Psalmy 64 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Давидо́скиро Пса́лмо.

² Шун, Дэ́вла, мири́ зан, ке́ли мэ жалинавапэ, приракх миро джиибэ́н вэргостыр, саво́ трашакирэла ман,

³ гарав ман чораханэ зракирибнастыр, саво́ лыджа́ла кэ би́да, бунтостыр, со кэрэ́на чорэ́ мануша́,

⁴ савэ́ точынэна (дэ́на чол) пэ́скирэ данда́ сы́рбы курта́ла; ёнэ чхудэ́ киркэ лава́ сы́рбы бустя́ пэ лу́ко,

⁵ соб (кай) тэ дэн карье дрэ бидошэнгирэ манушэ́стэ, ке́ли ёнэ гарадёна. Екха́тыр (сра́зу) ёнэ дэ́на карье дрэ лэ́стэ и ёнэ на страхадёна.

⁶ Ёнэ подмарэна пэс пэ чорэ́ рэ́нды, ёнэ зракирэнапэ тэ чхувэ́н фэля́ чораханэ́с, ёнэ ракирэ́на: “Кон явэ́ла тэ дыкхэ́л?”

⁷ Ёнэ придуминэна тэ кэрэ́н чорипэ́н: “Амэ скэдыямпэ тэ кэра́с дова́, со придуминдям бидошэ́нгиро.” Годы́ и ило́ манушэ́нгирэ исын хор гарадэ́.

⁸ Нэ Дэвэ́л явэ́ла тэ дэл карье дрэ лэ́ндэ, со лэ́нгирэ фра́нсы (раны) екха́тыр сыкадёна,

⁹ соб (кай) ёнэ тэ пэрэ́н екх пэ екхэ́стэ пэ́скирэ чибатыр, кажно ману́ш удыкхэ́ла, ке́ли ёнэ нашэ́на криг.

¹⁰ Сарэ́ мануша́ страхадёна и ёнэ явэ́на тэ ракирэ́н сарэ́нгэ пал Дэвлэ́скири буты́; чачо́, ёнэ явэ́на тэ ґалён Лэ́скири буты́ годя́са.

¹¹ [р.с.] Чачипнаскирэ явэ́на тэ радынэ́нпэ Дэвлэ́стыр и ёнэ явэ́на тэ рисён кэ Ёв тэ зракхэнпэ и сарэ́ чачунэ́ илэ́са явэ́на тэ шарэнпэ.