Psalmy 57 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. На хасякир. Давидоскири Наде́я, ке́ли Ёв насця Саулостыр дрэ Ѓебар (Пешчэра).

² Яв тангипна́скиро (пожа́лин) кэ мэ, о Дэ́вла, яв тангипнаскиро: со миро ди рисия́ кэ Ту тэ зракхэлпэ: мэ ява́ва тэ гарадёвав дрэ зэр (тенё) Тырэ́ пхакэнгири, пака бари би́да проджа́ла (накхэла).

³ Мэ да́ва го́дла Дэвлэ́скэ, Най Вучэдырэскирэскэ, Дэвлэ́скэ, Саво́ кэрэ́ла саро́ ваш ма́нгэ.

⁴ Ёв отпхэнэ́ла ма́нгэ болыбна́стыр и зракхэ́ла ман; Ёв ладжакирэла одолэ́с, кон пхагирэ́ла ман. Сэ́ла. Дэвэ́л бичхавэ́ла Пэ́скири лачхэ́-илы́ткима и чачипэ́н.

⁵ Миро ди исын машки́р шчэрэндэ (левэндэ), мэ сом пашто́ машки́р одолэ́ндэ, савэ́ хачона яга́са, – манушы́тка чхавэ́, конэскирэ данда́ исын сы́рбы чхурдыбнытка бустя́ (коп΄и) и марибны́тка бустя́ (стре́лы), лэ́нгири чиб исын сы́рбы востро (чолалы́) курта́ла.

⁶ Тэ шарэл Тут вучэды́р болыбна́стыр, о Дэ́вла, мэк тэ явэ́л Тыри́ сла́ва пир сари́ пхув.

⁷ Ёнэ чхудэ́ фэлы́ (сеть) тэл мирэ́ ґэра́, миро ди исын бандякирдо тэлэ́. Ёнэ выганадэ ґанби́н анги́л ма́ндэ: ёнэ кокорэ́ пынэ́ дрэ ла́тэ. Сэ́ла.

⁸ Миро ило́ зоралэ́с патя́ла: Дэ́вла, миро ило́ зоралэ́с патя́ла; мэ ява́ва тэ бага́в и шара́в Тут.

⁹ Джагадёв, миро бариканыпэн! Джангадёв, гусли и арфа. Мэ джангавава кхам, сыр дывэсёла.

¹⁰ Мэ ява́ва тэ шара́в Тут машки́р манушэ́ндэ, о Раё Дэ́вла, мэ ява́ва тэ бага́в Ту́кэ машки́р кхэри́тка ро́ды (пле́ми).

¹¹ Тыри́ лачхэ́-илы́ткима исын вучэды́р болыбна́стыр и Тыро́ патяибэ́н доджа́ла кэ о́блоки.

¹² [р.с.] Тэ шарэл саро́ Тут вучэды́р болыбна́стыр, о Дэ́вла, мэк тэ явэ́л Тыри́ сла́ва пир сари́ пхув.