Psalmy 94 - Библия - Пэ Балтитко Романи чиб (Романэс) 2019

¹ О, Раё Дэ́вла, Саво́ чхувэ́ла ка́ра, Дэвлалэ, Саво́ чхувэ́ла ка́ра (хась), сыкадёв Кокоро́.

² Газдэ Пэс, Ту, Сэнда́ри, пир сари́ пхув, сэндякир чачунэ́с пхутькирдэн.

³ О, Раё Дэ́вла, кицы́ явэ́на фуй мануша́, кицы́ явэ́на фуй мануша́ тэ радынэ́нпэ?

⁴ Ёнэ выпхэнэнапэ, ёнэ ракирэ́на бариканэс, сарэ́, кон кэрэ́ла чорипэ́н, пхутёна пэ́са.

⁵ Ёнэ роспхаравэна Тырэ́ манушэ́н пэ котэра́ (куски), о Раё Дэ́вла, ёнэ притасавэ́на Тыро́ миштыпэ́н;

⁶ ёнэ замарэна пивлен (удовэн) и чужонэ́ манушэ́н и мулякирэна пиротэн (сиротэн).

⁷ И ёнэ ракирэ́на: “Рай Дэвэ́л на дыкхэла дава́, ци Израилёскиро Дэвэ́л на рискирэ́ла годы́ пэ дава́.

⁸ Ѓалён тумэ́, хрустэнгирэ (бигодякирэ), машки́р манушэ́ндэ; тумэ́ сан дылынэ́, ке́ли тумэ́ явэ́на годэ́?

⁹ Ци на дошунэла Одова́, Кон чхудя́ кан? Ци на додыкхэла Одова́, кон кэрдя́ якх?

¹⁰ Ци на явэ́ла тэ сэндякирял Одова́, Кон сыклякирэ́ла на́цыи? Кодова́, Саво́ дэ́ла годы́ манушэ́нгэ?

¹¹ Рай Дэвэ́л джинэ́ла манушэ́нгирэ ду́мы, со ёнэ исын хартытка (суетна).

¹² Бахтало́ исын ману́ш, савэ́скэ Ту дэ́са годы́, о Раё Дэ́вла, савэ́с Ту сыклякирэса Тырэ́ Законоскэ,

¹³ соб (кай) Ту тэ дэс лэ́скэ тэ откхинёл пхарэ́ дывэсэ́ндыр, пака ґанби́н (яма) явэ́ла тэ ґанавэлпэ ваш фуе́ манушэ́нгэ.

¹⁴ Пал-дова́ со Рай Дэвэ́л на ячкирэ́ла Пэ́скирэ манушэ́н, и Ёв на мэкэ́ла одолэ́н, савэ́ исын сы́рбы лэ́скиро мэкно́ миштыпэ́н;

¹⁵ нэ Лэ́скиро сэ́ндо явэ́ла нэвэ́стыр чачуно́, а одолэ́, конэ́стэ исын чачуно́ ило́, явэ́на тэ джа́н пал дава́ дурэды́р.

¹⁶ Кон явэ́ла тэ затэрдёл пал ма́ндэ анги́л одолэ́ндэ, савэ́ кэрэ́на чорипэ́н? Кон явэ́ла тэ рикирэ́л мири́ риг проти одолэ́ндэ, савэ́ кэрэ́на бэда рэ́нды (злыднитка де́лы)?

¹⁷ Ко́ли на дэ́лас васт ма́нгэ Рай Дэвэ́л, тэды миро ди ґара́ явэ́лас одо́й, кай исын мэрибнытко штылыпэн.

¹⁸ Сыр мэ пхэна́ва: “Мири́ ґэро́й кунинэлапэ, тэды Тыри́ лачхэ́-илы́ткима, о Раё Дэ́вла, подрикирэ́ла ман,

¹⁹ Ке́ли мирэ́ ду́мы пхэрдякирэна миро шэро́, буты́р и буты́р, тэды Ту подрикирэса и обрадынэса миро ду́хо (фа́но).

²⁰ Ту на явэ́са кхэтанэ́ чорэ́ ранца, савэ́ придуминэна фуипэ́н заме́ст одова́, со исын дро Зако́но.

²¹ Ёнэ скэдэ́напэ кхэтанэ́ тэ мулякирэ́н чачипнаскирэ манушэ́с, ёнэ бангякирэна бибангэ манушэ́с, соб (кай) тэ прочхувэн лэ́скиро рат.

²² Нэ Рай Дэвэ́л явэ́ла тэ затэрдёл пал ма́ндэ тэ бронинэл ман; и миро Дэвэ́л исын сыр бэ́рга ма́нгэ тэ ґарадёвав.

²³ Ёв рискирэ́ла пэ лэ́ндэ лэ́нгиро чорипэ́н, и Ёв хасякирэ́ла лэн лэ́нгирэ фуипнаса, Рай Дэвэ́л, амаро́ Дэвэ́л, чхурдэ́ла лэн тэ хасён.