Римлянэнгэ 15 - Библия - Пэ Балтитко Романи чиб (Романэс) 2019

Кэрэ́н Екх Екхэ́скэ Лачхипэ́н пир Пэ́скиро Ило́

¹ Амэ, савэ́ сам зоралэды́р, сам бангэ́ (мусинаса) тэ примангас доша одолэ́ манушэ́нгэ, савэ́ндэ нанэ зор, а на тэ кэра́с екх со пир пэ́скиро ило́.

² Кажнонэ́ амэ́ндыр трэй тэ думинэл пал пэ́скирэ пашатунэ́ манушэ́стэ ваш дова́, соб (кай) ёв тэ барьёл дрэ ду́хо (фа́но).

³ Палдава́ и Христо́со на кэрдя́ екх со пир Лэ́скиро ило́, нэ, сыр исын чхиндло́: “Одолэ́-манушэ́нгиро кошыбэ́н, савэ́ кошэна Тут, пынэ́ пэ Ма́ндэ.”

⁴ Палдава́ саро́, со исыс чхиндло́ англэды́р, сыс чхиндло́ ваш амэ́нгэ, соб (кай) амэ тэ сыклёвас, соб (кай) амэ́ндэ тэ явэ́л наде́я вырикирибнаса и подрикирибнаса Свэнтонэ́ Чхиныбна́стыр.

⁵ Мэк Дэвэ́л, саво́ дэ́ла вырикирибэн и подрикирибэ́н, тэ дэл тумэ́нгэ, соб (кай) тумэ́ тэ явэ́н кхэтанэ́ дро ду́хо (фа́но) машки́р пэ́стэ пир Исусо́скирэ-Христосо́скиро сыкляибэн,

Бахталы́ Зан (Звесь) ваш Наюдэ́нгэ

⁶ соб (кай) тумэ́ сарэ́ кхэтанэ́ екхэ уштэ́нца тэ славинэ́н Дэвлэ́с и амарэ́ Ра́скирэ-Дэвлэ́скирэ Дадэ́с.

⁷ Палдава́, прилэ́н екх екхэ́с, сыр и Христо́со прилыя́ тумэн, ваш сла́ва Дэвлэ́скири.

⁸ Палдава́ мэ ракира́ва, со Ису́со Христо́со яця́ дына́ри (слу́га) обчхиндлэнгэ ваш Дэвлэ́скиро чачипэ́н, соб (кай) Лэ́скэ тэ сполнинэл дыно́ лав, саво́ Ёв дыя́ дадэ́нгэ;

⁹ и соб (кай) На́юды тэ славинэ́н Дэвлэ́с пал Лэ́скиро тангипэ́н, сыр исын чхиндло́: “Пал дава́ мэ ява́ва тэ славинав Тут машки́р Наюдэ́ндэ, и мэ ява́ва тэ бага́в гиля́ Тырэ́ лавэ́скэ!”

¹⁰ И нэвэ́стыр Исаё ракирэ́ла: “Радынэ́нпэ На́юды кхэтанэ́ Лэ́скирэ манушэ́нца.”

¹¹ И нэвэ́стыр пхэндло́: “Шарэ́н Рас-Дэвлэ́с, сарэ́ На́юды и мэк сарэ́ мануша́ тэ шарэ́н Лэс.”

¹² И нэвэ́стыр Исаё ракирэ́ла: “Ёв явэ́ла Есеёскиро родо́стыр и Ёв явэ́ла тэ хулаинэ́л манушэ́нца: пэ Лэ́стэ На́юды явэ́на тэ розгинэн.”

¹³ Дэвэ́л, Саво́ дэ́ла наде́я, – мэк тэ пхэрдякирэл тумэн кажнонэ́ радыма́са и раманёса дро тумаро́ патяибэ́н, соб (кай) наде́я тэ барьёл Свэнтонэ́ Духо́скирэ зорья́са дрэ тумэ́ндэ.

Па́вли Пирипхэнэ́ла, Со́скэ Ёв Чхинэ́ла (Писынэ́ла) Адя́кэ Муршканэ́с

¹⁴ Мэ кокоро́ джино́м пал тумэ́ндэ, мирэ́ пша́ла, со тумарэ́ илэ исын пхэрдэ́ лачхипна́са, и тумаро́ джиныбэ́н дэ́ла саштыпэн тумэ́нгэ тэ сыклякирэ́н екх екхэ́с.

¹⁵ Нэ мэ чхиндём тумэ́нгэ муршканэдыр пал вари-савэ́ рэ́нды, соб (кай) тумэ́ тэ рипирэ́н пал бахталыпэ́н, саво́ Дэвэ́л дыя́ ма́нгэ,

¹⁶ тэ явав Исусо́скирэ-Христосо́скиро дына́ри ваш Наюдэ́нгэ и сыр раша́скэ тэ сыклякирав Дэвлэ́скири бахталы́ зан, соб (кай) дава́ Наюдэнгиро свэ́нто дыибэ́н тэ янэл Дэвлэ́скэ ра́дыма и тэ явэ́л посвэнцындло Свэнтонэ́ Духо́са.

