Psalmy 62 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Едуцыноскэ. Давидо́скиро Пса́лмо.

² Дрэ Екхэ́стэ Дэвлэ́стэ миро ди исын штыл, Лэ́стыр джа́ла миро зракхибэ́н.

³ Ёв, Екх, исын мири́ ска́ла тэ зракхавпэ, и мири́ тва́рдыма (диз); мэ ж на пэрава.

⁴ Кицы́ тумэ́ явэ́на тэ пэрэ́н пэ екхэ манушэ́стэ? Тумэ́ родэ́на сарэ́н тэ заравэн сыр доя́ ва́нта, со бандия, сыр тыно, со издрала.

⁵ Ёнэ екх зракирэнапэ тэ зравэн лэс лэ́скирэ райканэ штэто́стыр; ёнэ бахталёна хохаибнэндыр. Ёнэ шарэна пэ́скирэ мо́са, нэ ёнэ прокошэна дрэ пэ́скирэ илэ. Сэ́ла.

⁶ Екх дрэ Дэвлэ́стэ Екхэ́стэ миро ди исын штыл, пал-дова́ со мэ ужакирава лачхипэ́н Лэ́стыр.

⁷ Ёв, Екхджино́, затэрдёла пал ма́ндэ и зракхэ́ла ман, Ёв исын миро гарадыипэн, мэ на пэрава,

⁸ Миро зракхибэ́н и мири́ сла́ва Дэвлэ́стыр, Саво́ исын сы́рбы зоралы́ вучарды́ (башня), кэ Кон мэ рисёва́ва тэ гарадёвав.

⁹ Рисён кэ Ёв тэ гарадён кажно мо́ло, тумэ́, мануша́лэ, пхэнэ́н саро́, со исын пэ ило́, анги́л Лэ́стэ. Кэ Дэвэ́л мэ рисёва́ва тэ гарадёвав. Сэ́ла.

¹⁰ Чачо́: манушы́тка чхавэ́ исын сы́рбы бэльвэлякиро пхурдыпэн, манушэ́нгирэ чхавэ́ исын хохаибэ́н. Ке́ли ту поважынэса лэн пэ ублады́тка (весы), тэды ёнэ исын локхэды́р бэльвэлякирэ пхурдыпнастыр (дуновениёстыр).

¹¹ На ри́скир ило́ тэ тасавэн манушэ́н, на пхутёв чорибнаса. Ко́ли розбарвалёса, усае́кх на отдэ́ пэ́скиро ило́ барвалыпнаскэ.

¹² Дэвэ́л пхэндя́ е́кхвар; мэ шундём дуй мо́лы дава́, со сари́ зор исын Дэвлэ́стыр.

¹³ [р.с.] Адя́кэ-паць Ту́тыр, Раё Дэ́вла, сари́ лачхэ́-илы́ткима, Ту отдэса палэ кажнонэ́ манушэ́скэ пир дова́, со ёв кэрдя́.