Roiben 2 - Библия - Пэ Балтитко Романи чиб (Романэс) 2019

Яви́р Роибэн: Дэвлэ́скири Холы́ пэ Ерусалимо

¹ Сыр чхакирдя Рай Дэвэ́л Сионоскирья Чха цёмнонэ облокоса, дрэ Пэ́скири холы́! Ёв чхурдыя́ тэлэ́ болыбна́стыр Израилёскири гожыма и на рипирдя пал Пэ́скирэ-ґэрэнгиро прэдкицо дро дывэ́с, сыр Ёв холя́сыя.

² Рай Дэвэ́л хасякирдя́ и на потангиндя сарэ́ Яково́скирэ кхэра́: Ёв чхурдыя́ тэлэ́ холя́тыр Юдэя́кирэ-чхакирэ тва́рдыми [зоралэ́ штэ́ты-р.с.], Ёв пхагирдя́ сарэ́са лэн пэ пхув, Ёв чхудя́ магирипэ́н пэ кралипэ́н и лэ́скирэ тхагарьендэ.

³ Ёв чингирдя тэ хасёл кажно Израилёскиро марибны́тко шынг Пэ́скирэ барэ́ холя́тыр; Ёв дыяпэ палэ Пэ́скирэ вастэ́са анги́л дова́, сыр явдя́ вэ́рго, Ёв росхачкирдя бари яг маму́й Яковостэ, соб (кай) тэ хал саро́, со сыс трусця́л.

⁴ Ёв ґаздыя́ Пэ́скиро лу́ко пэ амэ́ндэ сыр вэ́рго, Ёв тэрдия́ дро стонка Пэ́скирэ чачэ́ вастэ́са сы́рбы вэ́рго, и Ёв мулякирдя́ саро́, со сыс шука́р Лэ́скирэ якхэнгэ. Ёв вычхудя́ Лэ́скири холы́ сы́рбы яг пэ ша́тра, кай сыс Сионо́скири чхай.

⁵ Рай Дэвэ́л яця́ сыр вэ́рго: Ёв пхагирдя́ тэлэ́ Израилё, Ёв пхагирдя́ тэлэ́ сарэ́ лэ́скирэ фэлатиня́, Ёв вымардя пэ котэра́ лэ́скирэ тва́рдыми и Ёв дыя́ бутэды́р роибэ́н и ту́га Юдэя́кирэ Чхакэ.

⁶ И Ёв холямэс роспхагирдя́ Пэ́скири Кхангири́ сы́рбы хру́сты унтатыр (садостыр), Ёв мардя пэ котэра́ штэ́то, кай кэдэнаспэ тэ дэн паты́в Лэ́скэ. Рай Дэвэ́л кэрдя́ адя́кэ, соб (кай) тэ бистрэн упхэндлэ свэ́нки са́ваты и дро Израилё, Ёв яця́ тэ на дэл паты́в крали́скэ и раша́скэ.

⁷ Ёв отпхэндяпэ ладжаса Пэ́скирэ алтарёстыр, Ёв мэкця́ Пэ́скиро Свэ́нто Штэ́то; Ёв отдыя́ фэлатинякирэ ва́нты Ерусалимо́стыр дрэ вэргоскирэ васта́. Ёнэ ґаздынэ́ дасави́ го́дла дро Ра́скирэ-Дэвлэ́скиро Кхэр, сыр дро свэнкэнгиро дывэ́с.

⁸ Рай Дэвэ́л придуминдэ тэ хасякирэ́л Сионоскирэ-Чхакири ва́нта: Ёв диндькирдя шэло, Ёв на обрикирдя Пэ́скиро васт, соб (кай) тэ на хасякирэ́л, Ёв кэрдя́ адя́кэ, со вало и ва́нта лынэ́ тэ ровэ́н тугатыр, и исын паштэ́ котэрэнца кхэтанэ́.

⁹ Форо́скирэ по́рты бэшнэ́ дрэ пхув: Рай Дэвэ́л хасякирдя́ и пхагирдя́ форо́скирэ штабы, форо́скирэ кра́ли и тхага́рья исын бичхадэ́ машки́р Наюдэ́ндэ. Зако́но буты́р нанэ, и форо́скири проро́ки на дыкхэ́на сунэ́ Ра́стыр-Дэвлэ́стыр.

¹⁰ Годэпхурэ́ Сионоскирэ исын бэштэ́ штылэ́с пэ пхув; и исын ёнэ чхурдэна пра́хо пэ пэ́скирэ шэрэ́ и ёнэ подпхандэнапэ жалобнонэ гонэса. Ерусалимо́скирэ патывалэ́ тырнэ джувля́ бандякирэна шэрэ́ кэ пхув.

¹¹ Миря якха́ хасёна ясвэндыр, саро́ андра́л ма́ндэ исын дрэ траш, миро кало́ буко (печонка) чхувэ́лапэ яври́ пэ пхув, пир-дова́ со хасёна мирэ́ – манушэ́нгири чхай, пал-дова́ со чхаворэ́ и бияты нашавэна зор пэ вули́цы (га́сы) дро фо́ро.

