Psalmy 78 - Библия - Пэ Балтитко Романи чиб (Романэс) 2019

¹ Асафоскиро Сыклякирибэ́н. О, мирэ́ мануша́лэ! Шунэ́н миро сыклякирибэ́н, причхувэ́н кана́ кэ лава́ мирэ́.

² Мэ отпхандава мирэ́ ушта́ тэ пхэна́в припхэныбэ́н (притча) тумэ́нгэ; мэ ява́ва тэ ракира́в шэрэпхарибнытка (загадки) ґалыибнаса, со ракирдэ́ ґара́,

³ савэ́ амэ шундя́м, и со амэ джина́са, и со амарэ́ дада́ роспхэндлэ́ амэ́нгэ.

⁴ Далэ́ лава́ амэ на гараваса лэ́нгирэ чхавэ́ндыр, соб (кай) тэ пирипхэнас родэ́нгэ, со явэ́на анги́л, савэ́ явэ́на тэ шарэ́н Рас-Дэвлэ́с,

⁵ пал лэ́скиро зоралыпэ́н и Лэ́скирэ барэ́ ди́вна рэ́нды, со Ёв кэрдя́.

⁶ Пал-дова́ со Ёв чхудя́ Лэ́скиро допхэныбэ́н дро Израилё, дыя́ Зако́но Яково́скэ, пал саво́ Ёв припхэндя́ амарэ́ дадэ́нгэ, соб (кай) ёнэ тэ сыклякирэ́н лэ́нгирэ чхавэ́н; соб (кай) ро́до, со явэ́ла анги́л, тэ могинэл тэ джинэ́л, и, соб (кай) чхавэ́, савэ́ анги́л бияндёна, адя́кэ-паць тэ роспхэнэ́н Зако́но пэ́скрэ чхавэ́нгэ,

⁷ соб (кай) ёнэ зоралэ́с тэ ужакирэн лачхипэ́н Дэвлэ́стыр, и тэ на бистрэн Дэвлэ́скирэ бутя́, а тэ кандэ́н Лэ́скирэ припхэныбэна́.

⁸ Мэк тэ на явэ́н ёнэ сыр лэ́нгирэ дада́, савэнгиро ро́до сыс накандуно и бунтяритко, и конэ́скиро ро́до на сарэ́са рискирдя́ Пэскро ило́ Дэвлэ́скэ, и конэ́скиро ду́хо (фа́но) на сыс патяибны́тко Дэвлэ́скэ.

⁹ Ефремо́скирэ чхавэ́, савэ́ндэ сыс дрэ васта́ луки, рисинэ́ палэ дро марибнаскиро дывэ́с.

¹⁰ Ёнэ на кандынэ́ Дэвлэ́скиро Зако́но и отпхэндлэпэ тэ дживэ́н пир Лэ́скиро Зако́но;

¹¹ и ёнэ бистырдэ пал дова́, со Ёв кэрдя́ и Лэ́скирэ барэ́ ди́вы, савэ́ Ёв сыкадя́ лэ́нгэ.

¹² Анги́л лэ́нгирэ-дадэнги́рэ якха́ Ёв кэрдя́ ди́вы пир Египто́скири пхув, пэ Цоаноскири фэ́лда.

¹³ Ёв роскэрдя́ пэ дуй паша́ мо́рё (дэрья́в) и пирилыджия лэн пир пани́. Ёв кэрдя́ адя́кэ, со паня́ тэрдинэ́ сыр ва́нта.

¹⁴ И Ёв лыджия́ лэн болыбна́скирэ облокоса дывэсэ́, а ягакирэ дудэса (свэтоса) раты́.

¹⁵ Ёв роскэрдя́ пэ дуй паша́ скалы пэ чхучи́ пхув и панякирдя лэн чалэ́с лэ́ндыр, сыр барэ́ панингэндыр;

¹⁶ и Ёв кэрдя́ адя́кэ, со сыгна паня́ тхадынэ скалэндыр, и со паня́ тхадынэ сы́гэс сыр барэ́ панинга́.

