Римлянэнгэ 7 - Библия - Пэ Балтитко Романи чиб (Романэс) 2019

Приме́ро (Сыкаибэ́н) Палоромипна́стыр

¹ Ци на джинэ́на тумэ́, пшала́лэ, со (мэ ракира́ва одолэ́нгэ, кон джинэ́ла Зако́но): Зако́но рикирэ́ла зор пэ манушэ́стэ, пака ёв исын джидо́?

² Пал-дова́ со палоромитко джувлы́ исын спхандлы Законоса джидэ́ ромэса; нэ, ко́ли ла́киро ром мэрэ́ла, ёй ячэ́ла во́льно палоромитконэ Законо́стыр.

³ Ке́ли джувлы́ выджа́ла палоро́м пал явирэ́стэ, ко́ли ла́киро ром исын джидо́, ла явэ́на тэ кхарэ́н биладжакуня́са; нэ ко́ли ла́киро ром мэрэ́ла, тэды ёй исын во́льно Законо́стыр, и ёй на явэ́ла тэ гинэлпэ биладжакуняса, ке́ли ёй выджа́ла палоро́м пал явирэ́стэ.

⁴ Адя́кэ и тумэ́, пша́ла мирэ́, тумэ́ на сан тэл Законоскири зор, пал-дова́ со тумэ́ сан паш Христосо́скирэ масэ́ндыр, соб (кай) тумэ́ тэ явэ́н трэй Явирэ́скэ, Саво́ отджидыя́ мулэ́ндыр, и соб (кай) амэ тэ янас вари-саво́ лачхо́ дыибэ́н Дэвлэ́скэ.

⁵ Пал-дова́ со, ке́ли амэ дживдям пир лочакиро тырдыпэ́н, тэды Зако́но джангавэлас амэ́ндэ грэхи́тка камибэна, савэ́ сыс дрэ амарэ́ масэнгирэ паша́ и далэ́са амэ янасас дыибэ́н мэрибна́скэ;

⁶ а какана́, амэ яця́м вольна Законо́стыр, ке́ли амэ мыям ваш дава́ Зако́но, савэ́са амэ са́мас спхандлэ, соб (кай) тэ дынарина́с амэ́нгэ Дэвлэ́скэ пир нэво́ Ду́хо (Фа́но), а на пир пхурано́ Законоскиро чхиныбэ́н.

Зако́но и Грэ́хо

⁷ Со ж амэ пхэна́са? Нау́што Зако́но исын грэ́хо? Нисыр над! Нэ мэ на джинавас, со дава́ дасаво исын грэ́хо, ко́ли тэ на явэ́л Зако́но: мэ на сом Законоскиро, со дава́ исын дасаво тэ причхувэс ило́ кэ дова́, со на трэй, ко́ли Зако́но тэ на ракирэ́л: “На кам.”

⁸ Нэ грэ́хо латхя́ саштыпэн пир запхэныбэн и подмардя дрэ ма́ндэ кажно тырдыпэ́н, саво́ на трэй, пал-дова́ со би Законоскиро грэ́хо исын муло́.

⁹ Мэ вари-ке́ли дживдём би Законоскиро: а ке́ли явдя́ запхэныбэн, тэды и грэ́хо отджидыя́,

¹⁰ а мэ мыём. И выгия́, со запхэныбэн, саво́ исын дыно́ ваш джиибэ́н, яндя́ ма́нгэ мэрибэ́н:

¹¹ пал-дова́ со грэ́хо пир запхэныбэн хохадя ман и мулякирдя́ лэ́са ман.

¹² Палдава́ Зако́но исын свэ́нто, и запхэныбэн исын свэ́нто, и чачуно́ и лачхо́.

¹³ Ци адя́кэ выгия́, со лачхипэ́н яця́ ваш ма́нгэ мэрибнаса? Над. Нэ грэ́хо, соб (кай) тэ явэ́л бицяло́ сыр грэ́хо, ёв яндя́ ма́нгэ мэрибэ́н пир лачхипэ́н, соб (кай) грэ́хо пир запхэныбэн тэ явэ́л даранэс грэхиткэдыр, со исын буты́р.

¹⁴ Амэ джина́са, со Зако́но исын свэ́нто, а амэ сам грэхи́тка, и амарэ́ маса́ исын бикиндло грэхоскэ дро дынарибэ́н.

Марибэ́н Андра́л Манушэ́стэ

¹⁵ Мэ кокоро́ на ґалёвава, со мэ кэра́ва; пал-дова́ со мэ кама́м, мэ дова́ на кэра́ва, нэ со мэ древа́н на кама́м, мэ дова́ кэра́ва.

¹⁶ А ко́ли мэ кэра́ва дова́, со ма́нгэ на пир ило́, тэды мэ сом дро екхипэ́н Законоса, со ёв исын лачхо́.

¹⁷ Палдава́, акэ на мэ кокоро́ кэра́ва, а дава́ грэ́хо кэрэ́ла, саво́ дживэ́ла дрэ ма́ндэ.

¹⁸ Палдова́ мэ джино́м, со нисаво́ лачхипэ́н на дживэ́ла андра́л ма́ндэ; пал-дова́ со мэ кама́м тэ кэра́в лачхипэ́н, нэ мэ на могина́ва.

¹⁹ Пал-дова́ со мэ кэра́ва на дова́ лачхипэ́н, саво́ мэ кама́м, а чорипэ́н, саво́ мэ на кама́м, а мэ дова́ кэра́ва.

²⁰ Ко́ли мэ кэра́ва дова́, со мэ на кама́м, тэды дава́ на мэ кэра́ва, а грэ́хо, саво́ дживэ́ла дрэ ма́ндэ.

²¹ И адя́кэ мэ ґалыём, со дасаво исын Зако́но, ко́ли мэ кама́м тэ кэра́в лачхипэ́н, а ма́ндэ выджа́ла чорипэ́н.

²² Палдава́ мэ радынавпэ Дэвлэ́скирэ Законо́стыр, саво́ дживэ́ла дрэ манушэ́стэ:

²³ нэ дрэ мирэ́ масэнгирэ паша́, мэ дыкха́ва яви́р Зако́но, саво́ исын проти Зако́но мирэ́ годя́киро и саво́ кэрэ́ла ман грэхоскирэ писхариса, саво́ исын дрэ мирэ́-масэнгирэ паша́.

²⁴ Саво́ бэдо мэ сом ману́ш! Кон тэ зракхэлас ман далэ́ мэрибнаскирэ масэ́ндыр?

²⁵ Парикирава Дэвлэ́скэ пир Исусо́стэ Христосо́стэ, амарэ́ Растэ-Дэвлэ́стэ. И ґа́да, мэ кокоро́ годя́са дынарина́ва Дэвлэ́скирэ Законо́скэ, нэ масэнца мэ дынарина́ва (служынава) грэхо́скирэ Законо́скэ.