Psalmy 46 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Кареёскирэ Чхавэ́ндыр пэ Чхаенгири Зан (Аламото).

² Дэвэ́л исын амаро́ гарадыипэн и зоралыпэ́н, Ёв дэ́ла васт, ке́ли исын пхаро́.

³ Палдава́ амэ на страхадёваса, мэк пхув кхарэ́лапэ и мэк бэ́рги тэ пэрэ́н тэлэ́ дрэ мо́ри (дэрьява́).

⁴ Мэк паня́ тэ брилинэн (тэ ревинэн) и тэ кэрдён пенаса, мэк бэ́рги тэ тринскирэнпэ пэ́скирэ зорья́тыр. Сэ́ла.

⁵ Исын екх рэка (лэнь), савья́кирэ паня́ обрадынэна Дэвлэ́скиро фо́ро, свэ́нто штэ́то, кай дживэ́ла Са́мо (Най) Вучэды́р.

⁶ Дэвэ́л исын дро дава́ фо́ро, ёв на пэрэ́ла: Дэвэ́л подэла васт далэ́ фороскэ тасярлатыр.

⁷ На́цыи росхолясынэ, кралипэна́ кхардэпэ криг (згинэ) штэто́стыр, а Дэвэ́л пхэндя́ Пэ́скирэ заня́са и пхув биладыя.

⁸ Рай Дэвэ́л, болыбна́скирэ-янголэ́нгиро, исын амэ́нца, Яково́скиро Дэвэ́л исын амаро́ гарадыипэн. Сэ́ла.

⁹ Явэ́н, дыкхэ́н Ра́скирэ-Дэ-влэскирэ бутя́, Кон кэрдя́ замэкибэн пэ пхув;

¹⁰ Кон кэрэ́ла адя́кэ, со марибэна кэ пхувья́кирэ яго́ры (краи́) кончынэнапэ, Ёв пхагирэ́ла лу́ко и пхагирэ́ла чхурдыпнытко буст (коп΄е) пэ котэра́; Ёв хачкирэ́ла сарэ́са яга́са марибны́тка вурдэна́.

¹¹ Явэ́н штыл и уджинэ́н: со мэ сом Дэвэ́л. Ман явэ́на тэ барьякирэ́н кэ вучипэ́н на́цыи, Ман явэ́на тэ барьякирэ́н кэ вучипэ́н сарэ́, кон исын пэ пхув.

¹² [р.с.] Рай Дэвэ́л, болыбна́скирэ-янголэ́нгиро, исын амэ́нца, Яково́скиро Дэвэ́л исын амаро́ гарадыипэн.