¹⁷ Нэ ёнэ сароекх буты́р кэрдэ́ грэ́хи проти Лэ́стэ и ґаздэнас бу́нто пэ чхучи́ пхув пэ Най Вучэдырэскирэстэ,

¹⁸ и ёнэ пропатякирэнас Дэвлэ́с дро пэ́скиро ило́, ке́ли ёнэ мангнэ́ хабэ́н пир пэ́скиро ди;

¹⁹ и ёнэ ракирдэ́ пэ Дэвлэ́стэ, пхэни́: “Ци дэ́ла ра́да Дэвэ́л тэ кэрэ́л сками́нд пэ чхучи́ пхув?”

²⁰ Дыкхэ́н! Ёв пэкадя́ дрэ ска́ла и паня́ дынэпэ тэ тхадэн и барэ́ панинга́ пхэрдякирдэ саро́. Ци дэ́ла ра́да Ёв адя́кэ-паць тэ дэл маро́? Ци дорэсэ́ла Ёв мас Пэ́скирэ манушэ́нгэ?

²¹ Палдава́ Рай Дэвэ́л шундя́ дава́, и Ёв древа́н холя́сыя, Лэ́скири холы́ росхачия пэ Израилёскирэ манушэ́ндэ и адя́кэ-паць холякирибэ́н ґаздыя́пэ пэ лэ́ндэ,

²² со ёнэ на патяндынэ́ дрэ Дэвлэ́стэ и на рикирдэ наде́я, со Ёв дэ́ла васт лэ́нгэ.

²³ Нэ Ёв припхэндя́ облокэнгэ, со исын упра́л, и Ёв псирадя (откэрдя) болыбна́скирэ вудара́,

²⁴ и Ёв чхудя́ сыр брышы́нд пэ лэ́ндэ (манна) тэ хан и Ёв дыя́ лэ́нгэ болыбна́скиро гив.

²⁵ Мануша́ ханас Янголэ́нгиро хабэ́н: Ёв бичхадя́ лэ́нгэ хабэ́н чалэ́с.

²⁶ Ёв кэрдя́ тэ пхурдэл вастокитко балва́л тэ пхурдэл дро болыбэ́н и лыджия́ англэ тэ пхурдэл балва́л зэрвонэ (левонэ) рига́тыр,

²⁷ И Ёв кэрдя́ тэ пэрэ́л мас пэ лэ́ндэ сыр пра́хо и чириклэн пхакэнца, сыр пра́хо пэ морёскиро (дэрьявэ́скиро) брэ́го.

²⁸ И Ёв кэрдя́ адя́кэ, со ёнэ пынэ́ машки́р пэ́скиро таборо (лод), трусця́л пэ́скирэ ша́тры;

²⁹ и ёнэ ханэ́ и чалынэ пхэрдэ́с и Ёв дыя́ лэ́нгэ дова́, со ёнэ битукоскиро камлэ́.

³⁰ Ёнэ на гинэ́ криг пэ́скирэ хабнастыр, со сыс лэ́ндэ битукоскиро, лэ́нгиро хабэ́н уса́ сыс дрэ лэ́нгирэ муя́,

³¹ ке́ли Дэвлэ́скири холы́ явдя́ пэ лэ́ндэ и мулякирдя́ най тхулэдыронэн лэ́ндыр и, акэ, зарадя выкэдынэ́ манушэ́н Израилёстыр.

³² Нэ на дыкхи́ пэ дава́, ёнэ ўса кэрдэ́ грэ́хи, и ёнэ на патяндынэ́ дрэ Лэ́скирэ барэ́ ди́вна бутя́,

³³ палдава́ Ёв и домэкця, со лэ́нгирэ дывэса́ сыс сыр балвалякиро пхурдыпэн, а лэ́нгирэ бэрша́ джа́нас дрэ дар кэ мэрибэ́н.

³⁴ Ке́ли Ёв замарэлас лэн, тэды ёнэ родэнас Лэс, и ёнэ рискирэнас пэ́скиро ило́ и зоралэ́с родэнас Дэвлэ́с,

³⁵ и ёнэ рипирэнас нэвэ́стыр, со Дэвэ́л исын лэ́нгири ска́ла, и со Най Вучэдырэскиро Дэвэ́л исын Одова́, Кон зракхэ́ла лэн.

