Psalmy 73 - Библия - Пэ Балтитко Романи чиб (Романэс) 2019

¹ Асафоскиро Пса́лмо. Дава́ исын патяибэ́н, со Дэвэ́л исын лачхо́ кэ Израилё, кэ кодолэ́ Мануша́, савэнгиро ило́ исын жужакирдо кэ Ёв.

² Нэ мирэ́ ґэра́ ледзь (на́бут со) на обштадэпэ, мирэ́ пирэ́ (сто́пы) ишчо (инкэ́) розджанаспэ дрэ рига́.

³ Пал-дова́ со мэ зэвлындём пхутькирдэ́ манушэ́нгэ, ке́ли мэ дыкхцём, сыр миштэ́с дживэ́на фуй мануша́.

⁴ Лэ́ндэ нанэ дукха́ аж кэ мэрибэ́н, лэ́нгирэ маса́ исын зоралэ́.

⁵ Лэ́ндэ нанэ пхарипэна, сыр явирэ манушэ́ндэ, лэ́ндэ нанэ калыпэна, со яви́р мануша́ пиридживэна:

⁶ палдава́ пхутькирибэ́н пэ лэ́нгирэ муя́ исын сыр мирикля (бусы) трусця́л мэн, ёнэ сы́рбы уридэпэ дрэ нахратыма, сыр дрэ и́ди;

⁷ лэ́нгирэ якха́ росшулынэ тхулыпнастыр, ёнэ думинэ́на фуипэ́н дро пэ́скиро ило́ сыр трэй.

⁸ Ёнэ сана пэ холямэс и ракирэ́на нахра́тэс, ёнэ задэнапэ, ке́ли ракирэ́на.

⁹ Ёнэ ракирэ́на фуипэ́н аж кэ болыбэ́н, лэ́нгирэ чиба́ (чибья́) псирэ́на пир манушэ́ндэ пэ пхув.

¹⁰ Пал-дова́ и Дэвлэ́скирэ мануша́ порискирэна кэ ёнэ и сы́рбы выпьена пхэрдо́ тахта́й (чаша) лэ́нгирэ лавэ́ндыр, сыр пани́,

¹¹ и пхэнэ́на ёнэ: “Сыр джинэ́ла Дэвэ́л? Ци уджинэла пал дава́ амо (Най) Вучэды́р?”

¹² Дыкх, сыр исын бидэвлыткарьенгэ; лэ́нгэ дживэлапэ миштэ́с, ёнэ скэдэ́на буты́р и буты́р пэ́скирэ барвалыпэна.

¹³ Нау́што (неужэли) ивья́ мэ приракхцём пэ́скиро ило́ дрэ жужыпэн и мэ выморавас васта́, соб (кай) тэ сыкавав, со нанэ банг ма́ндэ?

¹⁴ Саро́ часо ма́нгэ сыс пхаро́ и кажно зло́ко (ра́нко) Дэвэ́л пхарэ́с сыклякирэ́ла ман.

¹⁵ Ко́ли мэ пхэнавас: “Акэ, сыр мэ ява́ва тэ ракира́в, дыкхэ́н, тэды мэ давас дукха́ (хохававас) Тырэ́-чхавэ́нгирэ ро́до.

¹⁶ И мэк мэ думиндём, со мэ, хачи, галёвавас дава́, дава́ сыс дукхано дрэ мирэ́ якха́,

¹⁷ пака мэ на гиём пэ Свэнтонэ́-Дэвлэ́скиро Штэ́то, фэ́ни, тэды мэ ґалыём ко́нцо (яго́ро) фуе́ манушэ́нгэ.

¹⁸ Чачо́, Ту чхувэ́са лэ́нгирэ ґэра́ пэ склизка штэ́ты, Ту чхувэ́са лэн тэлэ́ тэ хасён.

¹⁹ Сыр адя́кэ сы́гэс ёнэ екха́тыр хасёна, джа́на криг сарэ́са кэ хась мэрибнытконэ дара́са.

²⁰ Сыр суно́ пэ зло́ко (ра́нко), ке́ли ману́ш джангадёла, адя́кэ-паць Ту, Раё Дэ́вла, ке́ли Ту джангадёса, тэ́ньчи Ту бистрэса пал адалэ́ фуе́ манушэ́ндэ.

²¹ Ке́ли миро ило́ сыс дро киркипэн, а мири́ годы́ сыс дукхады,

²² и мэ со́мас дылыно́ и мэ на ґалёвавас бут, мэ со́мас сыр мурда́л анги́л Ту́тэ.

²³ Нэ сароекх мэ ўса́ды (сак) со́мас Ту́са, Ту рикирдян ман пал чачо́ васт.

²⁴ Ту сыклякирэса и лыджа́са ман, тэ́ньчи Ту прилэса ман лачхэ́ лавэ́са.

²⁵ Кон ишчо (инкэ́) пэ болыбэ́н исын ма́ндэ апри́ч Ту́тэ? Ма́ндэ нико́н нанэ дро́го пэ пхув апри́ч Ту́тэ.

²⁶ Мири́ лоч и миро ило́ хасёна со дывэ́с: нэ миро Дэвэ́л исын ска́ла мирэ́ илэскэ и Ту сан саро́, со ма́ндэ исын.

²⁷ Пал-дова́ со, ґа́да, кодолэ́, савэ́ исын дур Ту́тыр, хасёна, Ту хасякирэса сарэ́н, савэ́ гинэ́ криг Тырэ́ дромэ́стыр.

²⁸ Нэ ваш ма́нгэ исын миштэ́с тэ явав пашылэды́р кэ Дэвэ́л: Мэ рискирдём пэ́скиро ило́ тэ зракхавпэ кэ Рай Дэвэ́л, соб (кай) тэ ракира́в сарэ́нгэ пал сарэ́ Тырэ́ рэ́нды.