Римлянэнгэ 5 - Библия - Пэ Балтитко Романи чиб (Романэс) 2019

Рама́нё Дэвлэ́са

¹ И пал-дова́ со амэн приґалынэ пал чачунэндэ пир патяибэ́н, амэ́ндэ исын рама́нё (миро) Дэвлэ́са пир амарэ́ Растэ-Дэвлэ́стэ, Исусо́стэ Христосо́стэ,

² пир Савэ́стэ амэ сам домэкнэ пир патяибэ́н кэ дава́ бахтякирибэ́н, дрэ саво́ амэ какана́ дживаса, и амэ радынасапэ, со амэ́ндэ исын наде́я пэ Дэвлэ́скири сла́ва.

³ Нэ на дрэ екх дава́ исын амари́ ра́дыма, а амэ адя́кэ-паць радынасапэ дрэ амарэ́ пхарипэна, пал-дова́ со амэ джина́са, со пир пхарипэ́н барьёла амаро́ вырикирибэн.

⁴ Пир вырикирибэн амэ ячасапэ твардэдыр дро характеро, а характеро дурэды́р дэ́ла наде́я.

⁵ И амари́ наде́я на подлыджала амэн, пал-дова́ со Дэвлэ́скири ла́ска пир Свэ́нто Ду́хо (Фа́но) пхэрдякирдя́ амарэ́ илэ ласкаса, сави́ дыны́ амэ́нгэ:

⁶ пал-дова́ со Христо́со, ке́ли амэ са́мас грэхи́тка, дро часо, Саво́ Дэвэ́л упхэндя, мыя́ пал надэвлытконэндэ.

⁷ Ци мэрэ́ла вари-кон пал чачунэ́ манушэ́стэ? Сашты́ (могинэ́ла) тэ явэ́л, со пал вари-савэ́ лачхэстэ, вари-кон и скэдэ́ла муршыпэн тэ мэрэ́л,

⁸ нэ Дэвэ́л допхэнэ́ла Пэ́скирэ ласкаса кэ амэ, со Христо́со мыя́ пал амэ́ндэ, ке́ли амэ ишчо (инкэ́) са́мас грэхи́тка.

⁹ Палдава́ какана́, ке́ли амэ сам приджиндлэ чачунэнца Лэ́скирэ ратэ́са, амэ буты́р патя́са дрэ дова́, со амэ зракхасапэ пир Лэ́стэ Дэвлэ́скирэ холя́тыр.

¹⁰ Ко́ли англэды́р амэ са́мас вэ́рги Дэвлэ́скэ и какана́ амэ яця́м дро рама́нё (миро) Лэ́са пир Лэ́скирэ Чхавэ́скиро мэрибэ́н, тэды буты́р сарэ́стыр какана́, сыр амэ яця́м дро рама́нё, амэ надеинасапэ тэ зракхаспэ Лэ́скирэ джиибнаса.

¹¹ И на екх дава́, нэ амэ и радынасапэ пир амарэ́ Растэ-Дэвлэ́стэ, Исусо́стэ Христосо́стэ, пир Савэ́стэ амэ дорэсцям (долыям) какана́ рама́нё Дэвлэ́са.

Ада́мо и Христо́со

¹² Палдава́, сыр пир екхэ манушэ́стэ грэ́хо загия́ дро свэ́то, и пал дава́ грэ́хо яця́ мэрибэ́н, адя́кэ мэрибэ́н яця́ пэ сарэ́ манушэ́ндэ, пал-дова́ со сарэ́ кэрдэ́ грэ́хо:

¹³ пал-дова́ со грэ́хо сыс дро свэ́то англэды́р Законо́стыр, нэ грэ́хо на гинэлапэ, ко́ли нанэ Зако́но;

¹⁴ нэ мэрибэ́н рикирдя зор пэ манушэ́ндэ Адамостыр кэ Мо́йза, адя́кэ-паць и пэ одолэ́ндэ, кон на кэрдя́ дасаво грэ́хо, сыр Адамо, саво́ сыс, сыр о́бразо Одолэ́скэ, Конэ́скэ трэиндя́ тэ явэ́л.

¹⁵ Нэ Дэвлэ́скиро тала́но пир бахталыпэ́н, дава́ нанэ ж дова́-паць, сыр Адамоскиро грэ́хо? Пал-дова́ со, ко́ли пир екхэ-манушэ́скиро проштавибэн бут мануша́ мынэ́, тэды ци пэ бут буты́р мануша́ дорэсэ́на Дэвлэ́скиро бахталыпэ́н и тала́но пир бахталыпэ́н екхэ Манушэ́стыр Исусо́стыр Христосостыр дэ́лапэ ваш сарэ́нгэ.

¹⁶ Нэ Дэвлэ́скиро тала́но исын на сы́рбы сэ́ндо пал екхэ манушэ́стэ, саво́ кэрдя́ грэ́хо; пал-дова́ со грэ́хо, саво́ кэрдя́ екх ману́ш, лыджа́ла кэ сэ́ндо, нэ Дэвлэ́скиро тала́но пир бахталыпэ́н исын сы́рбы чачипна́скиро приджиныбэн пал бутэ́нгирэ-манушэ́нгирэ грэ́хи?

¹⁷ А ко́ли пир екхэ́-манушэ́скиро проштавибэн мэрибэ́н лыя́ тэ рикирэ́л лофо (зор), тэды ци пэ бут бутэды́р во́льно чачипна́скиро да́ро и бут бут бахталыпэ́н явэ́на тэ кралинэн дро одолэнгиро джиибэ́н, савэ́ прилэ́на лэн пир Екхэ́стэ Исусо́стэ Христосо́стэ:

¹⁸ палдава́, сыр екхэскиро манушэ́скиро грэ́хо яндя́ сэ́ндо сарэ́ манушэ́нгэ, адя́кэ-паць екхэ Манушэ́скиро чачуно́ рэ́ндо приджинэла сарэ́ манушэ́н чачунэнца ваш джиибэ́н, саво́ дэ́ла джиибэ́н сарэ́нгэ.

¹⁹ Пал-дова́ со, сыр пал екхэ манушэ́скиро накандыпэн кэрдэ́пэ бут мануша́ грэхитконэнца, адя́кэ-паць и пал Екхэ Манушэ́скиро кандыпэн бут мануша́ ячэ́напэ чачунэнца.

²⁰ А Зако́но сыс дыно́, соб (кай) тэ явэ́л буты́р и бицялэдыр грэхоскиро ґалыибэ́н; нэ одо́й, кай сыс буты́р грэ́хо, одо́й сыс и буты́р бахталыпэ́н;

²¹ пал-дова́ со, сыр грэ́хо рикирдя зор пэ мэрибэ́н, адя́кэ-паць и бахталыпэ́н явэ́ла тэ лыджа́л тэ рикирэ́л ло́фо (зор) пэ чачипэ́н, саво́ янэ́ла кэ ве́чно джиибэ́н пир Исусо́стэ Христосо́стэ, амарэ́ Растэ-Дэвлэ́стэ.