Psalmy 48 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Кареёскирэ-Чхавэ́ндыр Пса́лмо.

² Дэвэ́л исын баро́ и Лэс древа́н шарэна дро амаро́ Дэвлэ́скиро фо́ро, пэ Лэ́скири свэ́нто бэ́рга.

³ Бэ́рга Сио́но исын шука́р и вучи́, ёй исын сарэ́-пхувья́кири ра́дыма, и исын пэ паш-ратитка (северна) яго́ры (кра́и), фо́ро, кай исын баро́ кра́ли.

⁴ Дэвэ́л сыкадя́, со сашты́ тэ гарадёс дрэ Лэ́скирэ-форо́скиро рикирибэн бидатыр:

⁵ ґа́да, стрэниндлэпэ кра́лья и гинэ́ пэ́скэ,

⁶ ёнэ дыкхнэ́ и ёнэ древа́н дивиндлэ́пэ,

⁷ ёнэ страха́дынэ и нашнэ́, ёнэ лынэ́ тэ издран дукхаса сы́рбы джувлы́, сави́ биянэ́ла.

⁸ Ту пхагирэса Фарсисоскирэ па́рмы (корабли) васточнонэ балваляса.

⁹ Сыр амэ шундя́м, адя́кэ-паць амэ дыкхцям дро фо́ро амарэ́ Ра́скирэ-Дэвлэ́скиро, болыбна́скирэ-янголэ́нгиро, дро фо́ро амарэ́ Дэвлэ́скиро, саво́ Дэвэ́л зачхудя пэ сарэ́ ве́ки. Сэ́ла.

¹⁰ Амэ думиндям пал Тыро́ дро́го лачхипэ́н, о Дэ́вла, машки́р Тыри́ Кхангири́.

¹¹ Сыр Тыро́ лав исын, адя́кэ-паць и шарибэна пал Ту́тэ джа́на кэ пхувья́кирэ яго́ры (краи́), Тыро́ чачо́ васт кралинэла чачипна́са.

¹² Мэк тэ явэ́л лошалы (весёло) Сионо́скири бэ́рга, мэк тэ явэ́н весе́ла (лошалэ́) Юдэя́кирэ чхая́, со Ту сэндякирэса чачунэ́с.

¹³ Джа́н трусця́л Сио́но и обджан, пашы́л лэ́стэ; подгинэн лэ́скирэ вучардя (башни),

¹⁴ рискирэ́н Пэ́скиро ило́ кэ форо́скирэ валы, придыкхэнпэ кэ лэ́скирэ грэды (дворы), соб (кай) тумэ́нгэ тэ пхэнэ́н манушэ́нгирэ родэ́нгэ, савэ́ явэ́на,

¹⁵ [р.с.] со дава́ Дэвэ́л исын амаро́ Дэвэ́л пэ сарэ́ ве́ки и ўса́ды (сак): Ёв явэ́ла тэ лыджа́л амэн аж кэ мэрибэ́н.