Psalmy 67 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Пэ Балытка Струме́нты. Пса́лмо. Гилы́.

² Мэк Дэвэ́л тэ явэ́л лачхэ́-илэ́скиро тэ примангэл грэ́хи амэ́нгэ и тэ бахтякирэ́л амэн и, соб (кай) Лэ́скирэ-москиро дуд (свэ́то) тэ свэнцынэл пэ амэ́ндэ. Сэ́ла.

³ Соб (кай) сарэ́ пэ пхув тэ джинэ́н Тыро́ дром, сарэ́ Наюды́тка на́цыи тэ джинэ́н, со Ту зракхэ́са.

⁴ Мэк сарэ́ манушыпнаскирэ на́цыи тэ парикирэ́н Ту́кэ, Дэ́вла, мэк сарэ́ на́цыи тэ парикирэ́н Ту́кэ.

⁵ Мэк тэ явэ́н весе́ла (лошалэ́) сарэ́ на́цыи и, мэк тэ шарэ́н гиляса, со Ту сэндякирэса манушэ́н пэ пхув пир чачипэ́н. Сэ́ла.

⁶ Мэк тэ парикирэ́н Ту́кэ, Дэ́вла, сарэ́ на́цыи, мэк тэ парикирэ́н Ту́кэ сарэ́ на́цыи.

⁷ Пхув дыя́ пэ́скиро аплодо: Дэ́вла, амаро́ Дэвэ́л бахтякир амэн.

⁸ [р.с.] Мэк тэ бахтякирэ́л амэн Дэвэ́л, мэк сарэ́ кэ пхувья́кирэ яго́ры (концы) тэ дарэ́н Лэ́стыр.