Psalmy 83 - Библия - Пэ Балтитко Романи чиб (Романэс) 2019

¹ Гилы́. Асафоскиро Пса́лмо.

² О, Дэ́вла! На бэш штыл, и на яв муто (немо), на яв штыл, о Дэ́вла:

³ пал-дова́ со, акэ, Тырэ́ вэ́рги годлэна, и одолэ́, савэ́ бидыкхэна Тут, ґаздэ́на пэ́скирэ шэрэ́,

⁴ Ёнэ зракирэнапэ фрэнтэс пэ Тырэ́ манушэ́ндэ, ёнэ задуминэна фуипэ́н проти одолэ́ндэ, савэ́н Ту приракхэса;

⁵ ёнэ ракирэ́на: “Явэ́н тэ кэра́с, соб (кай) тэ вычхурдас лэн сыр нацыя, соб (кай) буты́р Израилёскиро лав тэ на рипирэлпэ.”

⁶ Пал-дова́ со ёнэ зракирдэпэ дрэ екх годы́, ёнэ кхэтанякирдэпэ проти Ту́тэ.

⁷ Ша́тры Едомоскирэ и Исмаильтянэнгирэ, Моа́во и Агаро,

⁸ Ѓевало и Амоно и Амалико, Филистимля́ни и Тироскирэ джиибна́скирэ,

⁹ Асирия адя́кэ-паць гия́ лэ́нца; ёнэ дынэ́ васт Лотоскирэ чхавэ́нгэ. Сэ́ла.

¹⁰ Кэр адя́кэ-паць Мидианэнгэ сыр Сисараскэ, сыр Иадиноскэ пашы́л сы́гно панинг Кисоно,

¹¹ савэ́ хасинэ́ пашы́л Ендоро, савэ́ ячнэ́ сыр пхувья́киро гнэё (гноё).

¹² Кэр лэ́нгирэ тхагарьенца (князьенца) сыр Оревоса (Аребоса), Зивоса и сарэ́ лэ́нгирэ крали́скирэ сэмэнцэнца, сыр Зэбоса и Салманоса,

¹³ пал-дова́ со ёнэ пхэндлэ́: “Явэ́н, ла́са пэ́скэ Дэвлэ́скирэ чаритка пхувья́.”

¹⁴ О, мро Дэ́вла! Кэр лэ́ндыр вихроскиро пыло, пирикэр лэн дрэ чхучо́ пхус анги́л балва́л.

¹⁵ Сыр яг хачкирэ́ла вэш, сыр бари яг подхачкирэла бэ́рги,

¹⁶ адя́кэ-паць традэ лэн барэ́ штормоса и трашакир лэн Тырэ́-холямэ́ балваляса.

¹⁷ Раё Дэ́вла! Учхакир лэ́нгирэ муя́ ладжакирибнаса, соб (кай) ёнэ тэ родэ́н паты́в Тырэ́ лавэ́скэ.

¹⁸ Тэ явэ́н ёнэ ладжакирдэ́ и трашакирдэ пэ сарэ́ ве́ки, тэ нашавэн ёнэ паты́в и тэ хасён:

¹⁹ [р.с.] соб (кай) ёнэ тэ джинэ́н, со Ту сан Екхджино́, Конэ́скиро лав исын Рай Дэвэ́л, Са́мо Барэды́р пэ сари́ пхув.