Римлянэнгэ 11 - Библия - Пэ Балтитко Романи чиб (Романэс) 2019

Дэвлэ́скиро Тангипэ́н (Жа́лима) кэ Израилё

¹ Палдава́ мэ пхучава: “Ци Дэвэ́л мэкця́ Пэ́скирэ манушэ́н?” Над. Мэ кокоро́ сом Израильтянино, Авраамо́скирэ родо́стыр, Вениамино́скирэ рига́тыр.

² Дэвэ́л на могиндя́ тэ мэкэл Пэ́скирэ манушэ́н, савэ́н Ёв англэды́р приджиндя. Ци тумэ́ на джинэ́на, со ракирэ́ла Свэ́нто Чхиныбэ́н пал Илиястэ, сыр ёв тангинэлапэ (жалинэлапэ) пэ Израилё анги́л Дэвлэ́стэ?

³ “Раё Дэ́вла! Ёнэ замардэ́ (умардэ) Тырэ́ пророкэ́н, роспхагирдэ́ Тырэ́ Свэнтонэ́-дыибнытка штэ́ты и мэ яцёмпэ екхджино́, и ёнэ родэ́на тэ замарэ́н ман.”

⁴ Нэ со ракирэ́ла Дэвлыкано отпхэныбэ́н? “Мэ ракхцём Пэ́скэ эфта́ тысёнцы манушэ́н, савэ́ на тэрдинэ́ пэ чанга́ анги́л Ваалостэ.”

⁵ Адя́кэ-паць и дро амаро́ часо пир Дэвлэ́скиро выкэдыибэн пир бахталыпэ́н исын выкэдыны паш.

⁶ Ко́ли пир бахталыпэ́н-дава́ нанэ буты́р пал рэ́нды, то бахталыпэ́н пириячэлас тэ явэ́л бахталыпнаса, сыр Дэвлэ́скиро дыибэ́н.

⁷ Нэ со ж тэды? Со Израилё родыя, одова́ ёв на латхья (ластя), нэ одолэ́, савэ́ сыс выкэдынэ́, латхнэ́, а яви́р сы́рбы короринэ холя́тыр.

⁸ Сыр и сыс чхиндло́ пал дава́: “Дэвэ́л дыя́ лэ́нгэ дасаво ду́хо (фа́но), со лэ́нгири годы́ исын суты, лэ́нгирэ якха́ на дыкхэ́на и кана́ на шунэ́на кэ ададывэсатуно дывэ́с.”

⁹ И Дави́до ракирэ́ла: “Мэк тэ явэ́л скаминдэнгиро пибэ́н лэ́нгэ сыр кхуды́ (сеть), сыр мирежа, сыр фэлы́ (петля) тэ попэрэнпэ и пхаро́ отдыибэ́н ваш лэ́нгэ:

¹⁰ мэк тэ корьён лэ́нгирэ якха́, соб (кай) ёнэ тэ на дыкхэ́н, и мэк тэ явэ́н збандькирдэ лэ́нгирэ думэ пэ саро́ джиибэ́н.”

¹¹ Тэды мэ пхучава: Нау́што ёнэ обштадэпэ, соб (кай) сарэ́са тэ пэрэ́н? Сарэ́са над: Дова́, со ёнэ пынэ́, яндя́ Наюдэ́нгэ зракхибэ́н, соб (кай) тэ выкхарэн зэвлыныпэ́н дро Израилё.

¹² Ко́ли дава́, со ёнэ пынэ́, янэ́ла свэтоскэ барвало́ бахтякирибэ́н, и ко́ли лэ́нгиро хасякирибэн янэ́ла барвало́ бахтякирибэ́н Наюдэ́нгэ, тэды ци пэ бут буты́р Юдэ́нгэ кокорэндэ явэ́ла барвало́ бахтякирибэ́н пэ ко́нцо (пэ яго́ро).

Зракхибэ́н ваш Наюдэ́нгэ

¹³ Палдава́ мэ ракира́ва, тумэ́нгэ, Наюдэ́нгэ: сыр мэ сом тумаро́ Апостоло, мэ древа́н кутякирава миро дынарибэ́н (служэниё);

¹⁴ ци на ґазда́ва мэ зэвлыныпэ́н дрэ мирэ́ пшалэ́ндэ, савэ́ исын ма́нгэ пир рат, соб (кай) тэ зракхав вари-савэ́ лэ́ндыр?

¹⁵ Ко́ли лэ́нгиро отгиибэн янэ́ла свэтоскэ рама́нё (миро) Дэвлэ́са, тэды со ж явэ́ла, ке́ли Дэвэ́л прилэ́ла лэн нэвэ́стыр? А дава́ явэ́ла сы́рбы отджидыибэн мулэ́ндыр.

¹⁶ Ко́ли исын свэ́нто англатуно́ хумэр (тясто), тэды свэ́нто явэ́ла и саро́ маро́. Ко́ли исын свэ́нто кокоро́ кашт (дрэ́во), тэды свэ́нта явэ́на и лэ́скирэ рандя́ (вэ́тки).

