Римлянэнгэ 14 - Библия - Пэ Балтитко Романи чиб (Романэс) 2019

Нашты́ тэ Сэндинэ́с Пэ́скирэ Пшалэ́с

¹ Манушэ́с, савэ́стэ нанэ зорало́ патяибэ́н, прилэ́н би пхучибнаскиро.

² Пал-дова́ со екхэскиро патяибэ́н дэ́ла во́ля лэ́скэ саро́ тэ хал, а ману́ш, савэ́стэ нанэ зорало́ патяибэ́н, мэк фэ́ни ёв тэ хал шаха (овошчы).

³ Одова́, кон ха́ла, на сэндякир одолэ́с, кон на ха́ла; и кон на ха́ла, на сэндякир одолэ́с, кон ха́ла, пал-дова́ со Дэвэ́л прилыя́ и лэс.

⁴ Кон ту адасаво́ сан, со ту сэндякирэса явирэ – хула́скирэ писхари́с? Ёв исын тэрдо́ ци пэрэ́ла анги́л пэ́скирэ хуластэ. И ёв нэвэ́стыр уштэ́ла, пал-дова́ со Дэвэ́л могинэ́ла тэ чхувэ́л лэс, соб (кай) ёв тэ явэ́л тэрдо́.

⁵ Екх ману́ш гинэ́ла, со екх дывэ́с исын буты́р свэ́нто, сыр яви́р, а яви́р ману́ш гинэ́ла екх дывэ́с адя́кэ-паць, сыр и яви́р. Мэк кажно ману́ш тэ кэрэ́л саро́ пир пэ́скиро патяибэ́н.

⁶ Одова́, кон гинэ́ла, со екх дывэ́с исын главнэдыр явирэстыр, гинэ́ла ваш Дэвлэ́скэ. И одова́, кон ха́ла, ха́ла ваш Дэвлэ́скэ, пал-дова́ со ёв парикирэла Дэвлэ́скэ пал дава́; и одова́, кон на ха́ла, ёв кэрэ́ла дава́ ваш Дэвлэ́скэ, и парикирэла Дэвлэ́скэ.

⁷ Пал-дова́ со нико́н амэ́ндыр на дживэ́ла ваш пэ́скэ и нико́н на мэрэ́ла ваш пэ́скэ.

⁸ Палдава́, ко́ли амэ дживаса, амэ дживаса ваш Дэвлэ́скэ; а ко́ли амэ мэраса, амэ мэраса ваш Дэвлэ́скэ: а палдава́, ци амэ мэраса, амэ ўса́ды (сак) сам Дэвлэ́скирэ.

⁹ Ваш дава́ и мыя́ Христо́со, и отджидыя́, соб (кай) Лэ́скэ тэ явэ́л Ра́са-Дэвлэ́са и пэ джидэндэ и пэ мулэндэ.

¹⁰ Нэ со ту сэндякирэса пэ́скирэ пшалэ́с? Ци и ту, со ту обракирэса пэ́скирэ пшалэ́с? Пал-дова́ со амэ сарэ́ ява́са тэ тэрдёвас анги́л Дэвлэ́скиро сэ́ндо.

Нашты́ тэ Змарэ́с Пшалэ́с Дромэ́стыр

¹¹ Палдава́ исын чхиндло́: “Мэ джива́ва, – ракирэ́ла Рай Дэвэ́л, – анги́л Ма́ндэ тэрдёна пэ чанга́ мануша́ кажнонэ́ родо́стыр и мануша́ пэ кажна чиба́ (чибья́) приджинэна, со Мэ сом Дэвэ́л.”

¹² Тэды кажно амэ́ндыр явэ́ла тэ отпхэнэл кокоро́ пал пэ́стэ анги́л Дэвлэ́стэ.

¹³ На ява́са буты́р тэ сэндякирас екх екхэ́с; нэ фэды́р ява́са тэ думинас пал дова́, сыр тэ на домэкас пшалэ́скэ тэ змарэлпэ дромэ́стыр, тэ на злыджас пшалэ́с кэ грэ́хо.

¹⁴ Мэ джино́м и патя́ва дрэ Растэ-Дэвлэ́стэ Исусо́стэ, со нанэ нисо́, соб (кай) тэ явэ́л нажужо кокоро́ пир пэ́стэ; нэ ко́ли ману́ш гинэ́ла вари-со нажужэса, тэды ваш лэ́стэ дова́ исын нажужо.

¹⁵ Ко́ли тыро́ пшал холясо́ла пал хабэ́н, тэды ту кэрэ́са на пир ило́. На хасякир тырэ́ хабнаса одолэ́с, пал конэ́стэ Христо́со мыя́.

¹⁶ Мэк мануша́ тэ на ракирэ́н чорипэ́н пал тумаро́ лачхипэ́н;

¹⁷ пал-дова́ со Дэвлэ́скиро Кралипэ́н-дава́ исын на хабэ́н и пибэ́н, а чачипэ́н, рама́нё и ра́дыма пир Свэ́нто Ду́хо (Фа́но).

¹⁸ Пал-дова́ со, кон адя́кэ дынаринэла Христосо́скэ, одова́ исын дрэ ра́дыма Дэвлэ́скэ и ёв исын мол шарибнаскэ манушэ́ндыр.

¹⁹ Тэды ява́са тэ причхувас зор тэ кэра́с дова́, со лыджа́ла кэ рама́нё (миро) и кэ екх екхэскиро ґалыибэ́н.

²⁰ На хасякир Дэвлэ́скирэ рэ́нды ваш хабэ́н. Саро́ хабэ́н исын жужо́ (чысто); нэ фуес одолэ́ манушэ́скэ, кон ха́ла и далэ́са лыджа́ла явирэ манушэ́с кэ грэ́хо.

²¹ Фэды́р тэ на хас мас, и тэ на пьес мол и тэ на кэрэ́с нисо́ дасаво, со́стыр тыро́ пшал могинэ́ла тэ змарэлпэ дромэ́стыр, соб (кай) тэ на злыджас пшалэ́с, ци тэ на кэра́с дова́, со́стыр ёв на могинэ́ла тэ зрикирэлпэ.

²² Патяибэ́н, саво́ исын ту́тэ, исын ваш пэ́скэ анги́л Дэвлэ́стэ. Бахтало́ исын одова́ ману́ш, кон на сэндякирэ́ла пэс пал дова́, со ёв выкэдыя́.

²³ Нэ одова́, кон пиридуминэла, ко́ли ёв ха́ла, явэ́ла сэндякирдо, пал-дова́ со ёв кэрэ́ла на пир патяибэ́н; а саро́, со на пир патяибэ́н, исын грэ́хо. [

²⁴ А Дэвлэ́скэ, саво́ дэ́ла зор тумэ́нгэ тэ патяс пир мири́ бахталы́ зан (звесь) и пир пхэныбэ́н пал Исусо́стэ Христосо́стэ пир чораханыбнаскиро откэрибэн, Саво́ сыс гарадо́ ґаратунэ́ бэршэ́ндыр,

²⁵ нэ Саво́ акана́ дыно́ тумэ́нгэ пир пророкэнгиро чхиныбэ́н и пир Дэвлэ́скиро ве́чно упхэныбэ́н и сыс роспхэндлы сарэ́ нацые́нгэ, соб (кай) сарэ́ могиндлэ́ тэ упатян и тэ кандэ́н,

²⁶ Екхджинэ́скэ и Най Годьварэдырэ Дэвлэ́скэ, пир Исусо́стэ Христосо́стэ тэ явэ́л сла́ва пэ сарэ́ ве́ки. Ами́нь.-р.с.]