Римлянэнгэ 10 - Библия - Пэ Балтитко Романи чиб (Романэс) 2019

¹ Пшала́лэ! Шук мирэ́ илэскири и мангипэ́н кэ Дэвэ́л исын пал дова́, соб (кай) Израилё тэ явэ́л зракхно.

² Мэ сом лэ́нгиро якхи́тко (свидете́лё), со ёнэ зоралэ́с рикирэ́на сыр Дро́гима Дэвлэ́с дро пэ́скиро ило́ кэ зэвлыныпэ́н, нэ на пир джиныбэ́н.

³ Пал-дова́ со ёнэ на уджиндлэ́ Дэвлэ́скиро чачипэ́н, и чхувэ́нас зорья́са ёнэ пэ́скиро чачипэ́н, пал-дова́ ёнэ на чхудэ́ пэс тэл Дэвлэ́скиро чачипэ́н.

⁴ Зако́но кончындяпэ Христосо́са, соб (кай) кажно, кон патя́ла, тэ явэ́л приджиндло чачунэса.

Зракхибэ́н ваш Сарэ́нгэ

⁵ Мо́йза (Моисеё) чхинэла пал чачипэ́н пир Зако́но: “Со ману́ш, саво́ явэ́ла тэ кэрэ́л пир Зако́но, явэ́ла тэ дживэ́л Лэ́са.”

⁶ А чачипэ́н, саво́ исын патяибнастыр, ракирэ́ла адя́кэ: “На ра́кир дро пэ́скиро ило́: ‘Кон джа́ла упрэ́ пэ болыбэ́н?’” (Соб (кай) одотхы́р тэ янэл тэлэ́ Христосо́с упралыпнастыр)

⁷ ци ‘Кон могинэ́ла тэ змэкэлпэ тэл пхув?’ (Соб (кай) тэ ґаздэл Христосо́с мулэ́ндыр).

⁸ Со ракирэ́ла Свэ́нто Чхиныбэ́н? “Лав исын дыно́ ту́кэ, ёв исын дрэ тырэ́ ушта́ и дрэ тыро́ ило́”, ґа́да, исын дова́ лав, савэ́са амэ пхэна́са лав,

⁹ пал-дова́ со, ко́ли ту приґалёса тырэ́ уштэ́нца и явэ́са тэ ракирэ́с сарэ́нгэ, со ‘Ису́со исын Дэвэ́л’ и явэ́са тэ патяс тырэ́ илэ́са, со Дэвэ́л отджидякирдя́ Лэс мулэ́ндыр, тэды ту зракхэсапэ.

¹⁰ Пал-дова́ со, кон патя́ла илэ́са, дава́ патяибэ́н лыджа́ла кэ чачипэ́н, а кон приґалёла уштэ́нца, дава́ лыджа́ла кэ зракхибэ́н.

¹¹ Палдава́ Свэ́нто Чхиныбэ́н ракирэ́ла: “Кон патя́ла дрэ Лэ́стэ, одолэ́скэ на явэ́ла ладжаво.”

¹² Пал-дова́ со нанэ нисаво́ выкэдыибэн машки́р Юдэ́ндэ и Элинэ́нгэ (Грекэ́нгэ/Баламэ́нгэ); пал-дова́ со екх Одова́-паць Дэвэ́л исын ваш сарэ́нгэ, и Саво́ бахтякирэ́ла барвалэс сарэ́н, кон прикхарэла Лэс.

¹³ Пал-дова́ со со екх ману́ш, кон прикхарэла Дэвлэ́скиро лав, зракхэ́лапэ.

¹⁴ Нэ сыр сашты́ тэ прикхарэс Одолэ́с, дрэ Конэ́стэ ёнэ на упатя́ндынэ? И сыр лэ́нгэ тэ упатян дрэ Одолэ́стэ, пал Конэ́стэ ёнэ нисо́ на шундлэ́? И сыр ёнэ могинэ́на тэ шунэ́н, ко́ли нико́н на явэ́ла тэ пхэнэ́л лав лэ́нгэ?

¹⁵ Нэ сыр вари-кон явэ́ла тэ пхэнэ́л лав лэ́нгэ, ко́ли ёв на явэ́ла бичхадо́? Сыр исын чхиндло́ пал дава́: “Савэ бахталэ́ исын ґэра́ одолэ́ манушэ́нгирэ, савэ́ псирэ́на пир свэ́то и роспхэнэна бахталы́ зан пал рама́нё, пал Лэ́скирэ лачхэ́ рэ́нды.”

¹⁶ Нэ на сарэ́ Юды прилынэ́ бахталы́ зан (звесь). Палдава́ Исаё ракирэ́ла: “Раё Дэ́вла! Кон патяндыя дрэ амари́ бахталы́ зан (звесь).”

¹⁷ Патяибэ́н явэ́ла шуныбнастыр, а шуныбэ́н явэ́ла Дэвлэ́скирэ лавэ́ндыр.

¹⁸ Нэ мэ пхучава: “Нау́што (неужэли) ёнэ на шундлэ́? Шундлэ́, чачэс; лэ́нгири зан прогия́ пир сари́ пхув, и лэ́нгирэ лава́ сыс шундлэ́ пэ свэто́скирэ яго́ры (кра́и).”

¹⁹ Нэ мэ нэвэ́стыр ракира́ва: “Ци могинэ́ла адя́кэ тэ явэ́л, соб (кай) Израилё тэ на джинэ́л дава́? Мо́йза пэ́рво ракирдя́: ‘Мэ джангавава тумэн, соб (кай) тумэ́ тэ зэвлынэн пир одолэ́ манушэ́ндэ, савэ́ на гинэнапэ пал нацыя: мэ ґазда́ва дрэ тумэ́ндэ холы́ пир манушэ́ндэ, савэ́ на джинэ́на Ман.’”

²⁰ Исаё муршканэ́с ракирэ́ла: “Ман латхнэ́ одолэ́, савэ́ на родынэ Ман; Мэ сыкадём пэс одолэ́нгэ, савэ́ на пхучнэ́ пал Ма́ндэ.”

²¹ А Израилёскэ Ёв ракирэ́ла: “Саро́ дывэ́с Мэ протырдавас мирэ́ васта́ кэ адалэ́ мануша́, савэ́ на кандэ́на и кэрэ́на проти Ма́ндэ.”