Psalmy 75 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. “На хасякир” пэ Мелодия, Асафоскиро Пса́лмо. Гилы́.

² Амэ парикираса Ту́кэ, о Дэ́вла, амэ шараса и парикираса Ту́кэ, пал-дова́ со Тырэ́ ди́вна бутя́ сы́рбы ракирэ́на сарэ́нгэ, со Ту сан пашы́л.”

³ “Ке́ли Мэ выкэдава лачхо́ часо – ракирэ́ла Дэвэ́л, Мэ ява́ва тэ сэндякирав пир чачипэ́н.

⁴ Пхув и сарэ́ ла́кирэ джиибнарья кунинэнапэ, нэ Мэ чхудём сты́лбы зоралэ́с.” Сэ́ла.

⁵ Мэ пхэндём пхутькирдэнгэ: “На пхутён!” И фуе́ манушэ́нгэ: “На ґаздэ́н шынга́ (ро́ги).

⁶ На ґаздэ́н вучэ́с шынга́, на ракирэ́н нахратэс, пхарэ́-илытка мануша́лэ.”

⁷ Пал-дова́ со сэ́ндо джа́ла на одотхы́р, кай кхам уштэ́ла, ци кай джа́ла тэлэ́, ци чхучэ́ пхувья́тыр:

⁸ Нэ Дэвэ́л исын сэнда́ри, Саво́ чхувэ́ла тэлэ́ екхэн, и Саво́ ґаздэ́ла упрэ́ явирэ́н.

⁹ Тахта́й исын дрэ Дэвлэ́скирэ васта́, и мол (вино) пенинэлапэ, дрэ сави́ исын бут со мешындло. Ёв росчхувэла ла: чачо́, сарэ́ фуй мануша́ исын бангэ́ тэ пьен и тэ смокчынэн жыжа, со ячэ́лапэ.

¹⁰ Нэ мэ ява́ва якхи́тко (свидетелё) ўса́ды (сак), мэ ява́ва тэ шара́в Яково́скирэ Дэвлэ́с.

¹¹ [р.с.] И Ёв чхинэла тэлэ́ сарэ́ фуе́-манушэ́нгирэ шынга́ (ро́ги), нэ мэ ґазда́ва зор патяибнаскирэ манушэ́нгиро.