Psalmy 44 - Библия - Пэ Балтитко Романи чиб (Романэс) 2019

¹ Хоро́скирэ Дирижоро́скэ. Сыклякирибэ́н Кареескирэ Чхавэ́ндыр.

² Амэ шундя́м пэ́скирэ канэнца, о Дэ́вла, амарэ́ дада́ роспхэндлэ́ пал ди́вна бутя́, савэ́ Ту кэрдя́н дрэ лэ́нгирэ дывэса́, дрэ дывэса́ ґаратунэ́ (вагунэ́).

³ Ту традыян криг Пэ́скирэ вастэ́са Наюды́тка на́цыи, а чхудя́н пэ́скирэ манушэ́н тэ дживэ́н; Ту тасадян Наюды́тка на́цыи, а дыя́н Пэскирэнгэ тэ роскхувэнпэ.

⁴ Тырэ́ мануша́ на дорэснэ́ пхув пэ́скирэ куртала́са и ёнэ на зракхнэ́ пэс пэ́скирэ вастэ́са, нэ дава́ сыс Тыри́ зор и Тыро́ васт и дуд Тырэ́ москиро, пал-дова́ со Ту́кэ ячнэ́ дро́га ёнэ.

⁵ Ту сан миро Кра́ли! Миро Дэ́вла! Дэ припхэныбэ́н, соб (кай) Яково тэ лэл упралыпэ́н.

⁶ Ту́са амэ пиризорьякираса амарэ́ вэргэ́н, Тырэ́ лавэ́са амэ ява́са тэ штакирас одолэ́н, савэ́ ґаздэ́напэ пэ амэ́ндэ.

⁷ Мэ на ява́ва тэ допатяв мирэ́ луко́скэ, ци мирэ́ куртала́кэ тэ зракхэ́л ман.

⁸ Нэ Ту зракхця́н амэн амарэ́ вэргэ́ндыр, и Ту ладжакирдян одолэ́н, савэ́ древа́н на камлэ́ амэн.

⁹ Амэ ява́са тэ ґаздас шарибэ́н пал Дэвлэ́стэ со дывэ́с и амэ ява́са тэ шарас Тыро́ лав пэ сарэ́ ве́ки. Сэ́ла.

¹⁰ Нэ Ту сатаки (усае́кх) ячкирдян амэн и ладжакирдян амэн, и Ту на ги́ян анги́л амарэ́ халадыпнэнца.

¹¹ Ту кэрдя́н адя́кэ, со амэ дыямпэ палэ вэргэ́ндыр и кодолэ́, савэ́ бидыкхнэ амэн, лучкирэнас амэн.

¹² Ту дыя́н амэн сыр бакрэ́н пэ хабэ́н, и Ту росчхудян амэн машки́р Наюды́тка на́цыи.

¹³ Ту бикиндян Пэ́скирэ манушэ́н ни пал со, Ту́кэ нанэ нисави́ льго́та (ко́фо) далэ́ тиминатыр.

¹⁴ Ту кэрдя́н адя́кэ, со амарэ́ пашатунэ́ обракирэна амэн; санапэ холямэс и просана амэн одолэ́, савэ́ исын пашы́л амэ́ндэ.

¹⁵ Ту кэрдя́н амэ́ндыр сабнытко приме́ро (сыкаибэ́н) машки́р Наюды́тка на́цыи, мануша́ кунякирэна шэрэнца паш амэ́ндэ.

¹⁶ Мири́ ладж исын усады (сак) анги́л ма́ндэ, мирэ́-москиро ладжаипэ́н сы́рбы гарадя ман занятыр одолэнгирэндыр,

¹⁷ савэ́ бангякирэна хоханэ́с и калякирэна ман, вэргэ́ндыр и одолэ́н, савэ́ исын холынакирэ.

¹⁸ Саро́ дава́ явдя́ пэ амэ́ндэ, амэ усае́кх на бистырдям Тут, ци амэ пхагирдян Тыро́ Завето:

¹⁹ Амаро́ ило́ на рисия́ палэ, и амарэ́ пирэ́ (сто́пы) на штадэ дрэ риг Тырэ́ дромэ́стыр;

²⁰ мэк Ту роспхарадян амэн сыр ка́ра дрэ пэ штэ́то, кай исын шакалы, и гарадян амэн дрэ мэрибнаскири зэр (тенё).

²¹ Ко́ли амэ бистырдямас лав амарэ́ Дэвлэ́скиро и динд(з)ькирдямас амарэ́ васта́ кэ чу́жо дэвлоро,

²² ци Дэвэ́л на уджиндя́ дава́? Пал-дова́ со Ёв джинэ́ла, со исын гарадо́ дро ило́.

²³ Чачо́, пал Ту́тэ амэн замарэна со дывэ́с, амэн гинэ́на сыр бакрэ́н, савэ́н чхинэна.

²⁴ Ушты́! Со́скэ Ту сан суто́, о Раё Дэ́вла? Яв пашылэды́р! На джа́ криг сарэ́са.

²⁵ Со́скэ Ту ґаравэса Пэ́скиро муй, бистрэса, со амэн тасавэна, со амэ́ндэ исын бари дар?

²⁶ Пал-дова́ со амаро́ ди исын бандякирдо кэ пхувья́киро пра́хо, амаро́ кужу́м (жэлудко) рикирлапэ зоралэ́с палэ пхув.

²⁷ [р.с.] Ѓаздэпэ тэ дэс васт амэ́нгэ, и зра́кх амэн Тырэ́ лачхэ́-илыткимаса.