Psalmy 92 - Библия - Пэ Балтитко Романи чиб (Романэс) 2019

¹ Пса́лмо Гилы́ ваш Са́вато.

² Дава́ исын мишто́ тэ парикирас Ра́скэ-Дэвлэ́скэ, и тэ багас шарибнытка гиля́ Тырэ́ лавэ́скэ, о Най Вучэдырэскиро;

³ тасярлатыр тэ ракирас сарэ́нгэ пал Тыри́ лачхэ́-илы́ткима, и кажно рат пал Тыро́ патяибэ́н,

⁴ башави пэ дэшэ-балытко струменто, и пэ лута и пэ гусли дескирэ мелодияса.

⁵ Пал-дова́ со Ту обрадындян ман Пэ́скирэ бутенца, мэ ява́ва тэ бага́в зоралэ́с и радыма́кирэс, со Тырэ́ васта́ кэрдэ́.

⁶ О, Раё Дэ́вла! Савэ барэ́ исын рэ́нды (де́лы), со Ту кэрдя́н! Савэ хор исын Тырэ́ ду́мы!

⁷ Набарэ́-годя́киро ману́ш на джинэ́ла дава́, дылыно́ на галёла:

⁸ ке́ли фуй мануша́ барьёна сыр чар и мэк кодолэ́, савэ́ кэрэ́на чорипэ́н, мэк ёнэ тэ явэ́н най шукарэдыр дро джиибэ́н, сароекх Дэвэ́л хасякирэ́ла лэн пэ ўса́ды (сак).

⁹ И Ту, Раё Дэ́вла, сан вучэды́р сарэ́стыр пэ сарэ́ ве́ки.

¹⁰ Пал-дова́ со, акэ, Тырэ́ вэ́рги, Раё Дэ́вла: акэ, Тырэ́ вэ́рги хасёна и сарэ́, кон кэрэ́ла чорипэ́н, явэ́на росчхурдынэ.

¹¹ Нэ Ту ґаздэса мири́ зор сы́рбы шынга́ (ро́ги) рискирибна́скирэ гурувэстэ: и мэ сом помакхно ялунэ (свяжонэ) оливитконэ дзэтэса (елеёса).

¹² Мирэ́ якха́ явэ́на тэ радынэ́нпэ, дыкх, со кэрэ́лапэ вэргэнца; мирэ́ кана́ явэ́на тэ шунэ́н радыма́са, со кэрэ́лапэ фуе́ манушэ́нца, савэ́ ґаздынэ́пэ пэ ма́ндэ.

¹³ Чачуно́ ману́ш явэ́ла най шукарэдыр, сыр пальма ёв явэ́ла тэ барьёл, сыр кедро дро Лива́но.

¹⁴ Ёв исын сы́рбы рандь (вэтка), со исын чхуды́ дрэ Ра́скирэ-Дэвлэ́скиро Кхэр, пэ Дэвлэ́скирэ грэды (дворы) ёв явэ́ла най шукарэдыр.

¹⁵ Ёв явэ́ла дрэ зор дрэ пхуранэ́ бэрша́, ёв явэ́ла соко́са (хумэ́са) и зэлэно,

¹⁶ [р.с.] соб (кай) тэ сыкавэ́н сарэ́нгэ, со Рай Дэвэ́л исын чачипна́скиро, и Ёв исын сы́рбы ска́ла, нанэ начачипэ́н дрэ Лэ́стэ.