Psalmy 45 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Сыклякирибэ́н. Кареёскирэ Чхавэ́ндыр. Бьявэскири Гилы́.

² Миро ило́ исын пхэрдо́ бахталэ́ лавэ́нца: мэ ракира́ва пал крали́скирэ рэ́нды, мири́ чиб исын сыр лачхэ́-чхиныбнарискиро дэсторо (трость).

³ Ту сан най шукарэдыр манушыпаскирэ чхавэ́ндыр, бахталыпэ́н вычхудяпэ тырэ́ уштэндыр: пал-дова́ со Дэвэ́л бахтякирдя́ тут пэ сарэ́ ве́ки.

⁴ Пхандэ трусця́л пэ́скири курта́ла кэ пэ́скири ґэро́й (бёдро), мурш баро́, пэ́скирэ слава́са и барэ́ вучэдырипнаса,

⁵ и традэ уклистэ́ миштэ́с пэ́скирэ барэ́ вучэдырипнаса тэ затэрдёс пал патяибэ́н, ковлэ́-илы́ткима и чачипэ́н, а тыро́ чачо́ васт явэ́ла тэ сыклякирэ́л тут тэ кэрэ́л дова́, со́стыр дар лэ́ла.

⁶ Тырэ́ марибны́тка бустя́ (стре́лы) исын востра (чолалэ́) дро ило́ тырэ́ вэргэ́нгирэ, манушыпнаскирэ на́цыи пэрэ́на тэл Ту́тэ.

⁷ Тыро́ троно, со Дэвэ́л дыя́ ту́кэ, явэ́ла пэ сарэ́ ве́ки, тыро́ крали́скиро дэсто́ сыкавэ́ла, со ту кралинэса чачипныткэс.

⁸ Ту́кэ исын дро́го чачипэ́н и ту бидыкхэса фуипэ́н, палдава́ Дэвэ́л, тыро́ Дэвэ́л, помакхця тут тэ свэнцякирэл бахтякирдэ дзэтэса (елеёса) анги́л тырэ́ малэндэ.

⁹ Сарэ́ тырэ́ урибэна́ шука́р кхандэна миро́са, алоёса и касьяса, фэлатинендыр, со исын кэрдэ́ слонытконэ кокалостыр, башаибэн пэ балытка струме́нты радынэна тут.

¹⁰ Кральенгирэ чхая́ исын машки́р Тырэ́ патывалэ́ тэрнэ́ джувлендэ, кра́лица исын тэрды пашы́л Тыро́ чачо́ васт дро сувнака́й Иростыр.

¹¹ Шун ман, чха́ё, и дыкх, шун ракхунэс, со мэ пхэна́ва: и бистыр пэ́скирэ манушэ́н и кхэр тырэ́ дадэ́скиро.

¹² Крали́с древа́н притырдэла тыро́ шукарипэ́н; пал-дова́ со ёв исын тыро́ рай и ту явэ́са тэ клонинэспэ патыва́са лэ́скэ.

¹³ Тироскири чхай явэ́ла дарэнца, най барвалэдыр мануша́ явэ́на тэ домарэнпэ кэ тырэ́–илэ́скиро татыпэн.

¹⁴ Крали́скири чхай исын най славутнэдыр сарэ́ барэ фэлатинятыр (колово́стыр), ла́киро урибэ́н исын кхудо сувнака́стыр.

¹⁵ Ла янэ́на дрэ санэ судэ и́дя; чхае́н, ла́кирэ малнен (подругэн) пал ла́тэ янэ́на кэ кра́ли.

¹⁶ Сыр лэн янэ́на, ёнэ явэ́на весе́ла (лошалэ́) и тэ радынэ́нпэ, ке́ли заджа́на дро крали́скиро бари фэлатин/коло́в (дворцо).

¹⁷ Тырэ́ чхавэ́ пэ штэ́то тырэ́ дадэ́нгиро; Ту чхувэ́са лэн тхагарьенца тэ кралинэн,

¹⁸ [р.с.] соб (кай) тэ явэ́л джиндло́ Тыро́ лав сарэ́ родэ́нгэ, палдава́ манушы́тка на́цыи явэ́на тэ шарэ́н тут пэ сарэ́ ве́ки.