³⁶ Ёнэ шарэнас Лэс на илэ́стыр пэ́скирэ муенца, и лэ́нгирэ чиба́ хохавэнас Лэ́скэ,

³⁷ а лэ́нгиро ило́ на зоралэ́с патялас дрэ Лэ́стэ и ёнэ на сыс патяибнытка анги́л Лэ́скиро завето.

³⁸ Нэ Ёв исын лачхэ́-илэ́скиро: Ёв отмэкця́ чорипэ́н и на пхагирдя́ лэн. Бут мо́лы Ёв рискирэлас криг Пэ́скири холы́, и Ёв на джангавэлас Пэ́скири бари холын.

³⁹ Пал-дова́ со Ёв рипирдя, со ёнэ сыс фэ́ни (то́ка) манушы́тко лоч (плоть), сави́ исын на ве́чно, сы́рбы балвалякиро пхурдыпэн, со джа́ла криг и на рисёла палэ.

⁴⁰ Сыр бут мо́лы ёнэ на кандэнас Лэс пэ чхучи́ пхув, ёнэ холякирэнас Лэс пэ биманушэнгиро штэ́то.

⁴¹ И ёнэ нэвэ́стыр и нэвэ́стыр рисёнас палэ, пропатякирэнас Дэвлэ́с и дукхавэнас Свэнтонэ́ Дэвлэ́с Израилёстыр.

⁴² Ёнэ на рипирдэ Лэ́скиро васт дро дова́ дывэ́с, ке́ли Ёв ракхця́ лэн вэргостыр, саво́ тасадя лэн,

⁴³ сыр Ёв сыкадя́ Пэ́скирэ знаме́нии (ґертыка́) дро Еги́пто, сыр кэрдя́ Пэ́скирэ ди́вы пэ Цоаноскирэ фэ́лды;

⁴⁴ и пирикэрдя лэ́нгирэ рэ́ки (лэня́) и рэкицы дро рат, соб (кай) ёнэ на могинэ́нас тэ пьен.

⁴⁵ Ёв бичхадя́ дукханэ матлен (насекомонэн) тэ хан лэ́нгирэ маса́ и цапнен (жамбэн), савэ́ хасякирэнас лэн;

⁴⁶ Ёв адя́кэ-паць отдыя́ лэ́нгирэ-гивэнгиро умалото раупэ́нгэ (гусиницэ́нгэ) тэ хан, а лэ́нгирэ бутя́ скочкэнгэ;

⁴⁷ Ёв хасякирдя́ лэ́нгирэ винаграды (дракха́) ґрадоса и лэ́нгирэ сикаморытка дрэвы мразоса.

⁴⁸ Ёв отдыя́ лэ́нгирэ мурдалэ́н тэл ґрадо и лэ́нгирэ ґурты тэл барэ́ блискави́цы

⁴⁹ Ёв бичхадя́ пэ лэ́ндэ сы́рбы яг Пэ́скирэ холя́тыр, холякирибэ́н, холякири, зор и пхарипэ́н, ке́ли мэрибнаскирэ Янго́лы пынэ́ пэ лэ́ндэ.

⁵⁰ Ёв вымэкця Пэ́скири холы́, Ёв на выракхэлас лэ́нгирэ дия́ мэрибна́стыр, а Ёв отдыя́ лэн мэрибнытконэ франсэнгэ (морово́скэ).

⁵¹ И Ёв мулякирдя́ кажнонэ́ пэрвонэ́ биято́с дро Еги́пто, пэрвонэ́ родоскирэс, савэ́стыр лэ́лапэ зор пэ Хамоскирэ ша́тры,

⁵² И Ёв кэрдя́, со Лэ́скирэ мануша́ гинэ́ анги́л сыр бакрэ́ и Ёв лыджия́ лэн пир чхучи́ пхув сыр ґурто;

⁵³ и Ёв лыджия́ лэн бидаракирэс, ёнэ на страхадёнас, а мо́рё (дэрья́в) чхакирдя упралэстыр лэ́нгирэ вэргэ́н.

