Psalmy 95 - Библия - Пэ Балтитко Романи чиб (Романэс) 2019

¹ Явэ́н тэ багас зоралэ́с Ра́скэ-Дэвлэ́скэ, явэ́н тэ багас зоралэ́с радыма́тыр бэргакэ, сави́ зракхэ́ла амэн;

² явэ́н тэ заджа́н анги́л Лэ́стэ шарибнаса, явэ́н тэ радынаспэ зоралэ́с псалмэнца анги́л Лэ́стэ.

³ Пал-дова́ со Рай Дэвэ́л исын баро́ Дэвэ́л и баро́ Кра́ли, Саво́ исын вучэды́р сарэ́ дэвлорэндыр.

⁴ Ёв исын хула́й пэ хор штэ́ты пэ пхув, и адя́кэ-паць пэ вучипэна́ бэргэнгирэ.

⁵ Ёв исын хула́й пэ мо́рё (дэрья́в), и Ёв создыя́ лэс и Лэ́скирэ васта́ создынэ пхув.

⁶ Явэ́н тэ дас паты́в Лэ́скэ и тэ бандякирас тэлэ́ шэрэ́, явэ́н тэ пэрас пэ чанга́ анги́л Растэ-Дэвлэ́стэ, Саво́ создыя́ амэн.

⁷ Пал-дова́ со Ёв исын амаро́ Дэвэ́л: и амэ сам мануша́ чаритконэ пхувья́тыр, амэ сам бакрэ́ Лэ́скирэ вастэ́стыр.

⁸ Ададывэ́с, сыр тумэ́ шунэ́на Лэ́скири зан: “На отрискирэн пэ́скирэ илэ, сыр дрэ Мэрива, сыр дро дывэ́с пал патяибэ́н (Маса́) пэ чхучи́ пхув;

⁹ ке́ли тумарэ́ дада́ пропатякирэнас ман, ёнэ спробинэнас Ман и ёнэ дыкхнэ́ мири́ буты́.

¹⁰ Штардэша́ бэрш дава́ ро́до калякирдя Миро ило́ и Мэ пхэндём: ‘Адалэ́ исын мануша́, савэ́ заблэндындлэпэ, и ёнэ на джинэ́на Мирэ́ дрома́.

¹¹ Палдова́ мэ и совлахадём дрэ Пэ́скири холы́: “Ёнэ на заджа́на пэ Миро штэ́то тэ откхинён.’”