Roiben 3 - Библия - Пэ Балтитко Романи чиб (Романэс) 2019

Три́то Роибэн: Пророкоскири Бида и Наде́я

¹ Мэ сом ману́ш, конэ́с Дэвэ́л притасадя дэстэса Лэ́скирэ холя́тыр,

² Ёв лыджия́ ман и яндя́ тэ псирав дро калыпэ́н (цямлыпэ́н), кай нанэ дуд.

³ И Ёв рискирэлас Пэ́скиро васт пэ ма́ндэ нэвэ́с и нэвэ́стыр дывэсэнца.

⁴ Ёв кэрдя́ адя́кэ, со мирэ́ маса́ и мири́ цы́па тыкнынэ, и Ёв пхагирдя́ мирэ́ кокалы́.

⁵ Ёв ґаздыя́ ва́нта пэ ма́ндэ, и Ёв обгия трусця́л ман киркипнаса и пхарипнаса.

⁶ Ёв чхудя́ ман дрэ цямлэ штэ́ты, сы́рбы мэ ґара́ мыём.

⁷ Ёв обчхудя́ ман тыноса, соб (кай) мэ на могинав тэ джав анги́л: Ёв пхарьякирдя мири́ зандир.

⁸ Адя́кэ-паць, ке́ли мэ кхардём роибнаса и дыём го́дла, тэды Ёв зарикирдя мири́ па́тери (моли́тва).

⁹ Ёв закэрдя мирэ́ дрома́ вычингирдэ барэ́нца; Ёв попэнтындя мирэ́ дроморэ.

¹⁰ Ёв яця́ ваш ма́нгэ сы́рбы рич, со исын пашто́, ужакири тэ замарэ́л, сы́рбы шчэр, саво́ исын дро чорахано штэ́то.

¹¹ Ёв пиририскирдя мирэ́ дрома́ и кусця ман пэ котэра́: Ёв пирикэрдя ман дро нисо́.

¹² Ёв ґаздыя́ Пэ́скиро лу́ко, и Ёв чхудя́ ман сыр цэлё ваш Пэ́скирэ марибны́тка бустя́ (стре́лы).

¹³ Ёв кэрдя́ адя́кэ, со бустя́ Лэ́скирэ колчаностыр пхусадэ́ мирэ́ букорэ.

¹⁴ Мэ яцём кадасаво́, со сарэ́ мануша́ санапэ холямэс ма́ндыр, мэ яцём сы́рбы лэ́нгири гилы́ пэ дывэ́с.

¹⁵ Ёв дыя́ чалэ́с ма́нгэ киркипэн и панякирдя ман палыноса.

¹⁶ Ёв пхагирдя́ мирэ́ данда́ гравилёса и чхакирдя ман пеплоса.

¹⁷ Ёв лыджия́ ма́ндыр дур рама́нё (миро) мирэ́ дестыр, мэ бистырдём пал мишто́ джиибэ́н.

¹⁸ И мэ пхэндём: ‘Мири́ зор и мири́ наде́я пэ Растэ-Дэвлэ́стэ хасинэ́.”

¹⁹ Мэ рипирава мирэ́ мэ́ньки и мири́ бари би́да, кирки чар (полыно) и жэлучо.

²⁰ Миро ди ўса рипирэла лэн и исын пашто́ штылэ́с дрэ ма́ндэ.

²¹ Дава́ мэ отпхэнава мирэ́ годякэ и палдава́ исын наде́я ма́ндэ:

²² амэ на хасиям пал Ра́скирэ-Дэвлэ́скири ла́ска, пал-дова́ со Лэ́скири жалима на кончындяпэ;

²³ ёнэ сыкадёна нэвэ́с кажно зло́ко (ра́нко): саво́ баро́ исын Тыро́ патяибэ́н!

²⁴ “Мири́ до́ля исын дрэ Дэвлэ́стэ” – раки́рла миро ди – “палдава́ мэ ужакирава лачхипэ́н Лэ́стыр.”

²⁵ Рай Дэвэ́л исын лачхо́ ваш одолэ́нгэ, кон ужакирэ́ла Лэс, ваш кодолэнгиро ди, саво́ родэ́ла Лэс.

²⁶ Дава́ исын мишто́, соб (кай) ману́ш тэ рикирэ́л наде́я, и соб (кай) тэ ужакирэл штылэ́с, сыр Рай Дэвэ́л ракхэ́ла Лэс.

²⁷ Дава́ исын мишто́ ваш манушэ́скэ, соб (кай) ёв тэ лыджа́л ґа́мо Дэвлэ́стыр пэ́скирэ тырныпнастыр.

²⁸ Мэ ёв тэ бэшэ́л екхджино́ и тэ явэ́л штыл, пал-дова́ со дава́ Рай Дэвэ́л чхудя́ дава́ пэ лэ́стэ;

²⁹ мэк ёв тэ чхувэ́л пэ́скиро муй дро пра́хо, – мо, тэ явэ́л ишчо (инкэ́) наде́я.

³⁰ Ёв подчхувэла пэ́скири чхам (шчока) кодолэ́скэ, кон марэла лэс; мэк тэ обракирэн лэс пхэрдэ́с.

³¹ Пал-дова́ со Рай Дэвэ́л на ячкирэ́ла пэ ўса́ды (сак).

³² Нэ ко́ли Ёв бичхавэ́ла илэскири дукх, тэды Ёв адя́кэ-паць сыкавэ́ла и жалима, пир-дова́ со барвалы исын Лэ́скири ла́ска:

³³ пал-дова́ со Ёв на притасавэла ци калякирэла манушэ́нгирэ-чхавэ́нгирэ илэ, пир-дова́ со Лэ́скэ трэй адя́кэ.

