Psalmy 50 - Библия - Пэ Балтитко Романи чиб (Романэс) 2019

¹ Асафоскиро Пса́лмо. Дэвэ́л дэвлэнгиро, Сарэзорья́киро Рай Дэвэ́л пхэндя́ и кхарэ́ла сари́ пхув ягоро́стыр, кай кхам уштэ́ла и кэ яго́ро (краё), кай кхам джа́ла тэлэ́.

² Сионо́стыр, бидошэнгирэ шукарипнастыр, Дэвэ́л зазяиндя.

³ Амаро́ Дэвэ́л явэ́ла и Ёв исын на штыл; яг, сави́ ха́ла саро́, джа́ла анги́л Лэ́стэ и явэ́ла древа́н штормитко балва́л.

⁴ Ёв прикхарэла Болыбна́скиро Раё вучипна́стыр и пхув тэ сэндякирэ́л Лэ́скирэ манушэ́н:

⁵ “Скэ́дэ Мирэн свэнтонэн кхэтанэ́ кэ Мэ, савэ́ кэрдэ́ Завето Ма́нца свэнтонэ́ дыибнаса (жэртваса).”

⁶ Мэк тэ пхэнэ́л Болыбна́скиро Раё сарэ́нгэ пал лэ́скиро чачипэ́н, со Дэвэ́л Кокоро́ исын сэнда́ри! Сэ́ла.

⁷ “Шунэ́н, Мирэ́ мануша́лэ; и Мэ ява́ва тэ ракира́в. Мэ ява́ва тэ допхэнав пэ ту́тэ, о Изра́иле, Мэ сом Дэвэ́л, сом тыро́ Дэвэ́л!

⁸ Мэ на ява́ва древа́н тэ бангякирав тут пал тырэ́ свэ́нта дыибэна́, ци пал хачкирибнаскирэ свэ́нта яныбэна́, савэ́ исын усады (сак) анги́л Ма́ндэ.

⁹ Мэ на ява́ва тэ лав гурувэ́н тырэ́ кхэрэ́стыр ци бузнэн (козлэн) тырэ́ ґуртэндыр,

¹⁰ пал-дова́ со кажно рискирибна́скиро мурда́л (зверё) дро вэш исын миро, и мурда́л пэ бэ́рги, савэ́ исын тысёнцы.

¹¹ Мэ джино́м (джина́в) сарэ́ чириклен бэргэндыр и сарэ́ мурдалэ́н (жывотнонэн) пир Мирэ́ фэ́лды ёнэ исын Мирэ́:

¹² “Ко́ли мэ явавас бокхало, мэ на пхэнавас Ту́кэ: пал-дова́ со свэ́то исын Миро и саро́, со́са ёв исын пхэрдо́.

¹³ Ци Мэ хава гурувэнгиро мас, ци Мэ пьява бузнэнгиро рат?

¹⁴ Ян свэ́нто дыибэ́н парикирибнаса Дэвлэ́скэ и отдэ́ палэ Най Вучэдырэскирэскэ, пал со ту дыя́н совла́х.

¹⁵ И кхар Ман дрэ дывэса́, ке́ли Ту́тэ исын бари дар, и Мэ зракха́ва тут, и ту барьякирэса кэ вучипэ́н Ман.”

¹⁶ Нэ Дэвэ́л ракирэ́ла фуе́ манушэ́скэ: “Со́скэ ту ракирэ́са сарэ́нгэ пал Мирэ́ стату́ты, и ракирэ́са пэ́скирэ мо́са пал Миро Завето?

¹⁷ а усае́кх ту́кэ древа́н исын на пир ило́ Миро сыклякирибэ́н пал чачипэ́н и ту чхурдэса Мирэ́ лава́ пал пэ́стэ?

¹⁸ Ке́ли ту дыкхэ́са чорэс, тэды ту зджасапэ лэ́са и ту са́нас кхэтанэ́ одолэнца, савэ́ кэрэ́на биладжаипэ́н.

¹⁹ Ту дэ́са во́ля пэ́скирэ москэ тэ ракирэ́л чорипэ́н и пэ́скирэ чибакэ (чибьякэ) тэ счхувэл хохаибэ́н.

²⁰ Ту сан бэшто́ и ракирэ́са пэ пэ́скирэ пшалэ́стэ: ту бангякирэса хоханэ́с тырэ́-да́кирэ чхавэ́с.

²¹ Ту кэрдя́н Дава́ и Мэ со́мас штыл (тихо); ту думиндян, со Мэ сом адасаво́, сыр ту сан. Нэ Мэ сыкава́ва тыри́ банг и чхува́ва дава́ екх пал екх анги́л тырэ́ якха́.

²² Подуминэн пал дава́ тумэ́, кон бистрэла Дэвлэ́с, соб (кай) Мэ тэ на роскушав тумэн, со на явэ́ла никонэ́с тэ зракхэ́л тумэн.

²³ Кон парикирэла Дэвлэ́скэ свэнтонэ́ яныбнаса, кодова́ славинэла Ман и Мэ сыкава́ва лэ́скэ, сыр Дэвэ́л зракхэ́ла лэс, и саво́ придыкхэла пал пэ́стэ тэ дживэ́л пир чачипэ́н.