Psalmy 68 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Давидо́скиро Пса́лмо. Гилы́.

² Мэк Дэвэ́л тэ тэрдёл и тэ росчхурдэл Пэ́скирэ вэргэ́н, и мэк одолэ́, савэ́ бидыкхэна Лэс, явэ́на тэ нашэ́н Лэ́скирэ мо́стыр.

³ Сыр тхув роспхурдэлапэ криг, адя́кэ-паць Ту роспхурдэса лэн; сыр мом биладёла ягатыр, адя́кэ-паць фуй мануша́ биладёна одо́й, кай Дэвэ́л исын.

⁴ Нэ патяибнаскирэ мануша́ явэ́на бахталэ́; ёнэ явэ́на тэ радынэ́нпэ зоралэ́с, и ёнэ явэ́на тэ ґаздэ́нпэ радыма́са.

⁵ Бага́н Дэвлэ́скэ, бага́н шарибнытка гиля́ Лэ́скирэ лавэ́скэ, ґаздэ́н шарибнаса Лэс, Саво́ традэ́ла уклисто пир о́блоки пэ болыбэ́н: Лэ́скиро лав исын Рай Дэвэ́л, ґаздэ́нпэ шарибнаса одо́й, кай Ёв исын.

⁶ Дэвэ́л, Саво́ исын дрэ Пэ́скиро Свэ́нто Штэ́то, Дад пиротэнгиро (сиротэнгиро), Сэнда́ри пивленгиро (удовэнгиро).

⁷ Дэвэ́л дэ́ла кхэр тэ дживэ́н одолэ́нгэ, кон исын екхджинэ, Ёв мэкэ́ла пэ во́ля одолэ́н, кон исын дрэ састыра́: бунтуи́тка мануша́ ячэ́напэ пэ шуки́ пхув.

⁸ О, Дэ́вла! Ке́ли Ту выджасас анги́л Пэ́скирэ манушэ́ндэ, ке́ли Ту ги́ян пир чхучи́ пхув,

⁹ тэды пхув куниндяпэ и болыбэ́н чхудя́ адя́кэ-паць пани́ брышындэстыр, и бэ́рга Сио́но тринскирдяпэ анги́л Дэвлэ́стэ, Израилёскирэ Дэвлэ́стэ.

¹⁰ О, Дэ́вла! Ту бичхадян баро́ брышы́нд пэ Пэ́скиро мэкно́ миштыпэ́н тэ подрикирэс лэс, ке́ли ёв лыя́ тэ дошвалёл и Ту дыя́н зор лэ́скэ,

¹¹ Тырэ́ мануша́ дживдэ́ одо́й. Ту, Дэ́вла, кэрдя́н дава́ ваш чорорэнгэ Тырэ́ лачхипнастыр.

¹² Рай Дэвэ́л дэ́ла припхэныбэ́н и исын бут джувля́, кон пиридэла дая́ лачхи́ зан (звесь).

¹³ Кра́лья халадыбнэнгирэ нашэ́на, ёнэ праста́на криг, а джувля́, савэ́ исын кхэрэ́, роскэрэна машки́р пэ́стэ мазу́ри (награда), со дорэснэ́.

¹⁴ Мэк тумэ́ тэ откхинён машки́р загоны (гражы), кай исын бакрэ́, сароекх тумэ́ явэ́на сы́рбы голумбица, савьятэ пхака́ (крылы) чхакирдэ рупэ́са, а пора́ чачунэ́ сувнака́са.

¹⁵ Ке́ли Сарэзорья́киро Дэвэ́л росчхурдыя кралье́н пэ бэ́рга Сэлмоно, ёй яця́ парны сыр ив.

¹⁶ Бэ́рга Васан (Башан) исын Дэвлэ́скири бэ́рга; пэ бэ́рга Васан исын бут вучипэна́.

¹⁷ Со́скэ тумэ́ дыкхэ́на зэвлыныпнаса, бэргэнгирэ вучипэна́ пэ бэ́рга, кай Дэвэ́л выкэдыя́ тэ дживэ́л? Чачо́, Рай Дэвэ́л дживэ́ла пэ ла́тэ, пэ сарэ́ ве́ки.

¹⁸ Дэвлэ́стэ исын биш бара́ (тысёнцы) марибны́тка вурдэна́, аж лэн исын бара́ машки́р бара́: Рай Дэвэ́л исын машки́р лэ́ндэ, сыр Ёв исын пэ Пэ́скиро Свэ́нто Штэ́то пэ Синаё.

