́н Моавитянкэндыр, екхакиро лав сыс э Орфа, а явирьякиро лав сыс Руфь (Рута́), и дживдэ́ одо́й пашы́л дэш бэрш.

⁵ Нэ коригэды́р (после) и дуй ла́кирэ чхавэ́, Махлоно и Хилеоно, мынэ́, и яця́пэ доя́ джувлы́ би пэ́скирэ дуе-чхавэ́нгиро и би пэ́скирэ-ромэскиро.

⁶ И уштыя́ ёй пэ́скирэ борьенца, и гия́ палэ Моавито́скирэ фэлдэндыр, пал-дова́ со ёй шундя́ пэ Моавито́скирэ фэ́лды со Дэвэ́л порисия кэ Пэ́скирэ мануша́ и дыя́ лэ́нгэ маро́.

⁷ И выгия́ ёй долэ́ штэто́стыр, пэ саво́ дживдя́, и дуй борья ла́кирэ ла́са. Ке́ли ёнэ гинэ́ пир дром, рисёви пэ Юдэякири пхув,

⁸ то Ноэминь пхэндя́ дуенгэ пэ́скирэ борьенгэ: “Джа́н, рисён кажно дрэ пэ́скирэ-да́киро кхэр; мэк тэ кэрэ́л Рай Дэвэ́л тумэ́нца тангипэ́н, сыр тумэ́ обгинэпэ мулэнца и ма́нца!

⁹ Мэк тэ дэл тумэ́нгэ Рай Дэвэ́л, соб тумэ́ тэ латхэ́н джиибэ́н кажно дрэ пэ́скирэ-ромэскиро кхэр!” И чамудя лэн. Нэ ёнэ ґаздынэ́ го́дла и рондлэ́

¹⁰ и пхэндлэ́: “Над, амэ ту́са рисёваса кэ тырэ́ мануша́.”

¹¹ Ноэминь пхэндя́: “Рисён, мирэ́ чхаялэ; пал со тумэ́нгэ тэ джа́н ма́нца? Нау́што буты́р исын ма́ндэ чхавэ́ дрэ мирэ́ маса́, савэ́ тэ явэ́н бы тумэ́нгэ ромэнца?

¹² Рисён, мирэ́ чхаялэ, джа́н, пал-дова́ со мэ сом пхури, соб (кай) тэ явав палоро́м. Мэк, ко́ли б мэ и пхэндём: ‘Исын ма́нгэ буты́р наде́я”, и усае́кх, ко́ли бы мэ дая́-паць рат тэ явав ромэса и коригэды́р (позжэ) тэ биянав чхавэ́н, –

¹³ тэды ци сашты́ тумэ́нгэ тэ ужакирэн, пака ёнэ выбарьёна? Ци сашты́ тумэ́нгэ тэ тырдэн и тэ на выджа́н палоро́м? Над, мирэ́ чхаялэ, мэ древа́н пиридживава пал тумэ́ндэ, пал-дова́ со Ра́скирэ-Дэвлэ́скиро васт латхя́ ман.”

¹⁴ Ёнэ ґаздынэ́ го́дла и нэвэ́стыр лынэ́ тэ ровэ́н. И Орфа розяцяпэ пэ́скирэ сасяса, а Рута яця́пэ ла́са.

¹⁵ Ноэминь пхэндя́ Рутакэ: “Ѓа́да, тыри́ бори рисия́ кэ пэ́скирэ мануша́ и кэ пэ́скирэ дэвэла́; рисёв и ту пала́л пал тырэ́ борьятэ.”

¹⁶ Нэ Рута пхэндя́: “На зачхув ман тэ ячкирав тут и тэ рисёвав ту́тыр; нэ карик ту джа́са, одори́к и мэ джа́ва, и кай ту явэ́са тэ дживэ́с, одо́й и мэ ява́ва тэ джива́в; тырэ́ мануша́ явэ́на мирэ́ манушэ́нца, и тыро́ Дэвэ́л – мирэ́ Дэвлэ́са;

¹⁷ и кай ту мэрэ́са, одо́й и мэ мэра́ва и ява́ва гарады; мэк дова́ и дова́ тэ кэрэ́л ма́нгэ Рай Дэвэ́л, и ишчо (инкэ́) буты́р кэрэ́ла; екх мэрибэ́н ман розячкирэла ту́са.”

¹⁸ Ноэминь, дыкхи́, со ёй древа́н скэдыяпэ тэ джал ла́са, пирияця́ тэ уракирэл ла.

¹⁹ И гинэ́ ёнэ дуйджинэ́, пака явнэ́ дро Вифлее́мо. Ке́ли ёнэ явнэ́ дро Вифлее́мо, саро́ фо́ро заракирдя пал лэ́ндэ, и ракирдэ́: “Акэ, Ноэминь?”

²⁰ Ёй пхэндя́ лэ́нгэ: “На кхарэ́н ман Ноэминьяса, а кхарэ́н ман Мараса, пал-дова́ со Сарэзорьякирэ бичхадя́ ма́нгэ баро́ киркипэн;

²¹ мэ выгиём адатхы́р барвалыпнаса, а рискирдя́ ман Рай Дэвэ́л чхучэ́ вастэ́нца. Со́скэ тэ кхарэ́н ман Ноэминьяса, ке́ли Рай Дэвэ́л зачхудя ман тэ страдынав, и Сарэзорья́киро бичхадя́ ма́нгэ би́да?”

²² И рисия́ Ноэминь, и ла́са ла́кири бори Рута Моавитянка, сави́ явдя́ Моавито́скирэ фэлдэндыр, и явнэ́ ёнэ дро Вифлее́мо пэ ко́нцо (яго́ро) дро гивэскиро укэдыибэн.