Psalmy 7 - Библия - Пэ Балтитко Романи чиб (Романэс) 2019

¹ Давидоскири-Мангипнытко гилы́, сави́ Ёв багандя Ра́скэ-Дэвлэ́скэ пал Хусоскиро Рэ́ндо, Кон сыс Вен΄яминоскиро Чхаво́.

² Миро Ту, Раё Дэ́вла, Мро Дэ́вла, Дрэ Савэ́стэ мэ патя́ва; зра́кх ман мэрибна́стыр мирэ́ вэргэ́ндыр, и приракх ман.

³ Соб (кай) ёнэ тэ на сыр шчэр (ле́во) розрискирэн миро ди, савэ́ лучкирэла ман пэ котэра́, ке́ли нанэ никонэ́с тэ приракхэл.

⁴ Раё Дэ́вла, Мро Дэ́вла, ко́ли мэ кэрдём вари-со дасаво, со исын начачипэ́н пэ мирэ́ васта́;

⁵ ко́ли мэ отдыём палэ фуипнаса одолэ́скэ, кон сыс дро рама́нё (миро) ма́нца, ци чордём одолэ́стыр, кон ма́нгэ исын пир ило́.

⁶ Мэк вэ́рги тэ ґаздэ́нпэ проти миро джиибэ́н, и мэк тэ ухтылэ́н ман, мэк ёнэ тэ домарэн ман дрэ бла́та кэ лю́но (адо), мэк тэ пасёл Миро барипэ́н дро пыло. Сэ́ла.

⁷ Ушты́, Раё Дэ́вла, дро Пэ́скири холы́. Сыка́в Пэс и помогин Ма́нгэ вэргэ́ндыр! Ту сэндякирэса пир чачипэ́н.

⁸ Мэк сарэ́ мануша́ тэ скэдэ́нпэ тэл Тыро́ васт. Лы́джа Сэ́ндо Трэ вучэ́ штэто́стыр.

⁹ Рай Дэвэ́л явэ́ла тэ сэндякирэ́л на́цыи. Сэндя́кир ман, Раё Дэ́вла, пир миро чачипэ́н, пир дова́, со нанэ банг ма́ндэ.

¹⁰ Соб (кай) чорипэ́н фуе́–манушэ́нгиро тэ кончынэлпэ, подрикир патывалэ́ манушэ́с: пал-дова́ со чачуно́ Дэвэ́л пропатякирэла ило́ и годы́.

¹¹ Дэвэ́л исын сыр шчы́то ваш ма́нгэ, Саво́ зракхэ́ла чачипнаскирэ манушэ́н.

¹² Дэвэ́л исын чачипна́скиро Сэнда́ри, и Дэвэ́л холясо́ла кажно дывэ́с пэ фуе́ манушэ́ндэ.

¹³ Ко́ли вари-кон на рисёла палэ, то Ёв дэ́ла чол (войстринэла) Пэ́скири курта́ла (мечо); Ёв бандякирэла Пэ́скиро лу́ко и Ёв исын скэдыно́ тэ дэл карье.

¹⁴ Ёв адя́кэ-паць скэдэ́ла пэ кодолэстэ мэрибнаскирэ струме́нты, Ёв кэрэ́ла Пэ́скирэ бустендыр (стрелэндыр) дэстэ́, савэ́ хачона яга́са.

¹⁵ Акэ, ёв пхарэ́с причхувэла зор тэ кэрэ́л чорипэ́н, ёв латхэ́ла фрэнтыма и янэ́ла начачипэ́н.

¹⁶ Ёв ґанадя рово (хохой) и выганадя ґанби́н (яма), и ёв пыя́ дро дая́ ґанби́н, сави́ ёв кэрдя́.

¹⁷ Лэ́скири фрэнтыма рисёла палэ пэ лэ́скиро шэро́, и лэ́скирэ нахрата рэ́нды пэрэ́на пэ лэ́скири фэ́ля (маку́шка/гуту́п).

¹⁸ Нэ Мэ ява́ва тэ шара́в Рас-Дэвлэ́с пал лэ́скиро чачипэ́н, и мэ ява́ва тэ бага́в шарибэ́н, Ра́скирэ-Дэвлэ́скирэ лавэ́скэ, Най Вучэдырэскирэскэ.