Psalmy 89 - Библия - Пэ Балтитко Романи чиб (Романэс) 2019

¹ Сыклякирибнаскири Гилы́ Ефаностыр Эзрахитостыр.

² Мэ ўса́ды (сак) ява́ва тэ бага́в пал Ра́скирэ-Дэвлэ́скири лачхэ́-илы́ткима мирэ́ мо́са, нэ мэ ява́ва тэ роспхэнав сарэ́нгэ пал Тыро́ патяибэ́н родо́стыр кэ ро́до.

³ Пал-дова́ со мэ пхэндём: “Лачхэ́-илы́ткима явэ́ла тэ ячэ́лпэ пэ сарэ́ ве́ки.” Ту зорьякирдян Пэ́скиро патяибэ́н аж кэ са́мо болыбэ́н.

⁴ Мэ счхудём завето Мирэ́ выкэдынэ́ манушэ́нца. Мэ совлахадём Давидо́скэ, мирэ́ писхари́скэ.

⁵ Мэ да́ва зор Тырэ́ родо́скэ пэ сарэ́ ве́ки, и ґазда́ва Тыро́ троно пэ сарэ́ ро́ды. Сэ́ла.

⁶ И болыбна́скирэ Янго́лы явэ́на тэ шарэ́н Тут пал Тырэ́ ди́вы, Раё Дэ́вла, адя́кэ-паць пал Тыро́ патяибэ́н пэ свэнтонэнгиро скэдыибэ́н.

⁷ Кон пэ болыбэ́н исын равно Ра́скэ-Дэвлэ́скэ? Конэ́с машки́р болыбна́скирэ Янголэндэ сашты́ тэ припарувэн Ра́са-Дэвлэ́са.

⁸ Дэвэ́л исын баро́ кэ дар пэ свэнтонэнгиро скэдыибэ́н, Ёв исын зоралыпнаскиро, соб (кай) сарэ́, кон исын пашы́л Лэ́стэ, тэ дэн бари паты́в Лэ́скэ.

⁹ О, Раё Дэ́вла, Дэвэ́л болыбна́скирэ-янголэ́нгиро! Конэ́стэ исын дасаво зоралыпэ́н сыр Ту́тэ, Раё Дэ́вла? Ту сан патяибны́тко дро саро́.

¹⁰ Ту рикирэса зор пэ мо́рё (дэрья́в), сыр ёв холямэс ґлуминэла: ке́ли лэ́скирэ валны ґаздэ́напэ вучэ́с, Ту штылякирэса лэн.

¹¹ Ту пхарадян Еги́пто пэ котэра́, сыр кодолэ́с, кон исын мулякирдо; Ту росчхурдыян Тырэ вэргэ́н Тырэ зоралыпнаскирэ вастэ́са.

¹² Тыро́ исын болыбэ́н и Тыри́ исын пхув, свэ́то и саро́, со́са ёв исын пхэрдо́. Ту зачхудян лэн.

¹³ Ту создыян паш-рати́тко и паш-дывэсы́тко риг, Фаворо и Ермоно радынэ́напэ Тырэ́ лавэ́стыр.

¹⁴ Тыро́ псико́ исын зоралыпнаскиро; зорало́ исын Тыро́ васт, вучо́ исын Тыро́ чачо́ васт.

¹⁵ Чачипэ́н и чачуно́ сэ́ндо рикирэ́на Тыро́ троно, лачхэ́-илы́ткима и патяибэ́н джа́на анги́л Ту́тэ.

¹⁶ Бахталэ́ исын мануша́, савэ́ джинэ́на ра́дыма Тырэ́ заня́тыр (глося́тыр): ёнэ дживэ́на пир дуд (свэ́то), саво́ джа́ла Ту́тыр.

¹⁷ Ёнэ цэ́ло дывэ́с радынэ́напэ Тырэ́ лавэ́стыр; и ёнэ ґаздэ́напэ радыма́са Тырэ́ чачипнастыр.

¹⁸ Пал-дова́ со Ту дэ́са сла́ва лэ́нгирэ зорьякэ, и Ту ґаздэса амэн вучэ́с Тырэ́ ласкаса.

¹⁹ Пал-дова́ со Рай Дэвэ́л исын амаро́ шчы́то, и амаро́ Кра́ли исын Свэнтонэ́ Израилёстыр.

²⁰ Вари-сыр Ту ракирдян дро суно́ Пэ́скирэ Свэнтонэскэ и Ту пхэндя́н: “Мэ дыём васт екхэ муршканэскэ, Мэ ґаздыём лэс пэ троно, савэ́с Мэ выкэдыём манушэ́ндыр.

²¹ Мэ латхём Мирэ́ писхари́с Давидо́с, мэ помакхцём лэс Мирэ́ свэнтонэ́ оливитконэ дзэтэса (елеёса):

²² Мэ чхува́ва Пэ́скири бурнык (ладожка) тэ подрикирав лэс, и Миро васт явэ́ла тэ зорьякирэл лэс.

²³ Вэ́рго на дэ́ла дукха́ лэс и чоро ману́ш на притасавэла лэс.

²⁴ И мэ пхаравава лэ́скирэ вэргэ́н анги́л лэ́скиро муй, и Мэ равава одолэ́н, савэ́ бидыкхэна лэс.

²⁵ И Миро патяибэ́н и дро́го лачхипэ́н явэ́на лэ́са и лэ́скиро ро́до явэ́ла ґаздыно́ шарибнаса Мирэ́ лавэ́са.

