Psalmy 85 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Пса́лмо Кареёскирэ-Чхавэ́нгиро.

² О, Раё Дэ́вла! Ту потангиндян Пэ́скири пхув; Ту рискирдян палэ Израилё плено́стыр:

³ Ту примангдян саро́ чорипэ́н Тырэ́ манушэ́нгэ, Ту отмэкцян сарэ́ лэ́нгирэ грэ́хи. Сэ́ла.

⁴ Ту скэдыян кэ Пэ сари́ Пэ́скири бари холын, Ту порисиян Тырэ́-холынакирэ ягатыр.

⁵ Дэ́вла! Ту, Саво́ зракхэ́са амэн. Ри́скир палэ амэн, кэр адя́кэ, соб (кай) Тырэ́ холякири зор тэ пириячэл пэ амэ́ндэ,

⁶ Ци явэ́са Ту ўса́ды (сак) тэ холясос пэ амэ́ндэ. Ци явэ́ла Тыри́ холы́ дурэды́р тэ явэ́л пэ сарэ́ ро́ды?

⁷ Ци отджидякирэса Ту нэвэ́стыр амэн, соб (кай) мирэ́ мануша́ могинэ́нас тэ радынэ́нпэ дрэ Ту́тэ?

⁸ Сыка́в амэ́нгэ Тыро́ тангипэ́н, о Раё Дэ́вла, и дэ амэ́нгэ Тыро́ зракхибэ́н.

⁹ Мэ ява́ва тэ шунав, со Рай Дэвэ́л, Дэвэ́л пхэнэ́ла: пал-дова́ со Ёв явэ́ла тэ ракирэ́л пал рама́нё (миро) Пэ́скирэ манушэ́нгэ и Пэ́скирэ дэвлытконэнгэ, соб (кай) ёнэ тэ на пэрэ́н нэвэ́стыр дро дылныпэ́н.

¹⁰ Чачо́, лэ́скиро зракхибэ́н явэ́ла пашы́л одолэ́ндэ, савэ́ндэ исын трашаибэ́н анги́л Лэ́стэ, соб (кай) Дэвлэ́скири сла́ва тэ явэ́л пир амари́ пхув.

¹¹ Лачхэ́-илы́ткима и патяибэ́н джа́на кхэтанэ́, чачипэ́н и рама́нё (миро) чамудэнапэ екх екхэ́са.

¹² Патяибэ́н ухтэла криг пхувья́тыр, а чачипэ́н явэ́ла тэ дыкхэ́л тэлэ́ Болыбна́стыр.

¹³ Чачо́, Рай Дэвэ́л дэ́ла лачхипэ́н амэ́нгэ и амари́ пхув отдэ́ла пэ́скиро аплодо.

¹⁴ [р.с.] Чачипэ́н джа́ла анги́л Лэ́стэ и кэрэ́ла дром Лэ́скирэ пирэ́нгэ (стопэ́нгэ).