Psalmy 52 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Сыклякирибэ́н. Давидо́скиро Пса́лмо,

² ке́ли Донг Эдумиятыр явдя́ и роспхэндя́ Сауло́скэ, пхэни́: ‘Дави́до загия́ дро Ахимелехоскиро кхэр.’

³ Со́скэ ту шарэсапэ фуипнаса, ту, муршари? Дэвлэ́скири лачхэ́-илы́ткима исын усады (сак) ма́нца пэ сарэ́ ве́ки.

⁴ Тыри́ чиб придуминэла хасибэ́н сыр востро (чолалы́) чхури, ёй кэрэ́ла буты́ ваш хохаибэ́н.

⁵ Ту́кэ исын пир ило́ фуипэ́н буты́р лачхипнастыр, ту буты́р хохавэса, сыр ракирэ́са чачипныткэс. Сэ́ла.

⁶ Ту́кэ исын пир ило́ лава́ кэ хасякирибэн, чиб хоханы.

⁷ Дэвэ́л хасякирэ́ла тут адя́кэ пэ сарэ́ ве́ки и чхурдэ́ла тут криг и выкушэла тут шатратыр и вырискирэла тут корне́нца (рукхэ́нца) пхувья́тыр, кай дживэ́на мануша́. Сэ́ла.

⁸ Чачипнаскирэ мануша́ явэ́на тэ дыкхэ́н и на явэ́на тэ страхадён и тэ санпэ лэ́ндыр, пхэни́:

⁹ “Дыкхэ́н! Акэ, исын ману́ш, саво́ на чхудя́ пэ́скири наде́я пэ Дэвлэ́стэ, нэ ёв рисёлас кэ пэ́скиро барвалыпэ́н и ячэласпэ зоралэды́р тэ хасякирэ́л”

¹⁰ [р.с.] Нэ мэ сом сы́рбы зэлэно маслинитко дрэ́во дро Дэвлэ́скиро Кхэр, мэ рисёва́ва кэ Дэвлэ́скири лачхэ́-илы́ткима пэ сарэ́ ве́ки.

¹¹ [р.с.] Мэ ява́ва ўса́ды (сак) тэ парикира́в Дэвлэ́скэ пэ сарэ́ ве́ки, со Ту кэрдя́н дава́, Дэ́вла! Мэ ява́ва тэ ужакирав лачхипэ́н Тырэ́ лавэ́стыр, пал-дова́ со Тыро́ лав исын лачхо́.