²⁶ Мэ чхува́ва лэ́скиро васт пэ мо́рё (дэрья́в) и лэ́скиро чачо́ васт пэ рэ́ки (лэня́).

²⁷ Ёв явэ́ла тэ дэл го́дла Ма́нгэ! Ту сан миро Дад, миро Дэвэ́л и Ска́ла тэ зракхавпэ.”

²⁸ Мэ кэра́ва лэс Мирэ́ пэрвонэса (англатунэса), саво́ явэ́ла са́мо вучо́ пхувья́кирэ кральендыр.

²⁹ Мэ ява́ва тэ ракхав Мири́ лачхэ́-илы́ткима пэ сарэ́ ве́ки, и Миро завето ячэ́лапэ твардэс лэ́са.

³⁰ И мэ ўса́ды (сак) ява́ва тэ зорьякирав лэ́скирэ чхавэ́н и лэ́скиро троно явэ́ла ада́кицы дывэса́, кицы́ исын болыбэ́н.

³¹ Ко́ли лэ́скирэ чхавэ́ мэкэ́на Ман, и на явэ́на тэ дживэ́н пир Мирэ́ припхэныбэна́;

³² пал-дова́ со ёнэ явэ́на тэ пхагирэн Мирэ́ стату́ты (уставы) и на явэ́на тэ ракхэ́н Мирэ́ припхэныбэна́:

³³ тэды Мэ чхува́ва ка́ра дэстэса пэ лэ́ндэ пал лэ́нгирэ чорэ́ рэ́нды, и Мэ пэкавава лэн пал лэ́нгирэ грэ́хи.

³⁴ Нэ мэ на лава́ криг Мири́ лачхэ́-илы́ткима Давидостыр и Мэ на домэкава, соб (кай) миро патяибэ́н тэ хасёл;

³⁵ Мэ на пхагирава Миро завето, Мэ на парувава дова́, со выгия́ Мирэ́ мо́стыр.

³⁶ Екхвар мэ совлахадём Мирэ́ Свэнтымаса, со мэ ние́кхвар на хохавава Давидо́с:

³⁷ лэ́скиро ро́до ўса́ды (сак) ячэ́лапэ и лэ́скиро троно явэ́ла ґара́ (длу́гэс), сыр кхам, со свэнцынэла анги́л Ма́ндэ.

³⁸ Ёв явэ́ла ўса́ды (сак) сыр чхон и сыр патяибны́тко якхи́тко пэ болыбэ́н. Сэ́ла.

³⁹ Нэ Ту, Раё Дэ́вла, ячкирдян и на прилыян Лэс, Ту са́нас древа́н холямо́ пэ Тырэ́ помакхнэ писхаристэ,

⁴⁰ Ту рисиян криг Заветостыр, со Ту дыя́н Тырэ́ дынари́скэ, Ту чхурдыян вя́нка (коро́на) пэ пхув.

⁴¹ Ту пхагирдян сарэ́ лэ́скирэ форо́скирэ ограды, Ту пирикэрдян сарэ́ форо́скирэ рикирибэна дрэ радэ бара́.

⁴² Сарэ́, кон джа́ла маму́й, обчорэна лэс, а сарэ́ пашатунэ́ обракирэна лэс.

⁴³ Ту дыя́н зор манушэ́скирэ чачэ́ вастэскэ; саво́ притасавэлас лэс, Ту кэрдя́н, соб (кай) сарэ́ лэ́скирэ вэ́рги тэ радынэ́нпэ:

⁴⁴ ґа́да, Ту тэмпякирдян лэ́скирэ-курталакири во́стрима (чолыпэ́н), и Ту на ґаздыян лэс дро марибэ́н.

⁴⁵ Ту кэрдя́н, со лэ́скири сла́ва пирияця́ тэ зяинэл и Ту чхурдыян пэ пхув лэ́скиро троно;

⁴⁶ Ту кэрдя́н тыкнэды́р лэ́скирэ тырнэ бэрша́, Ту учхакирдян лэс ладжаса. Сэ́ла.

⁴⁷ О, Раё Дэ́вла! Кицы́ явэ́са Ту тэ гарадёс? Ци явэ́ла Тыри́ бари холын тэ хачол сыр яг?

⁴⁸ Ри́пир, мэ мангав Тут: саво́ миро джиибэ́н исын. Ваш саво́ харныпэ́н (суе́та) Ту создыян манушытконэ́ чхавэ́н?

⁴⁹ Саво́ ману́ш сашты́ тэ дживэ́л и тэ на дыкхэ́л мэрибэ́н? Ци зракхэ́ла ёв пэ́скиро ди люноскирэ зорья́тыр? Сэ́ла.

⁵⁰ О, Раё Дэ́вла, кай исын Тыро́ дро́го лачхипэ́н, саво́ ґарэдыр сыс Ту́тэ, со Ту совлахадян Давидо́скэ Тырэ́ патяибна́са?

⁵¹ Ри́пир, о, Раё Дэ́вла, сыр обракирэна Тырэ́ дынари́с! Со мэ пирилыджиём пал брэк, сыр бут мануша́ обракирэна,

⁵² со́са Тырэ́ вэ́рги прокошэна Тут, о Раё Дэ́вла, со́са ёнэ прокошэна пенты (кхурья́) Тырэ́ помакхнэскэ?

⁵³ [р.с.] Тэ шарэ́н усады (сак) Рас-Дэвлэ́с. Ами́нь и ами́нь.