Psalmy 55 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ пэ Балытка Струме́нты. Сыклякирибэ́н. Давидо́скиро Пса́лмо.

² О, Дэ́вла, причху́в кан кэ мири́ па́тери (модла) и на гарадёв, сыр мэ ровава:

³ шун ман и отпхэн ма́нгэ: мэ псирава пэ́скэ и ладжава пэ́стыр

⁴ вэргэ́нгирэ занендыр и фуе́ манушэ́ндыр, савэ́ тасавэна ман. Ёнэ чхувэ́на банг пэ ма́ндэ и бидыкхэна ман дрэ холы́.

⁵ Миро ило́ дукхала андра́л ма́ндэ и мэрибнаскири дар пыя́ пэ ма́ндэ,

⁶ мэ издрава и трашаибэ́н явдя́ пэ ма́ндэ, и ман обухтылдя бари дар.

⁷ И мэ пхэндём: “Кон дэ́лас пхака́ (крылы) ма́нгэ сыр голумбоскэ? Мэ тэды вурнявас криг и откхинёвавас,

⁸ акэ, мэ дурьёвавас дур, и мэ ячававпэ тэ джива́в пэ чхучи́ пхув (пустыня). Сэ́ла.

⁹ Мэ сыгнёвава тэ зракхавпэ зоралэ́ балвалятыр и барэ́ штормостыр.”

¹⁰ Пхагир лэн, о Раё Дэ́вла, роскэ́р лэ́нгирэ чиба́ (чибья́); пал-дова́ со мэ дыкхцём, савэ́ ёнэ исын нахра́та (насильники) и кошэнапэ;

¹¹ ёнэ псирэ́на пир фо́ро пир лэ́скирэ ва́нты, дывэсэ́ и раты́ ёнэ кэрэ́на чорипэ́н и пхарипэ́н екх екхэ́скэ,

¹² хасибэ́н исын машкира́л дава́ фо́ро, хохаибэ́н и тасаибэн исын усады (сак) пэ лэ́скирэ вули́цы (га́сы).

¹³ Пал-дова́ со дава́ исын на вэ́рго, саво́ обракирэла ман, мэ давас ра́да тэ лыджав дава́: ци явэ́лас адасаво́ ману́ш, саво́ бидыкхэла ман и ґаздэ́ла пэс шарибнаса пэ ма́ндэ, мэ гарадёвавас лэ́стыр,

¹⁴ нэ дава́ ту сан, кадасаво́ сыр мэ сом, миро мал и миро пинджкирдо ману́ш,

¹⁵ конэса амэ гудлэс ракирдям сарэ́ илэ́стыр и савэ́са амэ псирдям кхэтанэ́ явирэ скопоса манушэнгирэса дро Дэвлэ́скиро Кхэр.

¹⁶ Мэк мэрибэ́н тэ ухтылэл лэн. Мэк ёнэ джидэ́ тэ джа́н тэлэ́ кэ штэ́то, кай исын лю́но (адо). Чорипэ́н исын дро лэ́нгиро кхэр и ило́.

¹⁷ Нэ мэ кхара́ва Дэвлэ́с тэ помогинэл ма́нгэ и Рай Дэвэ́л зракхэ́ла ман.

¹⁸ Бэльвэле́нца, тасярлэ́нца и дывэсэ́нца мэ ява́ва тэ жалинавпэ и тэ издрав роибнаса, и Ев явэла тэ шунэ́л мири́ зан,

¹⁹ и Ёв выракхэла миро ди раманёса марибнастыр, со лыджинэ́ пэ ма́ндэ, со исын бут лэн проти ма́ндэ.

²⁰ Дэвэ́л явэла тэ шунэ́л и отпхэнэ́ла лэ́нгэ, дава́ Ёв, Саво́ исын пэ троно пэ сарэ́ ве́ки. Сэ́ла. Нэ ёнэ на парудёна, нанэ лэ́ндэ трашаибэ́н Дэвлэ́стыр.

²¹ Ёнэ ґаздынэ́ васт пэ одолэ́ндэ, савэ́ сыс дро рама́нё лэ́нца; ёнэ пхагирдэ́ пэ́скиро доракирибэ́н;

²² лава́ лэ́нгирэ мо́стыр сыс ґладкэдыр ксилэстыр, лэ́нгирэ пхэныбэна сыс ковлэдыр маслинитконэ дзэтэстыр (елеёстыр), нэ пала́л пал ландэ сыс востра (чолалэ) курталы.

²³ Мэк пэ́скиро кало́ пхарипэ́н пэ Растэ-Дэвлэ́стэ, и Ёв приракхэла тут. Ёв на домэкэла ние́кхвар, соб (кай) чачипнаскирэ мануша́ тэ обштавэнпэ.

²⁴ [р.с.] Нэ Ту, Дэ́вла, янэса тэлэ́ лэн дрэ хасибны́тко ґанби́н (яма); а мануша́, савэ́ прочхудэ рат и савэ́ хохавэнас, на продживэна пэ́скирэ паш дывэса́. Нэ мэ рисёва́ва кэ Ту, Дэ́вла, тэ зракхавпэ.