Psalmy 76 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Пэ Балытка Струме́нты. Асафоскиро Пса́лмо. Гилы́.

² Дэвэ́л исын джиндло́ дрэ Юдэ́я, лэ́скиро лав исын пэ барипэ́н дро Израилё.

³ И Лэ́скири Ша́тра исын дрэ Салима, и Лэ́скиро кхэр пэ Сио́но.

⁴ Одо́й Ёв пхагирдя́ сыгна марибны́тка бустя́ (стре́лы) пэ лу́ко вэргэ́ндэ, шчы́то, курта́ла и марибэ́н. Сэ́ла.

⁵ Ту сан славу́тно, Ту сан зоралэды́р вечнонэ бэргэндыр.

⁶ Муршэ́н лынэ́ криг зорья́са, ёнэ пынэ́ дрэ соибэн; ние́кх зоралюкэндыр на латхя́ буты́ пэ́скирэ вастэнгэ.

⁷ Тырэ́ дара́тыр, Яково́скиро Дэвэ́л, мэрибнытко вурдэ́н, адя́кэ-паць и грай сы́рбы тасадынэ тэ совэн.

⁸ Ту трашавэса кэ мэрибэ́н, и конэ́скэ исын пир зор тэ тэрдёл проти Ту́тэ?

⁹ Ту сэндякирэса болыбна́стыр манушэ́нгэ тэ шунэ́н, пхув страхадыя и замыя́;

¹⁰ ке́ли Ту уштыян тэ сэндякирэс, соб (кай) тэ зракхэс сарэ́ ковлэ́-илытконэ манушэ́н.

¹¹ Пал-дова́ со аж мануша́ дрэ холы́ явэ́на тэ шарэ́н Тут, и Ту подпхандэсапэ холя́са, сави́ ячэ́лапэ.

¹² Совлаха́н Дэвлэ́скэ и мангэ́нпэ Ра́скэ-Дэвлэ́скэ, тумарэ́ Дэвлэ́скэ, мэк сарэ́, кон исын пашы́л Лэ́стэ, тэ янэ́н да́ры Лэ́скэ, Самонэ (Най) Барэдырэскэ кэ дар.

¹³ [р.с.] Ёв чхурдэ́ла дрэ риг тхагарьенгиро ду́хо (фа́но), Ёв исын даракуно ваш кральенгэ пэ пхув.