Roiben 4 - Библия - Пэ Балтитко Романи чиб (Романэс) 2019

Шта́рто Роибэн: Сионоскиро Пэрибэн

¹ Сыр калыя сувнака́й! Сыр парудыя жужо́ сувнака́й! Бара́ свэнтонэ́ штэто́стыр росчхурдынэ пир кажно вэнгло, кай га́сы розджана.

² Дро́га Сионоскирэ чхавэ́, савэ́ исын мол сыр жужо́ сувнака́й, сыр да лэ́нгэ дэ́на паты́в сы́рбы ґлэякирэ судинкэнгэ, со кэрдя́ кучикэнгиро (горшэчнико).

³ Аж и рупучи [чудовишчы / шакалихи-ю.о.] дэ́на цюця тэ чаравэн пэ́скирэ тыкнэн, нэ мирэ́ – манушэ́нгирэ чхая́ ячнэ́ пхарэ́-илэ́скирэ сы́рбы страусы чхучэ́ прахэндыр.

⁴ Тыкнэ́-масэнгири чибори ухтылэлапэ зоралэ́с пал талой дро лэ́нгиро муёро, сыр камэ́на пани́: тыкнэ́ бияты мангэна маро́, нэ ние́кх на пхагирэ́ла (на дэ́ла) котэроро лэ́нгэ.

⁵ Кодолэ́, кон хая дэликатэсы, исын на́бут со джидэ́ пэ вули́цы (пэ га́сы); кодолэ́, конэ́с барьякирдэ́ дро лоло́ плашчо, облэна кучы ґнэё.

⁶ Пхаро́-сэндякирибэн пал чорипэ́н, со кэрдэ́ мирэ́-манушэ́нгирэ чхая́, исын зоралэды́р пхарэ́-сэндякирибнастыр, со дорэснэ́ пал Содомоскиро грэ́хо. Дова́ фо́ро сыс радо тэлэ́ пал екх мэнта (минута) адя́кэ, со ние́кх на дыя́ ра́да тэ подэл васт.

⁷ Ерусалимо́скирэ тхага́рья сыс яснэдыр ивэстыр и парнэдыр тхудэстыр; ёнэ сыс лоликанэдыр, дрэ маса́ рубинэндыр; ёнэ выдыцёнас сы́рбы сапфиры.

⁸ Какана́ ёнэ выдыцёна калэдыр бовэскирэ мэлятыр, ёнэ джа́на пир га́сы, лэн на пинджкирэна. Лэ́нгири цы́па ухтылэлапэ зоралэ́с кэ лэ́нгирэ кокалы́, ёй вышутия и яця́ сыр кашт.

⁹ Кодолэнгэ, конэ́с мулякирдэ́ куртала́са, исын бахталэдыр адалэндыр, савэ́ мэрэ́на бокха́тыр. Пал-дова́ со ёнэ нашавэна поволинькэс (ле́нтэс) зор и клёко, пир дова́, со на ухтылэ́ла (на́доси) фэлды́тка аплоды.

¹⁰ Васта́ лачхэ́-илэ́скирэ джувле́н кэрадэ пэ́скирэ биятэ́н: ёнэ сыс мас лэ́нгэ, ке́ли пыя́ бэдыпэн пэ Ерусалимо́скирэ манушэ́ндэ.

¹¹ Рай Дэвэ́л выпхэрдякирдя пэ́скири бари холы́, Ёв вычхудя́ Пэ́скирэ-холякири яг. Ёв хачкирдя́ яг пэ Сио́но, и ёй похая сарэ́са форо́скирэ фундаменты.

¹² Кра́лья пэ пхув и сарэ́ джиибнарья пэ свэ́то на патяндынэ́, со намал и вэ́рго заджа́ла дрэ Ерусалимо́скири по́рта, –

¹³ саро́ дава́ пал форо́скирэ пророкэ́ндэ и пал лэ́нгиро – раша́нгиро чорипэ́н, кон прочхудэ чачунэ́ – манушэ́нгиро рат машки́р дава́ фо́ро.

¹⁴ Ёнэ псирдэ́ сыр корорэ́ пир га́сы, енэ магирдэ́ пэс ратэ́са адя́кэ, со ниекхэ манушэ́скэ сыс нашты́ тэ чилавэл лэ́нгирэ и́ди.

¹⁵ Мануша́ дэ́нас го́дла пэ лэ́ндэ: “Джа́н криг, магирдэ́! Джа́н криг! Джа́н криг! Джа́н! На чилавэн амэн.” Сыр ёнэ псирдэ́ трусця́л Наюдэ́ндэ, исыс пхэндло́ машки́р лэ́ндэ: “Ёнэ на дживэ́на буты́р ада́й!”

¹⁶ Ра́скирэ-Дэвлэ́скири холы́ роскэрдя́ лэн пэ паша́. Ёв на явэ́ла тэ кэрэ́л паты́в лэ́нгэ. Нико́н на кутякирдя ни раша́н, ни сыкадя́ ла́ска кэ годэпхурэ́.

¹⁷ Амарэ́ якха́ кхинынэ тэ дыкхэ́н ивья́ (дармэс), со вари-кон подэла васт амэ́нгэ. Амэ дыкхцям амарэ́ вучардятыр (башнятыр) пал манушэ́ндэ, савэ́ на дынэ́ ра́да тэ зракхэн амэн.

¹⁸ Амарэ́ вэ́рги традынэпэ пал амэ́ндэ пир амарэ́ шпэры (сляды), со амэ на могиндям тэ джас яври́ пэ га́са. Амаро́ ко́нцо (яго́ро) исын пашы́л, амарэ́ дывэса́ сыг кончынэнапэ, пал-дова́ со явдя́ амари́ хась.

¹⁹ Амарэ́ шалэ сыс сыгэды́р кидэндыр (орлэндыр) пэ болыбэ́н, енэ традынэпэ пал амэ́ндэ дрэ бэ́рги; ёнэ ужакирдэ чораханэ́с амэн пэ чхучэ́ прахи.

²⁰ Амарэ́ крали́с, саво́ исын сы́рбы маро́ дрэ амаро́ джиибэ́н, конэ́с Рай Дэвэ́л помакхця сыр крали́с, ухтылдэ́ дрэ лэ́нгирэ ганбиня. Пал лэ́стэ амэ пхэндям: “Амэ ява́са тэ джива́с машки́р Наюдэ́ндэ тэл лэ́скири зэр (тенё).”

²¹ Ра́дынпэ и яв весёло (хотно), Эдомоскири Чхай, кон дживэ́ла пэ пхув Уз. Тахта́й адя́кэ-паць явэ́ла пирда́л кэ ту: ту матёса, и ту нангякирэса пэс.

²² О, Сионо́скири Чхай, пхаро́ сэндякирибэн кончындяпэ: Рай Дэвэ́л на явэ́ла тэ лыджа́л тут криг дро пле́но. Нэ Ёв сэндякирэ́ла тут пал Тыро́ чорипэ́н, Эдомоскири Чхай. Ёв отчхакирэла тырэ́ грэ́хи.