¹⁷ А ко́ли вари-савэ́ рандя́ отпхадинэ, а тут сыр хрустэнгири маслина прибарьякирды пэ лэ́нгиро штэ́то, и какана́ адя́кэ-паць, сыр и ёнэ, ту чаравэ́саспэ (хахавэ́саспэ) явирэ ранде́нца тхулэ́-оливитконэ́ каштэ́стыр,

¹⁸ то на шарпэ анги́л яви́р рандя́; а ко́ли ту шарэсапэ, тэды на бистыр, со на ту чаравэса (хахавэ́са) кашт, а ёв хахавэла тут.

¹⁹ Ту могинэ́са тэ пхэнэ́с какана́: “Рандя́ отпхадинэ ваш дова́, соб (кай) ман тэ прибарьякирэн.”

²⁰ Мишто́: ёнэ отпхадинэ пал пэ́скиро напатяибэн, а ту рикирэсапэ пал пэ́скиро патяибэ́н. Ракх кокори пэс, нэ дар:

²¹ пал-дова́ со, ко́ли Дэвэ́л на потангиндя ранден, савэ́ выбаринэ кадалэ́ каштэ́стыр, тэды дыкх, Ёв на явэ́ла тэ тангинэ́л и тут.

²² И адя́кэ, дыкх Дэвлэ́скиро тангипэ́н и строгима: кэ одолэ́, кон отпыя, – строгима, нэ кэ ту – Дэвлэ́скиро бахтало́ лачхипэ́н, ко́ли ту явэ́са тэ дживэ́с Лэ́скирэ бахталэ́ лачхипна́са, пал-дова́ со, ко́ли на адя́кэ, тэды и ту явэ́са чингирдо криг.

²³ Нэ и адя́кэ-паць одолэ́, савэ́ на явэ́на тэ дживэ́н дурэды́р пэ́скирэ патяибна́са, явэ́на нэвэ́стыр прибарьякирдэ; пал-дова́ со Дэвлэ́стэ исын зор нэвэ́стыр тэ прибарьякирэл лэн.

²⁴ Палдава́ со, ко́ли ту са́нас чингирдо криг оливитконэ́ каштэ́стыр пир бияныпэ́н, и на пир пэ́скиро бияныпэ́н, и тут прибарьякирдэ кэ лачхи́ оливи́тко раслина, то фэды́р сарэ́стыр прибарьёна долэ́ рандя́ кэ пэ́скиро оливи́тко кашт (дрэ́во), савэ́стыр ёнэ сыс отчингирдэ.

Дэвлэ́скиро Тангипэ́н (Жа́лима) пэ Сарэ́ндэ

²⁵ Палдава́ мэ на кама́м, пшала́лэ, тэ ячкирав тумэн дрэ наджиныбэн пал чораханыбэн, соб (кай) тумэ́ тэ на думинэн вучэ́с пал пэ́стэ, вари-савэ́ Юды ячнэ́ пхарэилытка и дава́ явэ́ла кэ одова́ часо, пака, кицы́ трэй Наюдэн, рисёна кэ Дэвэ́л;

²⁶ и адя́кэ саро́ Израилё зракхэ́лапэ. И сыр исын чхиндло́ пал дава́: “Зракхибнари явэ́ла Сионо́стыр; и Ёв отрискирэла бидэвлыткима Яковостыр.

²⁷ И дава́ Ма́ндыр лэ́нгэ доракирибэ́н, ке́ли Мэ злава грэ́хи лэ́ндыр.”

²⁸ Дро отлыджаибэн кэ бахталы́ зан (звесь), ёнэ ячнэ́ вэргэнца ваш тумэ́нгэ; нэ со отлыджалапэ кэ выкэдыибэн, ёнэ исын Дэвлэ́скирэ най дрогэдыр мануша́ пир лэ́нгирэ дадэндэ.

²⁹ Дэвлэ́скирэ таланы и Лэ́скиро прикхарибэн на парудёна.

³⁰ Палдава́ адя́кэ-паць, сыр и тумэ́ вари-ке́ли на кандынэ́ Дэвлэ́с, нэ какана́ Дэвэ́л потангиндя тумэн, пир дова́ со Юды на лынэ́ тэ кандэ́н,

³¹ адя́кэ-паць и ёнэ какана́ на кандынэ́ ваш дова́, соб (кай) и лэ́нгэ тэ явэ́л ла́ска пир Дэвлэ́скиро тангипэ́н, саво́ адя́кэ-паць сыс дыно́ тумэ́нгэ.

Шарибны́тко Сла́ва Дэвлэ́скэ

³² Дэвэ́л пролыджия сарэ́н манушэ́н пир накандыпэн, соб (кай) тэ сыкавэ́л Пэ́скиро тангипэ́н пэ лэ́ндэ.

³³ Акэ, саво́ баро́ барвалыпэ́н и годы́, и джиныбэ́н Дэвлэ́стэ! Сыр нашты́ тэ ґалёс, сыр Ёв сэндинэла и нашты́ тэ джинэ́с Лэ́скирэ дрома́!

³⁴ Кон уджиндя́, со Дэвэ́л думинэ́ла? Ци могиндя́ вари-кон Лэ́скэ тэ радинэл?

³⁵ Ци дыя́ вари-кон пэ́рво Лэ́скэ дро вужлыпэ́н, соб (кай) ёв тэ могинэл тэ дорэсэл (тэ долэл) палэ?

³⁶ Пал-дова́ со саро́ джа́ла Лэ́стыр и пир Лэ́стэ и ваш Лэ́скэ. Мэк тэ явэ́л сла́ва Лэ́скэ дрэ ве́ки! Ами́нь.