⁵⁴ И Ёв долыджия лэн кэ кусты́ка (кэ грани́цы) Пэ́скирэ Свэнтонэ́-Пхувьякири, кэ бэ́рга, со лэ́скиро чачо́ васт дорэсця́;

⁵⁵ И Ёв традыя́ криг Наюды́тка на́цыи анги́л лэ́ндэ, и Ёв роскэрдя́ пэ паша́ пхув машки́р лэ́ндэ, сыр мэкно́ миштыпэ́н пир чэрта, и Ёв кэрдя́, соб (кай) Израилёскирэ ро́ды тэ дживэ́н пэ пэ́скирэ ша́тры.

⁵⁶ Нэ ёнэ пропатякирэнас Най Вучэдырэскирэ Дэвлэ́с, прэзэнтынэнас Лэс и ёнэ на рикирэнаспэ кэ Лэ́скирэ допхэныбэна.

⁵⁷ И ёнэ дынэпэ палэ и сыс напатяибнытка сыр лэ́нгирэ дада́: ёнэ вырисёнас сыр банго́ лу́ко.

⁵⁸ И ёнэ холякирдэ Лэс пэ́скирэ штэтэнца пэ бэ́ргицы, кай ёнэ дэ́нас паты́в и ёнэ прэзэнтынэнас (дражнинэнас) Лэс лэ́нгирэ вычингирдэ идолэнца.

⁵⁹ Дэвэ́л шундя́ дава́, Ёв холя́сыя, и Ёв традыя́ криг Израилё дур Пэ́стыр:

⁶⁰ Ёв мэкця́ Пэ́скиро Штэ́то Сило́мо, ша́тра, кай Ёв дживдя́ машки́р манушэ́ндэ,

⁶¹ И Ёв отдыя́ Пэ́скиро зоралыпэ́н дро пле́но и Пэ́скири сла́ва дрэ вэргэ́нгирэ васта́;

⁶² И Ёв адя́кэ-паць отдыя́ тэл курта́ла Лэ́скирэ манушэ́н и сыс холямо́ пэ Лэ́скирэ чхавэ́ндэ:

⁶³ яг схая Лэ́скирэ-тырнэ манушэ́н и Лэ́скирэ патывалэ́ джувле́н на багандлэ бьявитка гиля́.

⁶⁴ Лэ́нгирэ рашая́ хасёнас куртала́тыр, лэ́нгирэ пивля (удовы) на могиндлэ́ тэ ровэ́н.

⁶⁵ Тэ́ньци Рай Дэвэ́л джангадыя сы́рбы соибнастыр, сы́рбы кодова́ зоралыпнаскиро ману́ш, саво́ радынэ́лапэ ґодласа моля́тыр (виностыр);

⁶⁶ И Ёв традыя́ криг Пэ́скирэ вэргэ́н, Ёв чхудя́ лэн пэ ладж, со ние́кхвар на кончынэлапэ.

⁶⁷ И Ёв отпхэндяпэ Ёза́скирэ шатратыр, и Ёв на выкэдыя́ Ефремоскиро ро́до,

⁶⁸ нэ Ёв выкэдыя́ Юда́скиро ро́до, Сионо́скири бэ́рга, сави́ Ёв выкэдыя́ Пэ́скэ;

⁶⁹ И Ёв ґаздыя́ Пэ́скиро Свэ́нто Штэ́то вучэ́с сыр бэ́рги, сыр пхув, сави́ Ёв зачхудя пэ сарэ́ ве́ки.

⁷⁰ И Ёв выкэдыя́ Давидо́с, Пэ́скирэ писхари́с, и Ёв лыя́ лэс бакрэ́нгирэ грэдатыр (дворостыр):

⁷¹ Ёв лыя́ лэс бакрэ́ндыр, Саво́ дэ́нас цюци (колы́н) тыкнорэнгэ, Ёв лыя́ лэс тэ чаравэл Пэ́скирэ манушэ́н, Яковоскирэн и Израилёскирэн, Пэ́скирэ чхавэнгирэн.

⁷² И Ёв чалякирдя лэн сарэ́н Пэ́скирэ илэ́стыр, и лыджия́ лэн Пэ́скирэ годьварэ́ вастэ́са.