¹² Ёнэ ракирэ́на пэ́скирэ даенгэ: ‘Кай исын гив и кай исын мол?’ Ёнэ мэрэ́на [нашавэна соджиныбэн-ю.о.] сы́рбы дукхадэ пир форо́скирэ га́сы, и ёнэ отдэна пэ́скиро ди пал лэ́нгирэ – дакири брэг.

¹³ Со́са ма́нгэ тэ раманякирав тут? Со́са ма́нгэ тэ поровнинав тут, Ерусалимо́скири чхай? Со́са тэ ровнякирав тут, соб (кай) ма́нгэ тэ дав лачхо́ лав ту́кэ, патывалы́ тэрны́ джувлы́, чхай Сионо́стыр? Пал-дова́, со тыро́ бэдыпэн росчхудяпэ буґлэс сыр мо́рё (дэрья́в), кон могинэ́ла тэ састякирэл тут?

¹⁴ Тырэ́ проро́ки дыкхнэ́ ваш ту́кэ чхучэ́ и нагодьварэ сунэ́; ёнэ на сыкадэ тыро́ чорипэ́н, соб (кай) тэ рискирэ́н палэ тумэн плено́стыр, нэ ёнэ дыкхнэ́ ваш ту́кэ хоханэ́ ангилпхэныбэна; палдова́ и выбичхадэ тумэн.

¹⁵ Сарэ́, кон джа́ла пашы́л, пэкавэна пир васта́ пэ ту́тэ; ёнэ сипинэна и кунинэна шэрэнца пэ Ерусалимо́скирэ чхатэ: “Ци дава́ исын фо́ро, со кхардяпэ Гожымакиро пхэрдыпэн, сарэ́ – пхувья́кири ра́дыма?”

¹⁶ Сарэ́ тырэ́ вэ́рги псирадэ пэ́скирэ муя́ пэ ту́тэ: ёнэ сипинэна и ёнэ скрежынэна пэ́скирэ дандэнца. Ёнэ ракирэ́на: “Амэ хасякирдям дава́ фо́ро! Акэ, исын дывэ́с, со амэ ужакирдям, амэ латхям дова́, амэ дыкхцям дава́.”

¹⁷ Рай Дэвэ́л кэрдя́ дова́, со Ёв придуминдя: Ёв выпхэрдякирдя Пэ́скиро лав, со Ёв припхэндя́ дрэ ґаратунэ́ дывэса́. Ёв чхурдыя́ тэлэ́ Ерусалимо, и Ёв на потангиндя, Ёв кэрдя́ адя́кэ, соб (кай) тыро́ вэ́рго древа́н тэ радынэ́лпэ тырэ́ бибахтятыр, Ёв барьякирдя зор тырэ́ намалэнгэ.

¹⁸ Ерусалимо́скирэ – манушэ́нгиро ило́ лыя́ тэ дэл го́дла роибнаса кэ Дэвэ́л: о Сионоскирэ-Чхакири ва́нта! Мэк тэ прастан тырэ́ ясва сыр рэка (лэнь) дывэ́с и рат; на откхинёв, на дэ пэ́скирэ якхэнгэ тэ откхинён.

¹⁹ ґаздэпэ, дэ го́дла яври́ раты́, ке́ли кажно стрэ́га джа́ла, вычхув сыр пани́ пэ́скиро ило́ анги́л Растэ-Дэвлэ́стэ, ґа́здэ пэ́скирэ васта́ кэ Ёв ваш джиибэ́н тырэ́ тырнэ биятэнгиро, савэ́ нашавэна зор бокха́тыр пэ кажнонэ́-гасакиро вэнгло.

²⁰ “Дыкх, Раё Дэ́вла, и обдумин, конэ́скэ Ту кэрдя́н адя́кэ? Соб (кай) джувля́ тэ хан пэ́скиро барьякирдо́ (пло́до), конэ́с ёнэ барьякирдэ́? Соб (кай), хай, тэ мулякирэ́н раша́с и пророко́с пэ Ра́скирэ-Дэвлэ́скиро Свэ́нто Штэ́то?

²¹ Тырнэ и пхуранэ́ исын паштэ́ пэ пхув пэ га́сы, и ёнэ мирэ́ патывалэ́ джувля́ и мирэ́ тэрнэ́ мануша́ пынэ́ куртала́тыр; Ту мулякирдян лэн дро дывэ́с, сыр Ту холясыян, Ту замардян лэн и Ту на тангиндян (на пожалиндян).

²² Ту кхардян кхэтанэ́ сы́рбы пэ свэнкитко дывэ́с траша, со обгинэ трусця́л ман; дро дывэ́с, сыр Ту холясыян, ние́кх на насця, на яця́пэ. Кодолэ́н, конэ́скэ мэ давас колы́н и конэ́с мэ барьякирдём, мирэ́ вэ́рги выханэ.”