Psalmy 72 - Библия - Пэ Балтитко Романи чиб (Романэс) 2019

¹ Соломоно́скиро Пса́лмо. О Дэ́вла! Сыкля́кир крали́с тэ сэндякирэ́л и крали́скирэ чхавэ́с Пэ́скирэ чачипнаскэ.

² Ёв явэ́ла тэ сэндякирэ́л Тырэ́ манушэ́н пир чачипэ́н, а Тырэ́ чорорэн пир Зако́но.

³ Бэ́рги янэ́на рама́нё (миро) манушэ́нгэ, а бэ́ргицы чачипэ́н.

⁴ Ёв явэ́ла чачунэ́с тэ сэндякирэ́л чорорэ́ манушэ́н и Ёв дэ́ла зор одолэ́нгэ, кон исын дрэ трэ́бима и Ёв роспхаравэла кодолэ́с, кон притасавэлас лэн.

⁵ Лэ́ндэ явэ́ла трашаибэ́н анги́л Ту́тэ, пака кхам и чхон исын пир сарэ́ манушы́тка ро́ды.

⁶ Кра́ли явэ́ла сыр брышы́нд пэ фэ́лда чарьяса, сыр баро́ панинг, со чхувэ́лапэ пэ пхув.

⁷ Дрэ лэ́скирэ дывэса́ чачипэ́н и рама́нё явэ́на пэ най шукарэдыр штэ́то ўсенде (везде), пака чхон исын пэ болыбэ́н.

⁸ Лэ́скиро кралипэ́н явэ́ла екхэ морёстыр (дэрьявэстыр) кэ яви́р, Евфратонэ рэка́тыр (лэня́тыр) кэ пхувья́кирэ яго́ры (краи́).

⁹ Кодолэ́, савэ́ дживэ́на пэ чхучи́ пхув, явэ́на тэ бандякирэн чанга́ анги́л Лэ́стэ, и Лэ́скирэ вэ́рги явэ́на тэ чарэн пра́хо.

¹⁰ Фарсисоскирэ кра́лья, и савэ́ исын пир островы (джипа́), янэ́на дань, а Арабиякирэ и Абисиниякирэ кра́лья чхувэ́на анги́л да́ры:

¹¹ чачо́, сарэ́ кра́лья пэрэ́на пэ чанга́ анги́л Лэ́стэ, сарэ́ на́цыи явэ́на тэ дынаринэ́н Лэ́скэ.

¹² Пал-дова́ со ёв дэ́ла зор одолэ́скэ, кон исын дрэ трэ́бима и кон дава́ мангэ́ла, рови; адя́кэ-паць и чорорэскэ, и одолэ́скэ, конэ́скэ нико́н на помогинэла.

¹³ Ёв приракхэла чорорэс и бэдонэс, ёв дэ́ла зор одолэ́скэ, кон исын дрэ трэ́бима.

¹⁴ Ёв выракхэла лэ́нгирэ джиибэна, ке́ли лэн притасавэ́на и нахратонэ манушэ́ндыр, а лэ́нгиро рат исын дро́го анги́л лэ́скирэ якха́.

¹⁵ И ёв явэ́ла тэ дживэ́л, и лэ́скэ явэ́на тэ дэн Арабиякиро сувнака́й, и пал лэ́стэ ўса́ды (сак) явэ́на тэ мангэ́нпэ Дэвлэ́скэ, Дэвэ́л явэ́ла тэ бахтякирэ́л лэс пэ сарэ́ дывэса́.

¹⁶ Гива́ явэ́на пхэрдэ́ и бут пир сари́ пхув, пэ вучипэ́н бэргэнгиро; лэ́нгиро баритка явэ́на тэ тринскирэнпэ сыр вэш пэ Лива́но; мануша́ дрэ фо́рья явэ́на тэ лулудён (тэ цвэтинэн) сыр чар пэ пхув.

¹⁷ Крали́скиро лав явэ́ла ўса́ды (сак): лэ́скиро лав явэ́ла джиндло́ пака исын кхам: лэ́скирэ мануша́ явэ́на бахталэ́ Дэвлэ́стыр, сарэ́ Наюды́тка на́цыи явэ́на тэ шарэ́н лэс.

¹⁸ Тэ явэ́л бахтякирдо́ Рай Дэвэ́л, Израилёскиро Дэвэ́л, Саво́ Екхджино́ кэрэ́ла ди́вна бутя́.

¹⁹ Мэк тэ явэ́л бахтякирдо́ Лэ́скиро лав пэ сарэ́ ве́ки! Мэк тэ явэ́л пхэрды́ сари́ пхув Лэ́скирэ слава́са. Ами́нь и ами́нь.

²⁰ Давидо́скирэ патерья (молитвы) Дэвлэ́скэ, Есеёскирэ чхавэ́скирэ, кончындлэпэ.