Psalmy 97 - Библия - Пэ Балтитко Романи чиб (Романэс) 2019

¹ Рай Дэвэ́л кралинэла: мэк тэ радынэ́лпэ пхув, мэк тэ радынэ́нпэ бут бут островы (джипа́).

² Облоки и калыпэ́н исын трусця́л Лэ́стэ; чачипэ́н и чачуно́ сэ́ндо рикирэ́на лэ́скиро троно.

³ Яг джа́ла анги́л Лэ́стэ и хачкирэ́ла сарэ́са Лэ́скирэ сарэ́ вэргэ́н, савэ́ исын трусця́л Лэ́стэ

⁴ Лэ́скирэ блискави́цы екха́тыр (сра́зу) дэ́на дуд (свэ́то) трусця́л свэ́то: пхув дыкхэ́ла и издрала.

⁵ Бэ́рги биладёна, сыр мом анги́л Растэ-Дэвлэ́стэ, сарэ́ пхувьякирэстэ.

⁶ Болыбэ́н ракирэ́ла сарэ́нгэ пал лэ́скиро чачипэ́н и сарэ́ мануша́ дыкхэ́на Лэ́скири сла́ва.

⁷ Сарэ́, кон дынаринэла дэвлорэ́нгэ, со мануша́ вычхиндлэ́, явэ́на ладжакирдэ́ и одолэ́, савэ́ шарэнапэ идолэнца – сарэ́ дэвлорэ́ дэ́на паты́в Лэ́скэ.

⁸ Мануша́ Сионо́стыр шунэ́на и исын ра́да, и чхая́ Юдэя́тыр радынэ́напэ Тырэ́ сэндостыр, о Раё Дэ́вла.

⁹ Пал-дова́ со Ту, Раё Дэ́вла, сан Сано (Най) Вучэды́р сарэ́стыр пир пхув; Ту сан ґаздыно́ древа́н вучэды́р сарэ́ дэвлорэндыр.

¹⁰ Тумэ́, кон рикирэ́ла Рас-Дэвлэ́с сыр Дро́гима дро ило́, бидыкхэн чорипэ́н: “Ёв приракхэла дия́ Пэ́скирэ Свэнтонэнгиро, Ёв зракхэ́ла лэн вастэ́стыр чорэ́ манушэ́ндыр.”

¹¹ Дуд джа́ла тэлэ́ пэ чачипнаскирэндэ, и ра́дыма пэ одолэ́ндэ, конэ́стэ исын чачуно́ ило́.

¹² Радынэ́нпэ Ра́стыр-Дэвлэ́стыр, тумэ́ чачипнаскирэ; парикирэ́н и славинэ́н лэ́скиро Свэ́нто Лав.