¹⁷ И палдава́ пир Исусо́стэ Христосо́стэ мэ могина́ва тэ шаравпэ мирэ́ дынарибнаса анги́л Дэвлэ́стэ.

¹⁸ Пал-дова́ со ма́ндэ нанэ муршыпэн тэ ракира́в пал вари-со, со на кэрдя́ Христо́со пир ма́ндэ, ваш дова́, соб (кай) тэ янэл Наюдэн кэ патяибэ́н, лавэ́са и рэндоса, савэ́ Ёв кэрдя́,

¹⁹ ґэртыкакирэ зорья́са и дивэнца, Дэвлэ́скирэ Духо́скирэ зорья́са адя́кэ, со мэ пхэрдэ́с роспхэндём Христососкири бахталы́ зан (звесь) Ерусалимо́стыр и пашы́л дава́ фо́ро кэ Илирика;

²⁰ и мэ причхудём зор (стариндёмпэ) тэ ракира́в на одо́й, кай сыс пхэндло́ Христосо́скиро лав, соб (кай) тэ на чхував пэ дава́ фунда́менто, саво́ кэрдэ́ анги́л ма́ндэ;

²¹ нэ сыр исын чхиндло́: “Одолэ́, конэ́скэ на сыс роспхэндло пал Лэ́стэ, одолэ́ кокорэ́ дыкхэ́на, и одолэ́, савэ́ на шундлэ́, уджинэна.”

Павли́скиро Задуминыбэ́н тэ Джал кэ Ри́мо

²² Палдава́ ма́ндэ сыс бут тэрдо́ пэ дром, со на дэ́лас ма́нгэ саштыпэн тэ явав кэ тумэ́.

²³ Нэ какана́, ма́ндэ нанэ буты́р рэ́нды пэ далэ́ пхувья́, нэ сыр ма́ндэ ґаратунэ́ бэршэ́ндыр сыс бари ла́ска тэ явав кэ тумэ́,

²⁴ какана́, ке́ли мэ ява́ва тэ традав дрэ Испания, мэ затрадава кэ тумэ́, пал-дова́ со ма́ндэ исын наде́я тэ дыкха́в тумэн, и со тумэ́ ман пролыджана дрэ дром коригэды́р (позжэды́р) долэ́стыр, сыр Мэ чалёвава радыма́са тэ ракира́в тумэ́нца,

²⁵ нэ какана́ мэ джа́ва дро Ерусалимо тэ дынаринав свэнтонэнгэ;

²⁶ пал-дова́ со Македония и Ахия закамлэ тэ скэдэ́н тэ дэн ловэ́ илэ́стыр свэнтонэнгэ Ерусалимо́стыр.

²⁷ Ёнэ кокорэ́ закамлэ дава́, пал-дова́ со ёнэ исын вужлэ анги́л лэ́ндэ, ко́ли На́юды ячнэ́ кхэтанэ́ Юдэнца дро Духоскиро бахтякирибэ́н, тэды лэ́нгэ трэй тэ помогинэн лэ́нгэ и пэ джиибэ́н.

²⁸ Сыр мэ кэра́ва дава́, мэ отда́ва лэ́нгэ, со скэдыно́, тэды мэ джа́ва пирда́л тумарэ́ штэ́ты дрэ Испания.

²⁹ Мэ джино́м, со ке́ли мэ ява́ва кэ тумэ́, мэ ява́ва дро пхэрдо́ Христосо́скиро бахтякирибэ́н.

³⁰ Нэ, акана́ мэ манга́ва тумэн, пша́ла, амарэ́ Ра́са-Дэвлэ́са, Исусо́са Христосо́са и Духо́скирэ патыва́са тэ явэ́н ма́нца дро хор мангипэ́н пал ма́ндэ кэ Дэвэ́л;

³¹ соб (кай) ма́нгэ тэ зракхавпэ Юдэндыр, савэ́ на патя́на дрэ Исусо́стэ и, соб (кай) миро дынарибэ́н дро Ерусалимо тэ явэ́л шука́р прилыно свэнтонэнца;

³² соб (кай) ма́нгэ дрэ ра́дыма, ко́ли Дэвлэ́скэ дава́ явэ́ла трэй, тэ явав кэ тумэ́ и кхэтанэ́ тумэ́нца тэ откинёвав.

³³ Мэк Дэвэ́л, Саво́ дэ́ла рама́нё, тэ явэ́л сарэ́нца тумэ́нца. Ами́нь.