Psalmy 6 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Пэ балытка Струме́нты. Пэ охто́-балытко Гитара. Давидо́скиро Пса́лмо.

² О, Раё Дэ́вла, на́ бангякир ман, ке́ли Ту древа́н холясоса пэ ма́ндэ, на́ чхув ка́ра пэ ма́ндэ, ке́ли Ту сан холынакиро пэ ма́ндэ.

³ Потангинэ ман, о Раё Дэ́вла, мэ ж сом дасаво бизорья́киро, састякир ман, Раё Дэ́вла, пал-дова́ со мирэ́ кокалы́ издрана.

⁴ Миро ди адя́кэ-паць издрала, Ту, Раё Дэ́вла, сыр ґара́ тэ ужакирав Тыро́ подрикирибэ́н?

⁵ Рисёв, Раё Дэ́вла, и зра́кх ман мэрибна́стыр, приракх миро ди ваш Тыри́ лачхэ́-илы́ткима.

⁶ Пал-дова́ со муло́ на явэ́ла тэ рипирэл Тут. Кон явэ́ла тэ парикирэл Ту́кэ маґилатыр?

⁷ Мэ адя́кэ зоралэ́с кхиныём мирэ́ пиридживипнастыр ґонденца (ўздохэнца), миро чхуибэ́н исын киндо пал рат мирэ́ роибнастыр, мири́ цэ́рга исын пхэрды́ сари́ пане́са мирэ́ ясвэндыр.

⁸ Мирэ́ якха́ на́бут дыкхэ́на мирэ́ калыпна́стыр. Ёнэ пхуранынэ мирэ́ вэргэ́ндыр.

⁹ Джа́н криг ма́ндыр сарэ́ чорэ́ мануша́. Пал-дова́ со Рай Дэвэ́л шундя́ миро роибэ́н.

¹⁰ Рай Дэвэ́л шундя́, сыр мэ зоралэ́с мангдём Лэс, Рай Дэвэ́л прилэ́ла, сыр мэ мангавапэ Лэ́скэ.

¹¹ Мэк сарэ́ мирэ́ вэ́рги тэ явэ́н ладжакирдэ́ и тэ издран. Мэк ёнэ тэ рисён палэ и тэ явэ́н ладжакирдэ́ екха́тыр (сра́зу).