¹⁹ Ёв гия́ пэ вучипэна́, Ёв лыя́ пленонэн дрэ наволя. Ёв дорэсця́ да́ры манушэ́ндыр, аж бунтярьендыр, пал-дова́ со Рай Дэвэ́л явэ́ла тэ дживэ́л одо́й.

²⁰ Тэ явэ́л бахтякирдо́ Рай Дэвэ́л, Саво́ лыджа́ла амарэ́ пхарипэна со дывэ́с, Ёв исын Дэвэ́л, Саво́ зракхэ́ла амэн.

²¹ Амаро́ Дэвэ́л исын Дэвэ́л, Кон зракхэ́ла амэн. Ёв исын Рай Дэвэ́л, Дэвэ́л, Саво́ зракхэ́ла амэн мэрибна́стыр,

²² Чачо́, Дэвэ́л роспхаравэла Лэ́скирэ вэргэ́нгирэ шэрэ́, балэнгирэ чэката одолэнгирэ, савэ́ дживэ́на дрэ грэ́хи.

²³ Рай Дэвэ́л пхэндя́: “Мэ яна́ва лэн палэ Вашаностыр, Мэ яна́ва лэн морёскирэ (дэрьявэ́скирэ) хорэ штэтэ́ндыр,

²⁴ соб (кай) тумари́ ґэро́й тэ псирэ́л хор дро лэ́нгиро рат, соб (кай) тумарэ́-джуклэнгири чиб тэ чарэл дава́ рат, кицы́ лэ́нгэ трэй.

²⁵ Ёнэ дыкхнэ́, ке́ли Ту ги́ян, о Дэ́вла, сыр Ту ги́ян, Миро Дэ́вла, Миро Кхенинго кэ Свэ́нто Штэ́то.

²⁶ Багаибнаскирэ гинэ́ анги́л, тэ́ньчи башаибнаскирэ пэ струме́нты выджа́нас, машки́р лэ́ндэ сыс патывалэ́ тэрнэ́ джувля́, савэ́ марэнас дрэ бубны.

²⁷ Славинэ́н и парикирэ́н Дэвлэ́скэ одо́й, кай мануша́ скэдэ́напэ ваш Ра́скэ-Дэвлэ́скэ, тумэ́, кон сан Израилёскирэ родо́стыр.

²⁸ Пэ́рво джа́ла тэрнэдыр Вен΄ямино, лэ́нгиро барыдыро́, тхага́рья Юдэя́тыр пэ́скирэ манушэ́нца, тхага́рья Завулоностыр, тхага́рья Нефалимостыр.

²⁹ Дэ́вла, сыка́в Тыри́ зор: зоралякир далэ́ рэ́нды (де́лы), со Ту кэрдя́н ваш амэ́нгэ.

³⁰ Соб (кай) кра́лья тэ янэ́н да́ры Ту́кэ дрэ Тыри́ Кхангири́ кэ Ерусалимо.

³¹ Штылякир рискирибна́скирэ мурдалэ́н (зверен) дрэ тришчына, гурувэнгирэ ґурты, савэ́ исын манушытконэ́ целянтэнца, пака ёнэ бандёна шэрэнца анги́л рупэскирэ котэра́. Росчхурдэ манушыпнаскирэ на́цыи, со древа́н радынэ́напэ марибнастыр.

³² Выкэдынэ́ мануша́ явэ́на Египто́стыр, Эфиоптяни вытэрдэна пэ́скирэ васта́ кэ Дэвэ́л.

³³ Бага́н Дэвлэ́скэ, пхувья́кирэ кралипэна́, бага́н шарибнытка гиля́ Ра́скэ-Дэвлэ́скэ. Сэ́ла:

³⁴ Саво́ традэ́ла уклисто пэ болыбэ́н, ве́чно болыбэ́н! Гада, Ёв дэ́ла го́дла Пэ́скирэ зоралэ́ заня́са.

³⁵ Приґалён шарибнаса Дэвлэ́скиро зоралыпэ́н! Лэ́скиро фэдырипэн исын пир Израилё и Лэ́скири зор дрэ о́блоки.

³⁶ [р.с.] О, Дэ́вла, Саво́ исын зорало́ кэ дар пэ Лэ́скирэ свэ́нта штэ́ты. Израилёскиро Дэвэ́л! Ёв дэ́ла зоралыпэ́н и зор Лэ́скирэ манушэ́нгэ. Мэк тэ славинэлпэ Дэвэ́л!