Psalmy 53 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ пэ Дудка. Сыклякирибэ́н. Давидо́скиро Пса́лмо.

² Дылыно́ пхэндя́ пэ́скэ: “Нанэ Дэвлэ́с!” Мануша́ ячнэ́ розмэкнэ: ёнэ кэрдэ́ фуипэ́н, со́стыр манушэ́нгэ яця́ джунгало́, нанэ ни екхэ́с, кон кэрэ́ла пир чачипэ́н.

³ Дэвэ́л подыкхця́ болыбна́стыр пэ манушэ́скирэ чхавэ́ндэ, соб (кай) тэ дыкхэ́л, ци исын вари-кон, саво́ ґалёлас и родэлас Дэвлэ́с.

⁴ Сарэ́ рисинэ́ криг, ёнэ сарэ́ ячнэ́ чорэ́ мануша́: нанэ ни екхэ́с, кон кэрэ́ла пир чачипэ́н, нанэ ни екхорэс!

⁵ Нау́што чорэ́ манушэ́ндэ нанэ годы́, со ёнэ ха́на мирэ́ манушэ́н сы́рбы ёнэ ха́на маро́? А ёнэ на кхарэ́на Дэвлэ́с.

⁶ Одо́й ёнэ явэ́на дро баро́ трашаибэ́н, кай нанэ трашаибэ́н, пал-дова́ со Дэвэ́л росчхурдэла кокалы́ одолэнгирэ, савэ́ обджана трусця́л (кругом) марибна́са пэ Лэ́скирэ манушэ́ндэ. Ёнэ явэ́на ладжакирдэ́, пал-дова́ со Дэвэ́л чхудя́ лэн дрэ бипатыв.

⁷ [р.с.] Кон явэ́ла Сионо́стыр тэ зракхэ́л Израилё! Ке́ли Дэвэ́л янэ́ла палэ Лэ́скирэ манушэ́н плено́стыр, тэды Яково явэ́ла тэ радынэ́лпэ, и Израилё явэ́ла бахтало́.