Psalmy 79 - Библия - Пэ Балтитко Романи чиб (Романэс) 2019

¹ Асафоскиро Пса́лмо. О Дэ́вла! Наюды́тка на́цыи гинэ́ андрэ́ дро Тыро́ мэкно́ миштыпэ́н. Ёнэ магирдэ́ Тыри́ Свэ́нто Кхангири́, ёнэ кэрдэ́ Ерусалимо́стыр радэ бара́.

² Ёнэ дынэ́ Тырэ́-дынарьенгирэ тру́пы, сыр хабэ́н болыбна́скирэ чириклэнгэ, Тырэ́-свэнтонэнгирэ маса́ мурдалэ́нгэ пэ пхув:

³ Ёнэ прочхудэ лэ́нгиро рат сыр пани́ трусця́л Ерусалимо и нани ние́кх, кон гаравэлас лэн.

⁴ Амарэ́ сусе́ды (кота́рья) обракирэна амэн. Мануша́, савэ́ исын трусця́л амэ́ндэ, санапэ холямэс и санапэ холямэс амэ́ндыр.

⁵ Сыр ґара́, о Раё Дэ́вла! Ци Ту ўса́ды (сак) явэ́са тэ холясос пэ амэ́ндэ? Ци явэ́ла Тыро́ зэвлыныпэ́н (ревность) тэ хачол сыр яг?

⁶ Вымэк Пэ́скири бари холын пэ Наюды́тка на́цыи, савэ́ на джинэ́на Тут, и пэ кралипэна́, со на прикхарэна Тыро́ лав.

⁷ Пал-дова́ со ёнэ ханэ́ Яково́скиро ро́до и роспхагирдэ́ кэ пхув штэ́то, кай ёв дживдя́.

⁸ На ри́пир грэ́хи, амарэ́ прапапэнгирэ, мэк Тыри́ бари лачхэ́-илы́ткима тэ пирилэл амэн най сыгэды́р: пал-дова́ со амэ догиям сарэ́са кэ пхув.

⁹ Подэ васт, о Дэ́вла, Саво́ зракхэ́са амэн ваш сла́ва Тырэ́ лавэ́скэ, зра́кх и отмэк амэ́нгэ амарэ́ грэ́хи ваш Тыро́ лав.

¹⁰ Со́скэ Наюды́тка на́цыи ракирэ́на: “Кай исын лэ́нгиро Дэвэ́л? Мэк амарэ́ якха́ тэ дыкхэ́н, сыр Ту отдэса палэ Наюдытконэ́ нацыенгэ, со ёнэ прочхудэ рат Тырэ́ писхарьенгиро.

¹¹ Мэк Ту тэ шунэ́с, сыр пхандло ману́ш дэ́ла ґондя́ (ўздыхинэла) годла́са. Ракх чхавэ́н, савэ́ джа́на пэ мэрибэ́н Тырэ́ барэ́-вастэскирэ зорья́са.

¹² И отдэ́ палэ дрэ эфта́ (битринэ́нгиро дэш) мо́лы фуеды́р обракирибэн амарэ́ котарьенгэ (суседэнгэ) дро лэ́нгиро брэг пал дова́, со ёнэ обракирэнас Тут, о Раё Дэ́вла.

¹³ Тэды амэ, савэ́ сам Тырэ́ мануша́ и бакрэ́ Тырэ́ ґуртоскирэ, амэ ява́са ўса́ды (сак) тэ парикирас Ту́кэ, амэ ява́са тэ сыкавас анги́л ро́до кэ ро́до Тыри́ сла́ва.