Psalmy 86 - Библия - Пэ Балтитко Романи чиб (Романэс) 2019

¹ Давидоскири Па́тери (Моли́тва). О, Раё Дэ́вла, причху́в тэлэ́ Тыро́ кан, отпхэн ма́нгэ, пал-дова́ со мэ сом чороро́ и дрэ трэ́бима.

² Ракх миро ди, пал-дова́ со мэ сом дэвлы́тко. Ту сан, миро Дэ́вла, Саво́ зракхэ́ла Пэ́скирэ писхари́с, кон рисёла кэ Ту тэ зракхэлпэ.

³ Яв тангипнаскиро кэ мэ, о Раё Дэ́вла, пал-дова́ со, мэ со дывэ́с прикхарава Тут сарэ́ зорья́тыр.

⁴ Обрадын Тырэ́-писхарискиро ди, пал-дова́ со мэ ґазда́ва пэ́скиро ди кэ Ту, Раё Дэ́вла.

⁵ Пал-дова́ со Ту, Раё Дэ́вла, сан лачхо́ и Ту камэ́са тэ примангэс: Ту сан барвало́ лачхэ́-илыткимаса сарэ́нгэ, кон прикхарэла Тут.

⁶ Причху́в кан, о Раё Дэ́вла, сыр мэ мангавапэ Ту́кэ, пришунпэ кэ мангипэ́н, сыр мануша́ прикхарэна Тут.

⁷ Мэ ява́ва тэ прикхарав Тут дро дывэ́с, сыр исын пхаро́ ма́нгэ, пал-дова́ со Ту отпхэнэса ма́нгэ.

⁸ Нанэ ние́кх дасаво машки́р дэвлорэндэ, сыр Ту сан, Раё Дэ́вла, ние́кх на кэрэ́ла дасавэ́ бутя́, сыр Ту.

⁹ Сарэ́ на́цыи, савэ́ Ту создыян, явэ́на и дэ́на паты́в Ту́кэ. О, Раё Дэ́вла, ёнэ дэ́на сла́ва Тырэ́ лавэ́скэ.

¹⁰ Пал-дова́ со Ту сан баро́ кэ вучипэ́н и кэрэ́са барэ́ ди́вна бутя́: Ту сан фэ́ни (то́ка) Екх Дэвэ́л.

¹¹ Сыкля́кир ман тэ псирав Тырэ́ дромэ́са, Раё Дэ́вла. Мэ ява́ва тэ джива́в пир Тыро́ патяибэ́н: кэр адя́кэ, соб (кай) дро миро ило́ тэ явэ́л трашаибэ́н анги́л Дэвлэ́стэ.

¹² Мэ ява́ва тэ шара́в Тут сарэ́ мирэ́ илэ́стыр, о Раё Дэ́вла, миро Дэвэ́л, и мэ ява́ва тэ славинав Тыро́ лав пэ сарэ́ ве́ки.

¹³ Пал-дова́ со Тыри́ лачхэ́-илы́ткима исын бари кэ вучипэ́н и Ту вытырдыян миро ди самонэ тэлатунэ́ люностыр (адостыр).

¹⁴ О, Дэ́вла! Пхутькирдэ́ мануша́ ґаздынэ́пэ пэ ма́ндэ и нахратонэ-манушэ́нгиро скопо родэлас тэ замарэ́н ман, и ёнэ на рикирэ́на Тут дрэ годы́ анги́л пэ́стэ.

¹⁵ Нэ Ту, о Раё Дэ́вла, сан лачхэ́-илэ́скиро Дэвэ́л, тангипнаскирэ и вырикирибнытко, Ту сан барвало́ пэ лачхэ́-илы́ткима и патяибэ́н.

¹⁶ Рисёв кэ мэ и яв тангипнаскиро кэ мэ, пиридэ Тыро́ зоралыпэ́н Тырэ́ писхари́скэ и ракх Тырэ́-писхарицакирэ чхавэ́с.

¹⁷ Сыка́в Тырэ́-лачхипнаскири ґерты́к (знаме́ниё), соб (кай) одолэ́, савэ́ на камэ́на ман зоралэ́с, могинэ́нас тэ дыкхэ́н и ёнэ явэ́нас ладжакирдэ́, пал-дова́ со Ту, Раё Дэ́вла, дыя́н васт ма́нгэ и подрикирдян ман.