Psalmy 58 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. “На хасякир.” Давидоскири гарады Наде́я.

² Со сыкавэ́ла, со тумэ́ ракирэ́на чачипэ́н? Ци чачунэ́с тумэ́ сэндякирэна, чхавэ́ манушы́тка?

³ Над, тумэ́ кэрэ́на фуипэ́н дро тумаро́ ило́; тумэ́ сы́рбы важынэна пэ ублады́тка (весы) нахрата рэ́нды тумарэ́ вастэ́нца пэ пхув.

⁴ Фуй мануша́ джа́на криг Дэвлэ́скирэ дромэ́стыр ишчо (инкэ́) да́кирэ лочовя́тыр, ёнэ кэрэ́на блэнды тэды, ке́ли ёнэ сыс дро да́киро пэр, хохаи́.

⁵ Ёнэ исын пхэрдэ́ трутаса (ядоса) сы́рбы сапэскирэ трутаса, ци сы́рбы кашукэ ґадостэ, со закэрэла пэ́скирэ ушта́,

⁶ саво́ на шунэ́ла човаханэскири (чараўникоскири) зан, кон адя́кэ рангирэс човаханякирэла.

⁷ Дэ́вла, выпхагир лэ́нгэ данда́ дро муй, попхагир сарэ́са клыки тэрнэ́ шчэрэнгирэ, о Раё Дэ́вла!

⁸ Мэк ёнэ тэ розбиладён сыр пани́, со тхадэ́ла, мэк тэ пхадён лэ́нгирэ марибны́тка бустя́ (стре́лы) лукостыр, ке́ли надтырдэна лэн.

⁹ Мэк ёнэ тэ явэ́н сы́рбы слимаки (улитки), со розбиладёна дрэ пэ́скири сьлизь, мэк ёнэ тэ явэ́н сы́рбы счхурдыно бия́то джувля́тэ, саво́ на удыкхэ́ла кхам.

¹⁰ Анги́л дова́, сыр кэ пирья доджа́ла кодри́лё ци тэ явэ́л ёв зэлэно, ци шуко тэ хачол, Дэвэ́л укэдэла лэн криг рискирдонэ балваляса (вихроса).

¹¹ Чачипна́скиро ману́ш явэ́ла тэ радынэ́лпэ, ке́ли ёв чхувэ́ла ка́ра пэ чорэ́ манушэ́ндэ, и ёв выморэла пэ́скирэ пирэ́ (сто́пы) дро фуе́-манушэ́нгиро рат:

¹² [р.с.] и пхэнэ́ла ману́ш: “Чачо́, исын лачхо́ отдыибэ́н палэ пал чачипнаскирэстэ. Чачо́, Дэвэ́л исын Одова́, Саво́ сэндякирэ́ла пэ пхув.”