Psalmy 59 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. “На хасякир” пэ Мелодия, Давидоскири гарады Наде́я, ке́ли Савло бичхадя́ Манушэ́н и ёнэ дыкхнэ́ цямкэс пал Кхэр, соб (кай) тэ замарэ́н лэс.

² Дэ́вла миро! Зра́кх ман мирэ́ вэргэ́ндыр, чхув ман пэ вучипэ́н одолэ́ндыр, савэ́ ґаздэ́напэ пэ ма́ндэ.

³ Зра́кх ман манушэ́ндыр, савэ́ кэрэ́на чорипэ́н и зра́кх ман одолэ́ндыр, кон исын нахрата кэ рат.

⁴ Пал-дова́ со ґа́да, ёнэ подракхэна тэ замарэ́н ман; зор мануша́ скэдэ́напэ пэ ма́ндэ: на пал мирэ́ чорэ́ рэ́нды ци пал миро грэ́хо, о Раё Дэ́вла!

⁵ Ёнэ праста́на и сыклякирэ́на екх екхэ́с, на дыкхи́, со нанэ банг ма́ндэ. Джанґадёв тэ помогинэс ма́нгэ и подыкх.

⁶ И Ту, о Раё Дэ́вла, болыбна́скирэ-янголэ́нгиро, Израилёскиро Дэвэ́л, ушты́ и яв тэ дыкхэ́с сарэ́ на́цыи, на тангинэ ни екхэ́с, кон зракирэлапэ тэ кэрэ́л чорипэ́н. Сэ́ла.

⁷ Бэльвэленца ёнэ рисёна палэ, ёнэ выинэна сы́рбы джукэла и обджана трусця́л фо́ро,

⁸ акэ, лэ́нгирэ муендыр чадэла, лэ́нгирэ уштэндыр джа́на лава́ сы́рбы востро (чолалы́) курта́ла, и ёнэ думинэ́на пэ́скэ: “Кон дава́ шунэ́ла?”

⁹ Нэ Ту явэ́са тэ саспэ лэ́ндыр, Раё Дэ́вла, Ту явэ́са тэ просас яви́р на́цыи.

¹⁰ Ту сан миро Зоралыпэ́н, пэ Ту́тэ мэ ява́ва тэ рикирав наде́я; Ту, Дэ́вла, сан мири́ тва́рдыма тэ гарадёвав ма́нгэ.

¹¹ Миро Дэвэ́л, Саво́ тангинэла ман, явэ́ла тэ дыкхэлпэ ма́нца, Дэвэ́л дэ́ла ма́нгэ тэ дыкха́в, сыр мирэ́ вэ́рги пэрэ́на.

¹² На замар лэн, соб (кай) мирэ́ мануша́ тэ на бистрэн лэн, росчхурдэ лэн Тырэ́ зорья́са и рав тэлэ́ лэн, амаро́ Раё Дэ́вла, Ту сан шчы́то амаро́.

¹³ Лэ́нгирэ мо́стыр джа́на грэхи́тка лава́, мэк ёнэ тэ дэнпэ дукха́ (тэ хохавэнпэ) пэ́скирэ пхутькирибнастыр пал дова́, со ёнэ прокошэнас и хохавэнас.

¹⁴ Хасякир лэн дрэ Пэ́скири холы́, хасякир, соб (кай) ёнэ тэ на явэ́н, соб (кай) ёнэ тэ джинэ́н, со Дэвэ́л кралинэла Яковостыр аж кэ яго́ры (кэ краи́) пхувья́кирэ. Сэ́ла.

¹⁵ И ёнэ явэ́на палэ бэльвэленца, и мэк ёнэ тэ выинэн сы́рбы джукэла и тэ псирэ́н трусця́л фо́ро;

¹⁶ мэк ёнэ тэ псирэ́н одори́к и палэ пал хабэ́н, мэк ёнэ тэ рыкинэн, ко́ли тэ на явэ́н чалэ.

¹⁷ Нэ мэ ява́ва тэ бага́в пал Тыро́ зоралыпэ́н; чачо́ мэ ява́ва тэ бага́в зоралэ́с пал Тыри́ лачхэ́-илы́ткима злокостыр (ранкостыр): со Ту са́нас ваш ма́нгэ сы́рбы зоралы́ тва́рдыма (диз) тэ гарадёвав и наде́я дрэ пхарэ́ дывэса́.

¹⁸ [р.с.] Мэ ява́ва тэ бага́в: “Ту сан мири́ Зор, Ту сан миро Дэвэ́л, Саво́ приракхэла ман. Миро Дэ́вла, Саво́ тангинэла ман.”