Psalmy 9 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Пэ Мелодия пэ Гилы́. Пал Лабеноскиро Мэрибэ́н. Давидо́скиро Пса́лмо.

² Мэ парикирава Ра́скэ-Дэвлэ́скэ сарэ́ мирэ́ илэ́стыр, Мэ пирипхэнава пал сарэ́ Тырэ́ ди́вна бутя́,

³ Мэ ява́ва лошало (весёло) и ява́ва тэ радынавпэ дрэ Ту́тэ, Мэ ява́ва тэ шара́в Тыро́ лав, О Са́мо Вучэды́р.

⁴ Ке́ли вэ́рги дэнапэ палэ, тэды ёнэ пэрэ́на и хасёна анги́л Тыро́ муй.

⁵ Ту сэндякирдян пир миро рэ́ндо и латхян миро чачипэ́н: Ту сан бэшто́ пэ троно и сэндякирэса чачунэ́с.

⁶ Ту штылякирдян Наюды́тка на́цыи, Ту хасякирдян бэдэн (бидэн), Ту кхосцян криг лэ́нгирэ лава́ пэ сарэ́ ве́ки.

⁷ А вэ́рги хасинэ́ сарэ́са, Ту хасякирдян адя́кэ-паць фо́рья, со аж бистырдэ пал лэ́ндэ.

⁸ Нэ Рай Дэвэ́л исын бэшто́ пэ сарэ́ ве́ки, Ёв чхудя́ Пэ́скиро троно тэ сэндякирэ́л.

⁹ И Ёв явэ́ла тэ сэндякирэ́л свэ́то чачипна́са, Ёв явэ́ла тэ сэндякирэ́л манушэ́н, сыр трэй тэ явэ́л.

¹⁰ Ёв явэ́ла тэ зракхэ́л дро Пэ́скиро баро́ кхэр одолэ́н, конэ́с тасавэна, кай явэ́на тэ ґарадён дрэ пхарэ́ дывэса́.

¹¹ А одолэ́, савэ́ джинэ́на Тыро́ лав, явэ́на тэ патя́н дрэ Ту́тэ, со Ту, Раё Дэ́вла, на мэкцян ни екхэ́с, кон родэ́ла Тут.

¹² Бага́н и шарэ́н Рас-Дэвлэ́с, Саво́ кралинэла пэ Сио́но! Пхэнэ́н сарэ́ нацыенгэ, со Ёв кэрдя́.

¹³ Со Ёв чхувэ́ла ка́ра пал манушы́тко рат, Ёв рипирэла одолэ́н, кон страдынэла.

¹⁴ Тангинэ (пожалин) ман, Раё Дэ́вла; дыкх ракхунэс сарэ́ илэ́стыр пэ миро страдицо (би́да) вэргэ́ндыр, зра́кх ман мэрибна́стыр, со сашты́ тэ явэ́л рига́тыр,

¹⁵ Соб (кай) мэ тэ тэрдёвав анги́л манушэ́ндэ Сионо́стыр, и тэ роспхэнав пал со трэй тэ шарэ́н Тут. Мэ ява́ва тэ радынавпэ, со Ту зракхця́н ман.

¹⁶ Наюды́тка на́цыи пэрэ́на дрэ ґанби́н, со ёнэ выґанадэ, лэ́нгирэ ґэра́ пэрэ́на дрэ фэлы́, со ёнэ гарадэ́.

¹⁷ Рай Дэвэ́л сыкадя́ Пэс, Кон Ёв исын, ке́ли Ёв лыджия́ сэндытка рэ́нды чачипна́са; фуй мануша́ хасёна далэ́стыр, со ёнэ кэрдэ́ пэ́скирэ вастэ́нца. Штыл (тихо) мелодия. Сэ́ла.

¹⁸ Фуй мануша́ джа́на пир дром тэ хасён, и сарэ́ Наюды́тка на́цыи, савэ́ бистрэна пал Дэвлэ́стэ.

¹⁹ Дэвэ́л на бистрэла кодолэ́н, савэ́ исын бизорья́кирэ, и на хасякирэ́ла чорорэнгири наде́я, савэ́ ўса́ды (сак) ужакирэ́на Лэс.

²⁰ Тэрдёв анги́л, Раё Дэ́вла, соб (кай) мануша́ тэ на лэн упралыпэ́н, мэк Наюды́тка на́цыи тэ на нашэ́н Тырэ́ сэндостыр.

²¹ Чхув сэндарис пэ лэ́ндэ, Раё Дэ́вла, мэк кадалэ́ Наюды́тка мануша́ тэ джинэ́н, со ёнэ исын фэ́ни мануша́ и, савэ́ адя́кэ-паць мэрэ́на. Сэ́ла.