³⁴ Ко́ли тасавэна ґэрэ́нца сарэ́н, кон исын дро штарибэ́н, пир пхув,

³⁵ ко́ли рискирэна пэ риг чачипэ́н, со исын пал манушэ́стэ анги́л Най Вучэдырэскирэ Дэвлэ́стэ;

³⁶ ко́ли начачунэс сыкавэ́на манушэ́с дро лэ́скиро рэ́ндо, – ци Рай Дэвэ́л приджинэла чачипэ́н пэ дава́?

³⁷ Кон исын кадава́, кон пхэнэ́ла: ‘Дава́ кэрэ́лапэ адя́кэ, – мэк Рай-Дэвэ́л и на припхэндя́.

³⁸ Ци на Най Вучэдырэскирэ-Дэвлэ́скирэ лавэ́стыр, со явэ́ла чорипэ́н и лачхипэ́н?

³⁹ Со́скэ тэды джидо́ ману́ш жалинэлапэ, ко́ли Рай Дэвэ́л сэндякирэ́ла лэс пал лэ́скирэ грэ́хи.

⁴⁰ Явэ́н, розґалёваса хор и выпхучаса пэс пал амарэ́ дрома́ и рисёваса палэ кэ Рай Дэвэ́л.

⁴¹ Явэ́н, ґаздаса амэ амаро́ ило́ и васта́ кэ Рай Дэвэ́л, Саво́ исын пэ болыбэ́н.

⁴² Амэ кэрдя́м чорипэ́н и бу́нто: Ту на отмэкцян амари́ банг.

⁴³ Ту чхакирдян Пэс холя́са и Ту традыян амэн, Ту мулякирэсас амэн и Ту на тангинэсас.

⁴⁴ Ту чхакирдян пэс облокоса, соб (кай) амари́ па́тери тэ на проджал пир лэ́стэ.

⁴⁵ Ту кэрдя́н амэ́ндыр шума и джунгалыпэ́н (гидота) машки́р манушэ́ндэ.

⁴⁶ Сарэ́ амарэ́ вэ́рги псирадэ пэ́скирэ муя́ пэ амэ́ндэ.

⁴⁷ Дар и фэлы́ исын пэ амаро́ дром, чхучипэн и хась.

⁴⁸ Мирэ́ якхэ́ндыр праста́на панескирэ рэ́ки (лэня́) пал мирэ́ манушэ́ндэ [тэрнэ́ патывалэ́ джувля́тэ-р.с.], савэ́ хасёна.

⁴⁹ Мирэ́ якха́ тхадэна, и ёнэ на пириячэна, ёнэ на зарикэрэнапэ,

⁵⁰ анги́л дова́, сыр Рай Дэвэ́л на подыкхэла тэлэ́ вучипна́стыр и, акэ, на удыкхэ́ла.

⁵¹ Мирэ́ якхэ́ндыр джа́на дукха́ дро миро ило́ пал сарэ́ манушэ́ндэ мирэ́ форо́стыр.

⁵² Мирэ́ вэ́рги традэнаспэ пал ма́ндэ би-причынакирэ сы́рбы пал чириклятэ.

⁵³ Ёнэ затрадынэ кэ мэрибэ́н ман дрэ ґанби́н и чхурдынэ́ бара́ пэ ма́ндэ,

⁵⁴ паня́ ґаздынэ́пэ вучэды́р мирэ́ шэрэстыр, тэ́ньчи мэ пхэндём: “Мэ хасиём.”

⁵⁵ Мэ кхардём Тыро́ лав, Раё Дэ́вла, тэлатунэ́ ґанбинятыр.

⁵⁶ Ту шундя́н мири́ зан: “На гарав Тыро́ кан, сыр мэ да́ва ΄гондя, сыр мэ ровава.”

⁵⁷ Ту явэсас пашылэды́р дро дывэ́с, сыр мэ кхардём Тут. Ту пхэндя́н: “На андарша.”

⁵⁸ Раё Дэ́вла! Ту лыджиян миро рэ́ндо; Ту выкиндян миро джиибэ́н.

⁵⁹ Раё Дэ́вла! Ту дыкхця́н, сыр начачунэс исыс ма́нца. Россэндин миро рэ́ндо.

⁶⁰ Раё Дэ́вла! Ту дыкхця́н саро́ лэ́нгиро фуипэ́н, со ёнэ кэрэ́на ма́нгэ, и со ёнэ придуминдлэ пэ ма́ндэ.

⁶¹ О Раё Дэ́вла! Ту шундя́н, сыр ёнэ обракирэнас ман, со сари́ лэ́нгири фантазия исыс пэ ма́ндэ;

⁶² сыр мирэ́-вэргэ́нгирэ ушта́ ґундяринэнас пэ ма́ндэ дывэсэнца.

⁶³ Подыкх, сыр ёнэ бэшэна, и сыр ёнэ уштэна; Мэ яцём сы́рбы лэ́нгири гилы́.

⁶⁴ Отдэ́ палэ лэ́нгэ, О Раё Дэ́вла, пир дова́, со лэ́нгирэ васта́ кэрдэ́.

⁶⁵ Бичха́в лэ́нгэ калыпэ́н пэ ило́, мэк тэ явэ́н Тыро́ прокошыбэ́н (арманя) пэ лэ́ндэ!

⁶⁶ Традэ лэн анги́л холя́са, и мулякир лэн Тырэ́ болыбна́стыр, Раё Дэ́вла!