Psalmy 91 - Библия - Пэ Балтитко Романи чиб (Романэс) 2019

¹ Кодова́, Саво́ дживэ́ла дро Най Вучэдырэскиро штэ́то, явэ́ла тэ дживэ́л тэл Сарэзорьякири зэр (тенё).

² И ёв тэ пхэнэ́л Ра́скэ-Дэвлэ́скэ: “Миро гарадыипэн и мири́ тва́рдыма (диз). Миро Дэ́вла! Мэ рисёва́ва кэ Ту тэ зракхавпэ.”

³ Чачо́, Ёв вытырдэла тут чирикларискирэ (ловцоскирэ) фэлятыр, хасибнытконэ франсэндыр.

⁴ Ёв учхакирэ́ла тут Пэ́скирэ порэнца и ту латхэса гарадаипэн тэл Лэ́скирэ пхака́: лэ́скиро чачипэ́н явэ́ла тэ бронинэл и тэ затэрдёл пал Ту́тэ.

⁵ Ту на явэ́са тэ дарэс трашаибнастыр раты́, и марибнытконэ́ бустятыр (стрелатыр), со вурняла дывэсэ́;

⁶ и франсэндыр (язватыр), со псирэ́на раты́, ци хасякирибнытконэ моровостыр (заразатыр), со чорьёла дывэсэ́.

⁷ Мэк тысёнцо (бар) манушэ́н тэ пэрэ́н пашы́л тыри́ риг, и дэш бара́ паш тыри́ чачи́ (право) риг, нэ нисо́ на подджа́ла пашылэды́р кэ ту.

⁸ Ту фэ́ни явэ́са тэ дыкхэ́с пэ́скирэ якхэ́нца и дыкхэ́са отплэскирибэн фуе́ манушэ́нгэ.

⁹ Пал-дова́ со ту пхэндя́н “Раё Дэ́вла, Ту сан миро ґарадыипэн”, ту выкэдыян Най Вучэдырэскирэс тэ затэрдёл (тэ бронинэл) тут.

¹⁰ Ѓа́да, чорипэ́н на пирилэла тут и моро́вы на явэ́на пашы́л Тыри́ ша́тра.

¹¹ Пал-дова́ со Дэвэ́л дэ́ла припхэныбэ́н Лэ́скирэ Янголэнгэ тэ дыкхэ́н пал Ту́тэ:

¹² ёнэ явэ́на тэ лыджа́н тут пэ пэ́скирэ васта́, соб (кай) ту тэ на пэкавэс Пэ́скири ґэро́й пир бар.

¹³ Ту явэ́са тэ штавэс (тэ стэмпинэс упрэ́) пэ шчэрэстэ (левостэ) и сапэстэ ци ту штакирэса (тэ топчынэс) шчэрорэс и драконос.

¹⁴ “Пал-дова́ со лэ́скэ яцём дро́го Мэ”, – ракирэ́ла Рай Дэвэ́л, – “Мэ зракха́ва лэс, Мэ чхува́ва вучэ́с лэс, пал-дова́ со ёв джинэ́ла Миро лав.

¹⁵ Ёв прикхарэла Ман и Мэ отпхэнава лэ́скэ, Мэ ява́ва лэ́са, ке́ли явэ́ла пхаро́ лэ́скэ, Мэ зракха́ва лэс и Мэ ява́ва тэ кутякирав лэс.

¹⁶ Мэ да́ва чалэ́с джиибэ́н лэ́скэ и сыкава́ва лэ́скэ, сыр Мэ зракха́ва лэс.”